التاريخ: 20.10.2018 الحمدلله.. كان معي طلق صحاني من النوم.. كنت اسبوع 38.1 . ولما حسبت الوقت كان في دقيقتين بين كل طلقة وطلقة.. لما رحت ع المستشفى كل شي اختفى كإنو كنت عم اكزب 😁 جوزي بحكيلي انتي عنجد عم تتوجعي.. قلتلو كنت عم اتوجع وهسه مو حاسة بشي 😶 اجت الدكتورة فحصتني حكتلي عندك فتحة 2.5 روحي تمشي وارجعي.. طلعت انا وجوزي نتمشى شوي ورجع الوجع مع المشي .. رجعت ع الدكتورة وحكتلي ع غرفة الميلاد لازم تروحي 😁 كانت الساعة تنتين الفجر.. كان معي وجع شديد لهيك اخدت ابرة البيدورال بالظهر.. وكتيييير خففت علي بعد الله.. والحمدلله قضيناها انا وجوزي نوم بالغرفة لعند الساعة تلاتة العصر (جوعانين نوم 😴). صحت على وجع خفيف بس المشكلة ما كان الرحم فاتح.. راحت عملتلي طلق صناعي لانو دقات قلب الجنين عم تنزل.. وضليت اتوجع لعند الساعة خمسة المغرب وما في الا تلاتة ونص سانتة فتحة الرحم. تركتني الممرضة لحتى تروح تعمل توليد لوحدة تانية ولما رجعت فحصتني وحكتلي عندك الرحم فاتح اربعة سانتة وبدي اروح اعمل توليد لوحدة هون ع جنبك وبس اجي بدي افتحلك المي لحتى تتسرع عندك عملية الولادة 😮 الصراحة كتير خفت ... وجوزي كان طالع من الغرفة بدو يجيبلو لقمة ياكلها لانو من امبارح ما اكل كمان 😯😐😑 المسكين بيتوجع معي 😒😒 وطلعت وتركتني لحالي.. وفجأة وانا عم دردش مع اختي ع التليفون حسيت بضغط قوي قوي.. الا والمي تنزل.. والوجع يشتد.. وحسيت الراس بدو يطلع... وبضغط ع الجرس مشان نادي الممرضة وما ردت.. وصرت ناديلها بصوتي بس مع الوجع ما كان يطلعلي صوت 🤐 فاتت عليي ممرضة تانية ما بعرف شو بدها من الغرفة وطلعت مستعجلة حتى ما سمعت مني شو بدي احكي.. بعدها اجت كمان ممرضة وبرضو كانت مستعجلة ولما شفتها قريبة مني مسكت فيها بايديي التنتين قلتلها اسمعي ولي! انا بدي اولد هسه! المية نزلت والراس بدو يطلع ولكم يخرب بيوتكن شو هالاهمال هاد؟! وهي تجي ركاض وتلبس القلوفز وتنادي ومش عارفة ايش.. المهم لما طلع الراس كل شي كان حلو هههه الحمدلله عملية الولادة ذاتها ما اخذت معي ثلاث دقايق.. الحمدلله وبفضل الله جبت.. هسه لما كانت بدها تقطع حبل السرة طلبت منها انو ما تقطعو فورا.. خليتها تستنى لعند ما البيبي امتصت كل السائل يلي فيه لانو الله اكبر قديشو مفيد لالها..! اخدت تقريبا اربع دقايق لعند ما خلصت كل المادة. النتيجة: بنوتة حلوة كتير وسميتها "لانا".. 🌺 الحمدلله الاحساس اكتر من رائع.. حاسة حالي خفيفة.. وجديدة.. وربي راضي علي لانو رزقني بنوتة صحتها تمام.