مرحبايا امهات اليوم راح اقول لكم قصتي مع ولادتي في ابني الثالث ماشاء الله . . طبعن انا بولادتي الاولى + ولادتي الثانيه احس بالالم فقط ل4 سانتي بعدها اخذ ابرة الظهر الحمدلله يوقف الالم حتى في خروج البيبي في ضغط بسيط فقط لاكن الم مافي الحمدلله . . طبعن في حملي الثالث كنت مخططه لنفس الموضوع لما اولد باخذ الابره ان شاء الله واموري تمام وطلبت من دكتوره قبل هاي الابره وقالت لي ان هذا الموضوع لازم تطلبينه نفس الوقت وقت الولاده وهم يتصرفون . . مرت الايام وجا موعد الولاده طبعن انا يجيني طلق سبحان الله على 3 مرات حملت فيهم اخذ طلق صناعي لاني اكون طوفت 9شهور رحت للمستشفى بيوم الي حددت لي دكتوره طلق صناعي نوموني في غرفه مشتركه طبعن لان ماقبل الولاده تكون غرفه مراقبه قالت لي الممرضه ارتاحي على ما تجي دكتوره ارتحت ساعه بعدها جوني قروب دكاتره من 4 نساء و3 ممرضات (طبعن هذا مستشفى حكومي عندنا في دبي اسمه مستشفى لطيفه ) المهم جوني وكلموني قالت لي دكتوره ان راح يعطوني بالبدايه تحميله طلق صناعي وان شاء الله بيبدا الطلق عندي بعد نص ساعه المهم اعطتني وعملت لي تحفيز قالت اساسا هو فاتح 3 سانتي وان شاء الله امورك سهالات قلت لها ان شاء الله حطت لي تحميله ونمت نص ساعه بعدها الممرضه جتني قالت في الم قلت لا قالت قومي امشي بالقسم عشان يجيكي الطلق قمت امشي والامور كلها سهالات مافي ولا قطرة الم مرو ساعتين بعدها عملت لي تخطيط (جهاز الي ينربط على البطن) طلع طلق بارد جدا نادو الدكتوره جات عندي قالت لي الموضوع جدا عادي في بنات يجيهم من اول تحميله الطلق وفي منهم لازم تحميله ثانيه (للعلم ولادتي الاولى وثانيه من اول تحميله جاني طلق ) المهم قلت لدكتوره لو ماجاني الم في تحميله ثاني شيصير قالت نعطيكي تحميله ثالثه ولو ما جا طلق نحولك قيصري .. لما قالت لي قيصري مت من الخوف قلت لها مستحيل اولد قيصري قالت ان شاء الله بتولدي طبيعي قالت لما تكملي 6 ساعات نعطيكي تحميله ثانيه المهم وقتها انا نمت قلت ارتاح عشان لو جاني طلق في تحميله ثانيه اكون نايمه . . بعد مرور الوقت كملت 6 ساعات جتني دكتوره مره ثانيه عملت لي تحفيز وحطت لي تحميله مره ثانيه وبعد نص ساعه بديت امشي حوالي ساعه تعبت هلكت مافي اي بوادر ولاده! انهرت تعب من يومين انا على هذي الحاله رجعت على سرير بكيت بكييييييت من تعب اخر شهر ويومين بالمستشفى ونوم متقطع وكل شوي جهاز تخطيط تعبت جتني ممرضه حظنتني ماانساها قعدت تواسيني وقالت لي كثير مثل حالتك يجون امس وحده ولدت لا تحاتي وتصبري واقري القران ومسحت على راسي وجلست تكلمني ارتحت يابنات كثير لان مالي احد يواسيني كنت لوحدي قالت لي نامي لما تمر 6 ساعات اصحيكي نمت ودمعتي على خدي واسمع القران (سورة مريم يابنات لها تاثير قوي فلولاده جربوها تدعولي ) بعدها صحيت من نوم على صوت دكتوره وانا خلاص ماباقي فيني صبر وثقل وتعب قالت لي دكتوره هاي تحميله الاخيره بعدها مافي حل غير العمليه شدي حيلك حطتها لي وراحت كنت بخاطري اقول ان شاء الله هذي المره لازم يجيني الطلق ارتحت نص ساعه ... بعدها قمت لبست ملابسي وحطيت سماعه باذني على (سورة مريم) وبديت امشي وانا اردد القران حوالي ساعتين ونص بعدها بدا يجيني الم في الاسفل وقلت ماراح اوقف راح امشي بعد خمس دقايق صار الالم لايطاق ماقدرت امشي رجعت على سرير منهاره بكي قلت للممرضه الم الم فضيع نادي دكتوره على ماجت الدكتوره فحصتني قالت 7 سانتي على غرفة الولاده قلت متى فتح 7 سانتي انا ابي ابرة الظهر ماعدت اقدر اتحمل الالم فضيع وطلق سرررريع يابنات اول مره احس في 😭 مايعطيني فكه ارتاح مستمر احاول اكتم الصرخه مش قادره اخذت تلفون اتصلت في زوجي قلت له تعال بسرعه ولااااااده وسكرت الخط اله شوي اشوف نفسي في غرفة الولاده وانا ميييته صياح ودموووع تلعب فيني وزوجي يهديني اقوله ابي ابرة الظهر ماعادت قادره الم فضيع وانا يابنات ماتحمل الالم ابد وزوجي يقولي تصبري والله يابنات من الالم شديت الكندوره 😭😅 قالي يا بنت الحلال بتنشق الكندوره شوي شوي عليه كملت نص ساعه على هاي الحاله كاني سمكه طالعه من الماء والله جت الممرضه قالت افحص كم سانتي حسيت ان لو احد لمسني من المنطقه راح انفجر قلت لها مااقدر قالت طيب كيف نعرف كم سانتي قال لي زوجي خلاص خليها تفحص عشان ترتاحي وتولدي والله يابنات من لمست المنطقه رفستها برجلي الممرضه طاحت على الارض 😅 ياويلي حتى نسيت الالم قمت اشوف الممرضه اش صار عليها قامت وكملت عادي 😂 المهم قالت لي خلاص 10 سانتي ولادددده شدي حيلك . . شغلو لمه وجهزو الحضانه والادوات وجت الدكتوره وقالت 1.2.3 يلا بوووش وانا احاول في مره الخامسه الحمدلله طلع حبيبي حسيت براحه كبيره لما طلع حسيت اني ولدت من جديد الالم راح وابني في حظني يابنات احلى شعور لما يحطو على صدرك (عندنا نظام لما يطلع طفل على طول يحطو على صدر الام ترضعه قبل حتى يتم قص الحبل السري ومافي حضانه لا يظل الطفل مع امه طول الوقت لحد مايطلع للبيت ) . . الحمدلله انتهت قصة وهن على وهن . . اذا لقيت تفاعل راح اكتب تجربتي مع ابرة الظهر في ولاداتي السابقه .. سامحوني على الاطاله