حبي أهلك قد ما تقدري، اشبعي منهم، رح تمر السنين بسرعة، رح تشتهي ريحة طبيخهم، رح تعملي كل جهدك عشان يطلع طعم الطبخة نفس طبخة إمك ورح تفشلي! ( أهم عنصر ناقص، نَفس الوالدة بالطبخة) ، رح تكبري وتتنهدي ! رح تفقدي صواتهم، ضحكاتهم، سهراتهم، وحتى المشاكل الصغيرة بينك وبين اخوتك رح تتحول لذكريات محزنه عكس قبل تماما! أما الجزء الي اصبح معضلتي بالعالم هو غرفتي، مش قادر أرجع أعترف إنها غرفتي، بحس لو بدخلها قنبلة رح تنفجر بوجهي ( ذكريات وأيام وسنيين وليالي طوويلة ) بكل مرة بزور أهلي بحاول اتجنبها قدر الإمكان ! بلا منو هالإنفجار الي برجعنا لمراحل تعبنا عشان نتجاوزها وشوي شوي بتنسى وين كان محلك بالضبط ع طاولة السفرة، وبتصير طبخاتك المحببه مقتصره ع الأيام الي بتزور أهلك فيها، وبطل إلك حصة بسلة الغسيل ورف الثلاجة الي كنت تخبي فيه الزواكي صار من نصيب غيرك وكاسات الشاي ع الفطور نقصو كاسة، وبطل في خمس ست ايدين يلتقو بنفس الصحن عالسفرة احضنوا أهلكم قد ما تقدرو، رح تمشي الأيام بسرعة وتصير زيارتهم محسوبة بالساعة واليوم والدقيقة، هدول الوجوه الي كنتو تشوفوهم 24 ساعة باليوم، صارت شوفتهم محدودة ومعدودة وبتعتمد ع حنية الظروف والأيام رح تخلقو الأسباب من نص ظروف الحياة عشان تقضو أكتر وقت معهم، وبكل مره بنحكي ولو مرق هاليوم زي لمح البصر ! بكل مره بتشد علينا الحياة بنتذكر وقت كنا نرمي راسنا بحضن الوالدة وبعدها كلشي يصير سهل ومحلول، أما اليوم مجبورين نهيىء الظروف ونستحضر الأسباب ونلاقي إحنا الحل ولامره خطر عبالي أنو تحضير طبخة بكرا مشكلة، لما كانت إمي تسألنا شو أطبخ؟ كنت أهرب من الجواب ب ( أي إشي ) ، اليوم قائمة طووويلة عريضة ملزقة ع التلاجة لعناوين 60 طبخة وبالآخر بضطر أمشيها ب أي اشي لانو خلص دوامي الساعة 5 وشوي قربو من أهلكم كثير، حبوهم بعيونكم وقلوبكم، رح تفقدوهم ،وتشتاقو لكل تفاصيلهم متل الليالي الي كانت تروح كلها ع ( فرط الزعتر، أو البازيلا، أو حتى المعجنات، وتحضير كعك العيد ) رح تصير لمة قطف الزيتون مشهد مستثنى، وكثير أعراس بتقتصر ع إنك تسمع تفاصيلها ع التلفون، وكل أخبار العيلة بتوصلك أول بأول وبكل مرة جزء بيقل شغفك واهتمامك اتجاهو بسبب المسافات واختلاف الاهتمامات رح يصير مشهد الوالد وهو راجع من الشغل ( مشهد خيالي درامي ) يفتح الباب وحامل بإيدو كيس، كلنا نسأل يابا شو هاد ؟ اليوم تسوق الكياس هاي صار مسؤوليتنا على مايبدو كبرنا كثير ! وشتقنا لريحة الوالدة وهي واقفة ع المجلى بعز الضهر تلف ورق عنب وفقدنا جزء من طفولتنا كان مخبى بين حيطان مكان بنحكيلو ( دار أهلي ) الصغار الي تركناهم صارو شباب، ودهان الحيطان تغير، وتقسيم الغرف كمان، وتوزيع لحافات الشتوية - هامش - إحنا بنحب كل جزء بالحاضر الي عايشينو بنحب حياتنا مع عيلنا الصغيرة وزواجنا الحنونين كتيير وبنحب ولادنا وراضيين تماما عن كل مرحلة بحياتنا ، بس بضل صوت الماضي ( لحلوح ) زيادة عن اللزوم احياناً