مرحبا انا امس ولدت وحابه اقولكم قصة ولادتي بالتفصيل يمكن احد يستفيد منها .. انا ولدت بالاسبوع ٣٨ ونص قبلها ب٥ ايام كانت نازله السداده علي اللي هي دم مخلوط غليض ولكن كان بدون طلق وانا من حملت ماجاني الا طلوق بسيطه كاذبه بالليل المهم رحت المستشفى قالت الرحم مفتوح ٢ سانتي بس مافيه طلق ولسى معك وقت وعشانك بكريه ارجعي لين يجيك الطلق ولاتجيني الا ياطلق ياحركة الجنين خافه عليك يانزلت موية الراس .. رجعت البيت وصرت يومياً امشيلي من نص ساعه لساعه بالكثير واطلع الدرج وانزل كم مره المهم يوم السبت كنت مزودتها مشي شوي رجعت البيت على ١١ نمت وصحيت بعدها بنص ساعه وكني مبوبه على نفسي الله يكرمكم ومافيه اي الم بس مويا صافيه عرفت انها موية الراس على طول رحت المستشفى وصلت على ١٢ قالوا موية الراس كتبولي تنويم ولقوا رحمي فاتح ٣ سانتي وعطوني ابرة الظهر صراحه تجنن انصح الجميع فيها وحطولي طلق صناعي دخلت على غرفة الولاده الساعه ٣ ومن ٣ وانا على الطلق الصناعي وننتظر الرحم يفتح مافتح ١٠ سانتي الا ١٢ الظهر وجتني الدكتوره عشان خلاص ولاده والحمدلله ربي وفقني بدكتوره اتعب ماوفيتها حقها تعسرت ولادتي شوي بحكم اني مانمت ولا اكلت من غداي السبت وصاحيه من الصبح ومع الخوف قلبي نبضها تسارع والضغط ارتفع مره ماقدرت ادفع ابداً مهدوده قلتلها دكتوره مااقدررررر والله من كلمه وحده خلتني احاول الف مره عشانها قالت عمليه حرام انتي فاتح ١٠ سانتي ساعديني بس وطمنتني وشجعتنط اني اقدر وصرت احاول وبالاخير جابت زي حاجه تشفط البيبي لانه تعب واحنا نحاول وشفطت وانا ادف والحمدلله طلع البيبي ولكن بعد تعب اول ماشفته نسيت التعب وكل شيء .. اللي استفدته يابنات الغلط راكبني من فوق لتحت مااكلت لاني سمعت الناس تقول فيه ناس تبرز وانتوا بكرامه على عيالها .. وهذا ضرني ماساعدني كنت منهكه ولاقدرت ادفع والشيء الثاني الخوف والله ماكان له داعي بس تعبني زياده وطير الضغط عندي ونبضات القلب تعبت نفسي وتعبت الولد بكثرة خوفي اللي ماله داعي الولاده قرارك انتي اما انك تكونين قويه وتسهل عليك او ضعيفه مثلي وتصعبينها ماابغى احد يمر باللي مريت فيه لولا الله ثم الدكتوره كان حولوني قيصري بس ربي حطها بطريقي ورفضت القيصيري ولا كان انا مخيوطه تحت وفوق .. انا الحمدلله بخير الحين بس ولدي شوي تعبان ارهقته بالولاده عنده الاكسجين ناقص شوي اخذوه على الملاحظه بس الحمدلله طمنوني انه قاعد يتحسن دعواتكم يابنات ونصبحتي لكم كلوو كويس قبل الولاده وناموا زين ولاتفكرون ولاتخافون ابد والله انها اسهل من ماتوقعت ومع ابرة الظهر اسهل بعد انا اتفرج عليها وهي تخيط .. ربي ييسر عليكم جميعاً وان شاء الله محد يجرب اللي جربته وتتيسر ولاداتكم كلكم 💜💜