السلام عليكم ورحمة الله وبركاته كيفكم خواتي ان شاء الله الجميع بخير ربي يهونها على الجميع ويتمم لكل حامل ويسهل لكل وحده على وحه ولاده ويرزق كل محروم الذريه الصالحه الحمدلله الذي بحمده تتم الصالحات ولدت من ٩ ايام وحابه اشارككم قصة ولادتي انا من حوامل ٦ مايو وبكريه وولدت ثالث يوم بالاسبوع ٣٨ بثاني يوم بالاسبوع ٣٨ الاحد ٢٨/٢ الساعه ١٠ المساء نزل علي افراز بسيط ظنيته وانتو بكرامه بول بس ماقدرت اسيطر عليه يعني مهما احاول اوقفه مايوقف وكنت ويا امي بالحوش ولما خبرتها تقول ممكن ماي الجنين رحت الحمام البس قطن لو كان فعلا ماي الجنين وبعدها بربع ساعه نزلت كميه ثانيه بسيطه جدا ووقفت بروحها وبعدها بعشر دقايق نفس الشي كميه ثالثه وبعد بسيطه المهم امي تاكدت انه ماي الجنين وتقول لي مايحتاج تروحين المستشفى تو الناس بدري اذا للحين مافي وجع الطلق ومن هالكلام انا حاولت اسايرها لان ماودي اخلها تقلق ولان انا مقرره اروح المستشفى بروحي بدون امي ماودي تتعب هناك وماودي تشوفني اتألم المهم دخلت اخذ دش دافي وحاولت استعد في حال كانت ولاده باني اشيل شعر العانه تكرمون اخر شي نبيه نولد واحنا مو نظاف 😂 يعني للحين مافي وجع طلق طبيعي افكر بهالسوالف لان بكريه وللحين ماعندي فكره شو اللي ينتظرني خلصت وكلمت المستشفى وحكيت لهم الوضع طلبوا مني اتوجه فورا للطواري يفحصون الافراز يتاكدون لو ماي الجنين او افراز عادي وهم وقتها يقررون لو ارجع البيت او لا انا فعلا ماودي اروح وماعندي طلق على قد ما اسمع وايد بنات يتاخرون بالمستشفى لان مابدا الطلق عندهم بس بنفس الوقت مو حابه اجازف لو تصير اي مضاعفات او شي ماراح اسامح نفسي خصوصا حملي بعد انتظار خمس سنوات بعد ما تاكدت امي نامت اتصلت لاخويه ورحت الطواري حول الساعه ٤ الفجر دخلوني مباشره على قسم المعاينه وكشفت علي الدكتوره مهبلي وكان التوسع ١ سم بدون طلق بحكم حطوا لي جهاز تخطيط قلب الجنين ويقيس قوة الطلق ظليت في غرفة المعاينه الين ٦ الصباح شيكوا على الافراز طلع فعلا ماي الجنين وقرروا اني راح اترقد والدكتوره بدت تفهمني خيارات الولاده بما انه بدا ينزل ماي الجنين حتى لو مو دفعه وحده الاجراء واحد ينتظرون ٢٤ ساعه من اول مره نزل فيها الماي ويشوفون فيه توسع وطلق بمعنى ولاده طبيعيه او يضطرون يعطوني طلق صناعي اجباري بعدها ... حولوني قسم الترقيد وحطوا نفس الجهاز يقيس النبض والطلق ونبض الجنين كان عالي وخافوا من هالشي كل شوي يراقبون النبض وحطوا لي دوا ف الوريد عشان يخفضه وبعد فتره انخفض شوي ورجع زاد كنت محرصه ان اخويه مايقول حق احد بس لما وصلت الساعه ٨ كلمت ابويه وخبرته اني ف المستشفى وان ماودي امي تقلق علي فعطاني كلمه انه ماراح يخبرها وجاني يشوف وضعي ويطمن علي الساعه ١٢ الظهر اخذوني غرفة الولاده مادري على اي اساس ماكان فيه وجع طلق ولا شي ونفس الشي ظلوا يقيسون النبض والطلق بس الغريبه وقتها ان الجهاز يعطي ارقام خرافيه ف الطلق وانا ماعندي اي احساس باي الم!!!!!! يعني الطلق يبدا من بعد ال٣٠ اذا دايم فوق ال٣٠ معناته بدا الطلق ولما يوصل ٦٠ وطالع يتفرض الوحده تبدا تحس فيه ومقياس جهاز الطلق يحسب من ٠ الى ١٠٠ انا احيانا يوصل التخطيط ١٢٧ يعني يتعدى الرسم البياني ورقة التخطيط ووالله العظيم ما احس بشي نهائي بحكم كان عندي الم بظهري ملازمني طووووول فترة حملي بسبب اصابه قديمه بالظهر جوني دكتورتين ومصدومات كيف ماتحسين باي الم!! قامت وحده فيهم تقول خلاص انا الجهاز ماراح اعتمده لان قد يكون فيه شي لخبطه او شي ولمست بطني تقول لينه وطلبت من الممرضه كل شوي تسوي فحص للطلق بيدها ماتعتمد الجهاز والفحص يكون بانهم يحطون يدهم من برا على بداية الرحم من فوق جهة الصدر ويحسون بالانقباضات وتتحجر وقتها البطن وتفك وفعلا ممرضتين سووا لي نفس الفحص ولقوا انه فيه طلق قووي وماكنت حاسه فيه نهاااااائي طلبوا الدكتورتين انهم يشيلون الجهاز عني وابدا امشي ف المستشفى لعل مع الحركه يبدا يكون فيه توسع لان للحين ١ ونص سم بديت امشي واستغفر واذكر الله الين رجلي اليمين بدت تعورني حييييل من جهة الورك قررت اقعد تركوني على هالوضع فتره ورجعت الدكتوره تعطيني نفس الخيارات انه هل انتظر الين ١٠ المساء واعطي نفسي مهله اولد طبيعي او انه خلاص نبدا طلق صناعي القرار لي وانا طبعا حبيت دام مافي خطوره على الجنين اني اعطي نفسي فرصه الين ١٠ المساء وقتها كانت الساعه ٣ العصر وطلعت امي تدري بكل شي وكانت تسوي نفسها نايمه من الخوف 😂😂😂😂 وسمعت لما اكلم اخويه يجيني وكل شي الساعه ٤ العصر التوسع ٢ ونص سم ومافي بوادر ولاده الجهاز مازال يعطي طلق بارقام كبيره تتعدى الميه وانا مافي اي احساس بالالم ولا فيه توسع فقرروا يعطوني نسبه بسيطه من الطلق الصناعي في الوريد على امل انه الوجع يسوي توسع ويقولون الحين فيه ٦ ساعات قبل نوصل للموعد المحدد بانتهاء ال٢٤ ساعه مع الطلق الصناعي بديت احس شوية الم رغم الارقام بال٦٠ وبال٤٠ بس كنت احس فيها سبحان الله الم الطبيعي غير الصناعي جاتني امي المغرب وهي معصبه ليش رحت بدري وليش خليتهم يلعبون فيني بالصناعي ومن هالكلام كانت تروح وتجي بين غرفة الترقيد وغرفة الولاده مو قادره تشوفني اتالم بدا يشتد الالم اكثر واكثر وبدا يتقارب الوجع ومع كل طلقه ارفع صوتي يالله يالله ياربي ياحبيبي ياالله عونك لا اله الا انت سبحانك اني كنت من الظالمين وتروح الطلقه وارجع اهدا شوي دخلنا بثاني يوم اللي هو الاثنين ٢٩/٢ وبدا الجد بدوا يزيدون الطلق وبدا الالم يشتد اكثر واكثر وصار فيه توسع ٥ سم والله الم لا يطاق يارب رحمتك تذكرت امي وشكثر الالم اللي ممكن تكون مرت فيه بدون ماتشتكي يالله جنه لامي ولامهاتكم وللجميع يارب بدون حساب ولا سابق عذاب كانت ياقلبي تروح وترجع لما توصل عند الباب تسمعني اعلي صوتي بالذكر والتهليل تخاف وتروح الغرفة تقول لي كل شوي كنت اجي اسمع واسال وارجع ماقدرت اقعد اسمعج تونين وتتالمين 😭😭😭 الفجر صار التوسع ٧ سم وبصراحه ناسيه باي مرحله طقوا لي ماي الجنين و طبعا لا احكي لكم كم شفت ممرضات تغير علي الين ولدت وفعلا اغلب الممرضات كانوا ملائكه سبحان الله الا اخر وحده وقت الجد الله يسامحها مره شديده وصارمه وتسوي كل شي بعنف فعلا تازمت نفسيتي بسببها وكل شوي لما تقيس تحاول توسع اكثر مو مثل البقيه وجات الدكتوره وحاولت توسع اكثر وبدوا يزيدون الطلق اكثر وانا اموت واحيا مع كل طلقه ربي لك الحمد على حال في فترة المساء كان الالم محتمل بس انا ظنيته قويه وطلبت مسكن وعطوني وفعلا كان ممتاز وخف الالم وبعدها رجع وطلبت ابرة الظهر قالوا قدام شوي نعطيج لما يكون التوسع ٧ ونسوا يعطوني بوقتها ويوم طلبته قريب الولاده رفضوا بحكم انه مافي مجال ورجعوا عطوني مسكن قووووي احس مثل الهلاوس صوتي تغير وما قدر اتكلم عدل مثل البنج شويات وراح مفعوله لما بدا الجد الصباح طلبت مسكن ورفضوا قطعا بحكم اني استهلكت عدد المسكنات!!!!!!!! وبديت اتهاوش معاهم من الوجع اللي صار جدددددا متقارب يالله يالله اتنفس بين كل وجع والثاني اهاوشهم ليش ماعطيتوني ابرة الظهر حسبي عليكم انا طلبتها من وقت انتم اللي ضيعتوا الفرصه ومن هالكلام لان فعلا الالم لاااااا يحتمل نهائي عطوني قناع الاكسجين كل ما تجي الطلق احاول اتنفس فيه كان ينظم النفس ويبعد تفكيرج عن الوجع شوي لكن نهائي مايخفف الوجع الفجر حول ٤ او ٥ ماعدت اجمع ولا اطالع الساعه كثير.. تجمعوا علي حول ٥ ممرضات ودكتوره وكان التوسع ١٠ سم وبدت عملية التوليد شدي شدي يلا يلا وانا طبعا لي يومين مو نايمه واكثر من ١٤ ساعه مو ماكله (هما منعوا عني الاكل من ١ الظهر) وماعندي اي طاقه للشد ولا كتم النفس رغم كنت متعلمه الطرق الصحيحه للتنفس اثناء الولاده يقولون لي يلا اذا جات الطلقه كانج تسوي خروج يلا يلا وانا بالكاد اقدر اخذ نفس عميق واكتمه واحاول ازفر لكن نفسي جدا جدا قصير مو قادره احبسه فتره طويله من الارهاق والتعب وقصوا طبعا منطقة العجان لما شافوا راس البنت وماعندي قدره ع الشد فراح يساعد التوسع شوي واستمرت هالمعاناه الين ٧ صحت من قمة راسي عمليييييه خلااااااص ابى عمليه يقولون حرام شايفين الراس يلا ساعدينا نساعدج واستمريت وياهم الين ٧ وثلث قلت هذي اخر زفره بعدها مقرره عمليه لان بالنسبه لي كفايه الم وكفايه وجع وماراح اخاطر ببنتي بعد هالسنين .. اخر نفس قررت اخذه حاولت اكتمه لاطول فتره ممكنه وبديت اشوف نجوم من شدة الدوخه وانقطاع النفس ونزل الراس وطلعت احلى ميره للحياه ومجرد حطوها على صدري قسما بالله نسيت كلللللل اللي مريت فيه اكثر من ١٥ ساعه طلق صناعي شفت الموت لكن سبحان من له حكمه في كل شي شفت بنتي وانتهت معاناتي ربي لك الحمد من فضلك قعدت احمد الله واشكر فضله واسمي عليها وادعي لها بالصلاح هنا تذكرت شكثر كنت العوز امي وابهذلها وانا صغيره وادعي لامي بالجنه على صبرها ربي يغفر لنا تقصيرنا (التكملة بملفي بعنوان قصة ولادتي ٢)