مسا الخير عالجميع حابه اشاركم كيف ولدت بنوتي كانت اخر دوره ال ٢/يناير يعني بلش حملي من ٩/يناير وكان موعد ولادتي المتوقع ٩/ اكتوبر طبعا كملت شهري تاخرت يوم واحد ولدت ب ١٠ / اكتوبر وهسا رح احكيلكم كيف بدا الطلق معي •••••• ب ١٠/١٠ صحيت الصبح ع مغص ببطني كنت مفكره اني ماخده برد ما توقعت ابدا انو بدايت طلق وكنت قبلها بالليل شاربه يانسون قلت بما انو بطني ممغوص بعملي مج يانسون مع انو الوجع كان بزيد وكل شوي كنت افوت الحمام بس ما في شي غير اسهال اكرمكم الله وما نزل شي لا السداده ولا مية الراس قلت خليني احسب كل متى بصير الوجع بلكي رح اولد اول شي كان كل تلت ساعه او ربع ساعه بعدها صار كل ٥ دقائق والوجع كان بس بقاع بطني وكان بزيد كل شوي اما ظهري ما حسيت بوجع ملحوظ قراة سورة مريم والفاتحه والمعوذات ودعيت ادعية تسهيل الولاده اخر شي بطلت اتحمل الوجع صرت ابكي منه قام جوزي وداني ع مشفى خاص قريب من البيت وكنت ع اساس بدي اولد فيو فتت وكانو رح يعملو فحص داخلي وكانت اول مره رح اعمل فيها هالفحص بس الممرضه كانت دفشه جداا ومعاملتها سيئه لابعد الحدود صارو يصيحو علي وكانت رح تنادي دكتور يعملي فحص داخلي اخر شي حكتلهم ما بدي افحص ولا بدي اولد عندكم وتخانقت معهم وطلعت ومشيت بالشارع والطلق كان عم بزيد فرحت لمشفى تاني برضو خاص رحت مع جوزي وامي فتت عندهم وعملولي فحص داخلي وبصراحه كان مؤلم جدا خصوصا انو عندي بداية باصور المهم طلع عندي توسع ٣ سم وبكل مره يجي الطلق ادعي ربي يخفف عني واقرا قران ما كنت اصرخ كتير وكنت اكتم نفسي عشان اولد اسرع يعني ادفع لتحت عملولي فحص ٣ مرات اخر مره صار ١٠سم واخدوني ع غرفة الولاده طبعا كانو يعطوني مسكن وكنت اغفى وكل ما يجي الطلق اصحى من الوجع وارجع انام فتت ع غرفة الولاده ونا خايفه حكتلهم بدي مخدر ما بدي احس بشي وفعلا اعطوني مخدر بالوريد وبصراحه مو متذكره شي من ولادتي زي الحلم وحتى ما شفت بنتي ونا بولدها بتذكر بس انو الدكتوره حكتلي ادفعي لينزل الراس وبس صحيت وصرت اطلع حولي حكيت للدكتوره متى رح اولد حكتلي ولدتي وخلصتي وحتى كانت مخيطتني ومخلصه كل هاد ونا ما بعرف وبعدها اخدوني ع غرفتي صحيت لقيت ماما حكتلها وين بنتي حكتلي بدها ساعتين وبجيبوها ورجعت غفيت كان البنج بعدو وبعدها جابولي بنتي سميتها ( ألما ) وسبحان الله ع هالخلقه الله يحميها كان شعور غريب بس شفتها الحمد لله رب العالمين هاي احلى فرحه بحياتي طولت عليكم وشرحت بالتفصيل عشان يكون كلشي مفهوم ويا رب يسهل ولادتكم جميعا ويتتم حملكم ع خير ويرزقم ذرية صالحه وسليمه ومعافاة يا رب 🤲🏻