بالبدايه حملت بطفلي الاول وكنت بكريه مش فاهمه شي تعبت بالحمل ووصلت لنهايه الشهر السادس او بدايه السابع وحصل طلق مفاجئ وانا كنت لحالي بالبيت واتصلت بزوجي للشغل وروح لعندي وانا يزيدين الطلق عندي اول مافتحت له الباب خلاص ماعد قدرت اتحرك من الوجع وكنت اصيح بكل صوتي واتوجع وقدهن طلق قويات ممكن لو كنت دفعت كنت بولد بس كنت اضم نفسي لاني خايفه ع البيبي لانه مش وقته وزوجي مش عارف ايش يفعل لي بس يتصل للناس ولامه وابوه وهم بعاد عنا بمحافظه ثانيه ومش قادر ياخذني لاني مرره اتوجع ..وبالاخير بعد العذاب هذا كله قلت خلاص ماعد اقدر اتحمل الوجع فتحت ارجلي ودفعت بكل قوتي وسمعت صوت الماء ينفجر وخرج الماء كله وبعدها اتخيلوا عرفت انه ولاده ..يعني من كثر الجهل الي كان فيني ماكنت عارفه انه في ولاده مبكره ممكن تحصل باي شهر قبل التاسع وبعدها ارتحت من الضربات تماما ويلا لبست وغيرت وخرجت انا وزوجي ورحنا المشفى قده مغرب وامي لاقتني هي وابي واخوتي وتعذبت ثانيه بالمشفى وولدت ع يد ممرضه لانه مافي دكاتره وماكنا ندري انه ممكن يكون في استدعاء للدكتوره يعني كل شي فجاءه ماعرفنا نفكر حتى وبالاخير خرج ابني معرض خرجت يده بالبدايه وجلست نص ساعه معلقه للمن سودت مثل الفحمه رجعت وبعدها دفعت بكل قوتي وانا اتعذب خرج الحمدلله وارتحت كأني خلقت من جديد ...وطبعا خرج ميت ..المشفى بعيد عن البيت يجي ساعه والماء قد خرج كله بالبيت وكنت وانا بالطريق احس برعشه ببطني وحسيت انه خلاص بيموت وانا ابكي وهو ارتعش شويه ببطني وخلاص توقف عرفت انه مات كنت احس الدنيا مش واسعتني كنت اتمني اموت بهذيك اللحظه ..شعور صعب 😔 وطبعا لمن جابته امي لحضني كنت اشوف ملامح ابوه وعيونه مثل عيوني ويده السوداء الي انقطع عليها الدم لمن كنت اولد وابكي واصيح وقلبي يتقطع بس خلاص ماعد قدرت احضنه عشان مااتعلق فيه وهو بالاصل ميت ورايح 😔😔 كنت كل يوم ابكي وقلبي يوجع صح صابر وراضي بس غصب عني ازعل ويوجعني قلبي 💔 هذي قصتي بولدي البكر 👆 وبكتب قصتي ببنتي الي ولدتها قبل اربع ايام يتبع موضوع ااخر 👈 😔