بسم الله الرحمن الرحيم نزلت أمس قصه ولادتي الأولى ببكري واليوم مثل ما وعدتكم اكتب لكم قصه ولادتي الثانيه انا من بعد ولادتي الأولى صارت الدورة عندي ملخبطة لمدة عشر شهور اوقات تتقدم واوقات تتأخر واوقات تجي مرتين في الشهر المهم انها لاعبه لعب ومن بعدها انتظمت صارت تمام ومن صار عمر بنتي سنه ونص كنت أحاول افطمها من صدري لأنها كانت متعلقه فيني بقووة وكانو يقولو لي أن الرضاعه تعطي مانع ان فطمتيها بتحملي على طول وصحيح لما صارت عمرها سنه وعشر شهور جاتنا خبر وفاة جدتي وبعد ما انتهى العزاء كنت ابي اشوف التاريخ عشان اعرف كم يوم باقي ع الدورة الا وانصفع على وجهي انها متأخره اسبوع وانا مو حاسه وقلت لزوجي قال مثل كل مره متأخره وبعدين بتنزل وانا كنت حاسه اني حامل واصريت عليه ياخذلي تحليل حمل منزلي واخد وهو يقولي صدقيني مو حامل المهم رجعت البيت وهو جلس يتعشى وانا ماقدرت اصبر فتت على الحمام وعلى طول طلع لي خطين واضحين واطلع له وانا دموعي اربع اربع ما ابي احمل الحين حسيته فرحان بحملي لكن يقول مو فرحان بس الحمد لله رزق من الله ما اقدر اعترض وصار يواسيني ومسكين عطاني عشاه واكلته عنه هههه ورحت يوم ثاني المستشفى عشان اتأكد وانا خبرت اهلي وهو خبر اهله و مرت شهور الحمل بخير لكن كان وحامي غير من بدايه حملي لنهايته كانت كبدي تقلب وترجيع وتعب والثقل حسيت فيه من الشهر الثاني حتى الحركة حسيت فيها من الثاني ومع الحركة صرت احب حملي وتعلقت فيه وفي الشهر الرابع وسوت لي سونار وسألتها عن جنس البيبي قالت شنو تتوقعي قلت لها احساسي يقول انه ولد وطلع صحيح ولد ومن طلعت من المستشفى زوجي يظال عن الجنس قمت امزح معااه قلت له مو مبين كان مسكر على نفسه قال اجل اكيد بنت ههه قلت له لا الدكتوره تقول ولد ويطير من الفرح والحمد لله وصلت الشهر التاسع على خير وانتظر الولادة وكل مره اروح للدكتورة تقول هو انتي لسى ما ولدتي طفشت من وجهي 😂😂 ولما كشفت علي الا تسألني انتي متأكده ما تحسي بألم قلت لها لا الا تقول باين عندي الراس نازل الحوض خلاص يعني خلال يومين ثلاثه انتي تكوني ولدتي طبعا زوجي كان يحن علي يقولي امشي عشان تولدي بس انا كنت متكاسله خفت يصير لي مثل حملي الأولي واولد بكير كنت من الثامن امشي وشادة حيلي ويوم ثاني قالي زوجي بروح الكورنيش امشي تجين معاي قلت يلا منها امشي اشوي ومنها العب بنتي ورحت امشي اشوي والعبها اشوي ولما خلصت رحت لبيت اهلي وعلى الساعه ١٠ الليل صار يجيني ألم خفيف قلت يمكن هذا إلا يسمونه طلق كاذب لان لما صرت احسب مو منتظم لما جاء زوجي وبرجع البيت الا صار منتظم الألم وكان يجي كل ثمان دقايق بس كنت ساكته لان الألم خفيف مررره وعلى الساعه ثنتين خفت ان تكوون ولادة وانا ما ادري عن الدنيا وكان عندي احساس ان الماي بينزل علي في البيت وعلى ثنتين ونص بدا يشتد الألم وعرفت ان خلاص مافيه مزح الحين وبدت ساعه الصفر صرت اجلس زوجي من النوم وابد مو راضي يجلس يفتح عينه ويطالع فيني ويقلب الجهة الثانيه ويكمل نوم ( نومه ثقيل) لين جات الساعه ٣ وربع الا اسمع صوت شيء انفتح داخل بطني طلع كيس الجنين انفتح ونزل علي الماي هنا انا خلاص ارتبكت ما ادري ايش اسوي وصرت اصرخ عليه قوم خلاص قوم قوم قوم لان من ينزل الماي تولدي بسرعه وجلس مسكين مو مستوعب هو على طول اتصل لأمي وانا رحت ابدل ملابسي واطلع الا اخونا في الله يتدحن في الأرض راسه داير مو قادر يقووم ( بقيتك ياعبد المعين تعيني لقيتك ياعبد المعين تنعان) طبعا زوجي ما يتحمل هالسوالف ولادة ودم وهالخرابيط على طول راسه يفتر اشوي اشوي لين قام ولبس واخذ بنتي وركبها السيارة ومريت على امي مع الأذان طبعا من نزل الماي زاد الألم صار مو طبيعي وصار زوجي حتى إشارات المرور يتركها على مود نوصل المستشفى بسرعه ووصلنا المستشفى وبس نزلت احس خلاص ما اقدر أوقف قاست لي الدكتوره الا تقول ٧ سم على طول راح زوجي يخلص أوراق الدخول وركبوني قبل لا يخلصهم بعد طبعا انا بطني كان صغير مو باين علي اني حامل ابدا اول ما دخلت غرفة الولادة تسأل الممرضه انتي متأكده في الشهر التاسع 😂😂😂 المهم وقاست لي قالت خلاص ولادة اذا حسيتي بالم ادفعي وكل ما دفعت مو راضي يطلع وصرت اقول لها خلاص ما اقدر ابيك توسعين لي باموت وهي تقول انصحك بعدم التوسع وبعدين بتدعين لي اني ما وسعت لك وصارت تهز بطني عشان البيبي لا ينام ويساعدني في الدفع وهي تقولي طريقه الدفع غلط وصارت تعلمني كيف وبعدين كتمت نفسي ومره وحده دفعت دفعه قويه وطلع حبيبي ونور عيني الساعه ٤:٤٥ الصباح وحطوه على صدري وبعدين خذوه ينظفون ويلبسونه وانا صارت تنظفني وقالت البيبي وسع اشوي من نفسه وبنجتني عشان تجي الدكتوره تخيط ولما جات قالت الجرح مررره صغير ما انصحش بالخياط وانتي براحتش فاخترت انها ما تخيط وصرت اتصل لأمي وزوجي ابشرهم والحمد لله من قبل ومن بعد الحين صار عمر ابني شهرين وثلاث اسابيع الله يبارك لي فيه ويجعله من الصالحين والله يسهل على كل الحوامل ولادتهم يارب ويرزق كل محروم واسمحو لي اذا طولت عليكم