رجعت ع البيت من المشفى كلشي تمام الحمدلله في وجع بس متحملتو فرحانة بالبيبي وكنت حط معقم اكسرو بمي وبعد مافوت عالحمام كبو ع حالي من تحت بعدا نشف وحط عصارة بوفيدون هي معقم المهم مرقو ٤ ايام كنت تمام اليوم الخامس اجيت عم حط العصارة ولا نتبهت انو في غرز مو موجودين ومكانن احمر وغميق لجوا😥😥 والله وقت شفت المنظر دخت سندت حالي عالحيط لبست تيابي ورحت لمكاني ماني مستوعبي شو صاير لسا نطرت شوي بين ما راحت الدوخة ورجعت عالحمام قلت بدي اتٱكد لكون عم اتخيل قويت حالي وشفت فعلا في غرز فاتحة اتصلت مع دكتورتي قالتلي مامعقول اذا مريحة حالك مابيفتحو قلتلا مريحة حالي وفتحو قالتلي روح لعندا بكرا عالعيادة رحت لعندا فعلا طلعو نازلين الخيوط وما لتئم الجرح قالتلي بيلحمو لحالن اذا منتركن واذا بتحبي برجع بعملك كم غرزة هون بالعيادة بتخدير موضعي قلتلا اي بدي تخيطين مابدي يضلو هيك قالتلي بكرا بعملك ياهن رحت تاني يوم عقمتني وضربتني ابرة تخدير موضعي مكان مو فاتحة الخياطة حسيت روحي طلعت وبلشت تخيط بس حس بالخيط كيف تسحبو ماابشع هالشعور.. 😑قالتلي رجعي بعد اسبوع اتطمن ع الجرح رجعت عالبيت ضليت كم يوم ع نفس الدوا الاول مطهر وبعدو عصارة بس قلت ماعد اتطلع بس لحالي صرت حس بوخز مكان القطب مرق اسبوع رحت لعندا طلع كمان مو ملتئم الجرح...ياالله لي هيك عم يصير معي شو هالمصيبة..قالتلي الجرح مكانو ماعد يلحم لان تخيط اكتر من مرة صار لازمو قص وخياط من جديد بالمشفى وتحت تخدير عام هون الدنيا سودت بوجهي رحت بعد بومين عالمشفى خدرتني وشتغلت بالجرح صحيت بعدين عم حس سكاكين عم تغرز فيني صحيت ع وجع مو طبيعي والله العظيم وقت ولدت ماحسيت بهيك وجع يعني تعذبت اكتر من يلي عملو قيصرية وضليت بعدا مااقدر اتحرك من هدل القطب حطتلي ياهن هالمرة نوع قديم بيحطو للقيصرية نايلو ومابيفك لحالو الدكتورة لازم تفكو بس كتير كان بيوجع وشاددتو كتير حس روحي تطلع بس اتحرك رجعت بعد اسبوع لعندا نتطمن عالجرح وقت شافت الجرح وجها صار اصفر وخافت كتير قالتلي انا يئست معك ماعد يطلع بٱيدي شي مابعرف شو بدي اعملك هي ٣ مرة والخياطة ماعم تلحم في دكتور جراح زميلي خلي هوي يشوف الجرح وضعك غريب كتير انا مارضيت طلعت من عندا مزعوجة منا شقد عزبتني ومزعوجة من حالي انو ليش ماغيرتا من اول مرة فتحت الخياطة كان لازم شوف دكتورة تاني رحت لعند دكتورة غيرا شافت الجرح وحكيتلا وضعي عطتني مرمم واحد ضليت عليه ١٠ ايام لحم الجرح رحت لعندا قالتلي هلق الجرح تسكر بنقدر نشيل الخياط فكتلي الغرز وقالتلي ضلي حطي مرمم مشان المنطقة تقوا تعبت كتير وضليت هيك شي شهر والحمدلله بعدا وضعي تمام وهلق وقت بسمع بالحمل بتمنى الموت مع اني بحب الولاد وبشتهي يكون عندي بس صار عندي عقدة مو من الولادة من (الخياطة) وفي معلومة حبيت ضيفا وقت ولدت دكتورتي القديمة قالتلي ماتقعدي بمي وملح اول اسبوع لان بيفك الغرز وقريتا عالنت فعلا طلع مو منيح بس قريباتي كلن يقلولي لازم من اول يوم مي وملح وخياطي فتحت لان ماقعدت بمي وملح من وقت ولدت انتو شو رٱيكن؟؟ ووقت كانت تفتح الخياطة نفسيتي تعبت مااكل منيح كمان مرة قريتا انو قلة التغذية مابتخلي الجرح يلحم كمان ياريت تفيدوني وتنصحوني مشان المرة الجاي اخد احتياطي وبتمنى للجميع ولادة سهلة وموفقه....