عزيزتي المرأة الحامل .. "معـــا ضد هذة المعلومات " وأنا أمارس مهنتى كطبيب نسا و توليد و عقم طول هذه المده لم استطع ان أمحو كثير من المعتقدات و المعلومات و الاجابات الخاطئة عند السيدات الحوامل و التى يكون بعضها للاسف من الأطباء و معظمها من "الأم" أو "الحما" او الزوج ايضا ، و طبعا لا ننسي السيدة التى ولدت 3 مرات و تقول فى منتهى الثقة "لا يا دكتور بقى .. دة أنا والدة 3 مرات " واللى تقولى "أنا والدة 6 مرات" و تعتقد نفسها خبير أجنبي 😀 ولذلك انا تعمدت ان أكتب هذا البوست مدعوم بأحدث و أقوى المراجع العلمية و اليكم بعض الأمثلة : أم الزوج : لازم طبعا يا دكتور توقف الكالسيوم أحسن ما راس العيل تكبر! أنا: لا يا فندم، لازم يستمر الكالسيوم الى نهاية الحمل و يستمر الى نهاية الرضاعه ايضا و الأحسن و الأوفر و ألاكثر احتواءا على الفيتامينات هو كوب كبير من اللبن الذى يحتوى على كمية مناسبة من الكالسيوم و البروتين و فيتامين د أم الزوج: طب انت ليه يا دكتور مكتبتش لبنتى اوميجا ، اصل اختها كانت بتاخده من اول الحمل ؟ أنا: يا هانم مفيش مرجع علمى يوصى باعطاء اوميجا طالما هناك تغذية سليمة "مرفق فى الصور جزء من مرجع انجليزى يحدد ما تحتاجه المرأة الحامل الذى حدد الحديد و حمض الفوليك فقط مع الغذاء المثالى و عند اضافة اى شئ فهو غالبا من باب تقديم خدمة مثالية و ليس على اساس علمى و غالبا المرأة الحامل ينتابها الشك و الغيرة من السيدات الذين يأخذون اى حاجة تانية مع الحمل و لكن بعد هذا المستند العلمى ارجو المساعدة فى نشره بين الحوامل و خصوصا أنه من اقوى المراجع واذا كنت أنا أضيف بعض الفيتامين فأنا ألاحظ أن التغذية وحدها غير كافية عند هذة السيدة أم الزوج: لازم طبعا تنام على ظهرها و ترتاح أول الشهور و جوزها ميقربش منها .. أنا: "و اجاوب بحذر لأنها معلومة راسخة و ثابتة عند كل السيدات" .. لا يا هانم حياتها عادى فى أول الحمل و تمارس كل شئ عادى و تروح الشغل و لا مانع من العلاقة الزوجية " انا عارف انها لن تصدقنى و لكن بعد نشر لمرجع العلمى يمكن انا و السيدات الحامل نكون أقوى من أم الزوج 😑 المرجع يقول: أن العلاقة الزوجية ليست ضارة أثناء الحمل الا فى حالات : 1- نزيف أثناء الحمل 2- عدد اجهاض قبل و بعد 3- ولادة مبكرة قبل ذلك و يراعى بعد الشهر الخامس تفادى الوضع المألوف أثناء العلاقة لأنه يضغط على بطن الحامل و يمكن اى وضع اخر أم الزوج: ولكن طبعا لازم تزود الجماع فى التاسع عشان يحدث ولادة ؟ أنا: "أجاوب بحذرعشان بعض المعتقدات اللى زى دى جاية من الافلام "فيلم واحد من الناس" لما الدكتور قال معلومة خاطئة تماما ترسخت فى ذهن الناس ، بالعكس دة يمكن الجماع يعمل التهابات و يحدث ثقب فى الغشاء الأمينوسي و مرفق صورة من المرجع تؤكد ذلك ! أم الزوجة : طيب يا دكتور بنتى لازم ترتاح فى الشهر الثامن عالأقل لحسن يحصل ولادة مبكرة ؟ أنا: طبعا دة أيضا من الأخطاء الشائعة لأن الحركة تساعد على الولادة و لا مانع من بعض التمرينات أيضا لتى تساعد على الولادة السهلة الطبيعية" و تسألنى الزوجة سؤال شائع جدا .. لان كل حامل تنقل المعلومة للاخرى بسبب انها ذات خبره فى الحمل ! السؤال بيكون عن "حقنة الرئة" حقنة الرئة هى "كورتيزون" 1- ديكساميثاسون 2- ميتاميثاسون ولها جرعة معينة و أحسن وقت لهذة الجرعة عند 34 اسبوع وهناك اختلاف فى رأى العلماء من حيث تكرار الجرعة ، وهى تعطى للمريضة : 1- التى سبق لها الولادة المبكرة 2- الحامل بتوأم 3- او قبل الولاد القيصرية 4- او اى مريضة احتمال ان تلجأ الى الولادة القيصرية المكرة ولكن مثلا المريضة التى تقرر لها الولادة الطبيعية وليس فيها اى مشكلة او اى شئ يساعد على الولادة المبكرة ، لا داعى من حقنة الرئة ، أى ان الحقنة ليست روتين ! المريضة: أنا يا دكتور عندى حموضة جامدة اوى من أول الحمل والدة المريضة: يابنتى دة من شعر العيل ! أنا "و اشعر بالغضب" : و لكنى اجاوب بهدوء و اقول للمريضة دة من هرمونات الحمل لانها بتوسع الصمام اللى بين المعدة و المرئ و دة بيخلى الحمض اللى فى المعدة يطلع لفوق و خصوصا لما تكونى نايمة و كمان الحمل و الرحم كبير يضغط على المعدة و يخليها تصب الحموضة فى المرئ لفوق و ممكن تأخذى كل أدوية الحموضة اللى فى السوق دة أمان أم الزوج: قول لها يا دكتور بلاش تشرب قهوة خالص .. أنا: محاولا لارضاء ام الزوج أقول لها تمام يا هانم فعلا القهوة تزود الحموضة لكن بصفة عامة السيدة الحامل ممكن تشربها و يوجد صورة مرفقة من المرجع تؤكد كلامى من أن 2 كوب أو 3 من القهوة لا يسببوا اجهاض او عدم نمو للجنين و لكن القهوة تزود الحموضة مع الحامل و غير الحامل أم الزوجة : "بغيظ" طب قولها يا دكتور و هى نايمة تتقلب ازاى احسن الحبل السرى يلف حولين رقبة الجنين أنا: كويس اوى انكوا فتحتوا الموضوع دة .. اوجه كلامى للزوجة نامى زى ما انتى عايزة و ممكن على بطنك و لكن النوم عالجنب الشمال او اليمين خصوصا فى بدية الشهر السابع يزود الدم للجنين و حكاية انك الاول تقعدى و بعدين تتقلبي و بعدين تفردى رجلك عشان الحبل السرى ميلفش على رقبة الجنين دة كلام فاضى ولا يوجد مرجع علمى يقول ذلك "طبعا انا خايف من أم الزوج" الزوجة: انا يا دكتور هسمع كلامك .. طيب التطعيم ضد التيتانوس ؟ أنا: لن يضر فى الاسبوع العشرين و بعدين جرعة منشطة بعدها بشهر و يحمى المريضة و الطفل من تلوث الحبل السرى بعد الولادة و لكن اذا كانت الولادة فى مستشفى و معك دكتور اطفال فلا تخافى من عدم التطعيم أو حتى اذا فاتك التطعيم انا قمت بولادة ما يزيد عن 20 او 25 الف سيدة "احصائية الضرائب" بدون ما تاخد اى واحدة تطعيم التيتانوس و لكن لا يضر اخذ التطعيم الزوج: سمعنا يا دكتور ان أكل البلح و التمر أثناء الحمل يعمل طلق .. أنا : دة سؤال مهم ومن كثرة السؤال فى العيادة من عشرات السنين عملت بحث و قرأت عن التمر و الخلاصة ان التمر أثناء الحمل يضيف معناسيوم و سعرات حرارية و كالسيوم و يمنع الامساك و يمد الحامل بالحديد و لن يسبب الام الولادة و لكن الابحاث اوصت ان فى الشهر التاسع اذا اكلت المريضة 8 أو 10 بلحات فى اليوم سوف يجعل الولادة اسهل و يوسع عنق الرحم اسرع و لكن لا يسبب بداية الانقباض و كمان البلح فى الولادة يمنع النزيف و كانت اوامر المولى -عز وجل- للسيدة مريم منذ الاف السنين ان تتناول التمر بعد الولادة و اصبتت الابحاث سنة 2017 انه يمدها بسعرات تساعدها على الرضاعة كما انه يمنع النزيف و اعملى search على google واكتبي Is Dates safe during pregnancy? و شوفى النتائج . الزوجة: طيب انا لم ازيد فى الوزن اول 3 شهور الا 2 كيلو بس ! أنا: المعدل الطبيعى لسيدة حامل وزنها حوالى من 60 الى 70 كيلو أن تزيد 2 كيلو اول 3 اشهر و 5 فى ثانى 3 اشهر و 5 فى تالت 3 اشهر و اكثر من ذلك يعرضها لخطر الاصابة بسكر الحمل و زيادة وزن الجنين و عمل القيصرية ، يعنى المعدل الطبيعى طوال الحمل من 12 الى 14 كيلو تقريبا و الزيادة فى الوزن مع بداية الشهر الخامس قد تكون مؤشر لحدوث زيادة فى الضغط الزوجة: قول لزوجى يا دكتور يبطل السجاير أنا: طبعا ياريت و تستغل الفرصة وتبطلها تماما الزوج: لكن انا بدخن خارج البيت ! أنا: بالمناسبة رائحة النيكوتين فى فمك و ملابسك حتى لو دخنت خارج المنزل و هى خطر ليس فقط على الام وانما على الجنين ايضا و يسبب انسداد فى الشعب الهوائية اذا وصلت رائحة النيكوتين فى فمك الى الجنين برجاء نشر كل هذة المعلومات على صفحتك الشخصية و منشن لاى واحدة حامل تعرفيها عشان نساعد بعض نصحح المعلومات الخاطئة فى مجتمعنا و منشن لمامتك و حماتك واى حد قلك معلومة من المعلومات دى عشان احنا فى عصر لعلم مش عصر المعتقدات الخاطئة بسبب العادات والتقاليد الراسخة فى اذهان الكثير من الجيل اللى فات و الجيل الحالى للاسف .. منقول #استاذ_دكتور_أحمد_حشاد