العضوة: 743708 , 5 years ago

اجت العطلة … و رجع عالضيعة … اسبوعين مع امو ما حس فيهم من كتر ما كان مشتاقلها و هي كانو كان عندها عرس ..قتلتها الوحدة من غيرو .. بس من ناحية تانية اشتاق لنيسا الي كل يوم تحكيه .. خلت سلطانة تشم القصة من بعيييد و عرفت انو عندو مين بحياتو … خلصو الايام بسرعة و رجع حزم شناتيه … سلطانة : قول لشخطورة تدير بالها عليك .. سراج : ديري انتي بالك ع حالك .. رح ابعتلك مصاري كل اسبوع اصحك تشتغلي ها …اوعديني .. سلطانة : يالا روح ياالا لزق هون متل العلكة … باسها من راسها و طلع … ما قال لنيسا انو جايي خلاها مفااجأة …. كانت قاعدة مع سمر بالكافيتيريا تبع الجامعة عم تتشكى و تشتم .. نيسا : هو مو ع اساس ما بضيع الدروس .. اليوم في 3 حصص … ليش قال بدو يجي بكرا ما فهمت .. كان جاي وراها شافتو سمر عمللها هششت باصبعو .. سمر : يمكن مشغول هنيك .. نيسا : مشغول .. قال مشغوول قال .. اجا من اذنها من وراء و حكي .. سراج : اي مشغول .. شو بدك فيني.. نطت من مكانها مخضووضة … اول ما استوعبت ارتمت عليه عانقتو … غلل اصابعو بشعرها و طبع بوسة خفيفة بشفايفها .. سراج : اشتقت الك …. اجت تحكي سمعت صوت يناديها .. طارق : نيسا …. دورت وشها كان ابوها قدامها عم يشوفهم …. نيسا : بابا !!… طارق : كيف يومك .. نيسا : حلو .. شو عم تعمل هون .. طارق : نسيتي انو الي حصص بهاي الجامعة اجيت مشان الشغل .. كنت مع المدير و خبرني كتير اشياء … نيسا : شو خبرك .. كل شي قالو عني عم يفتري علي و انا بريئة.. طارق : اكيد اكيد .. عرفينا علي معك .. نيسا : رفيقي سراج .. هذا بابا .. سراج:تشرفنا .. طارق : فيكي تجيبيلي قنينة ماء ... حاسس حلقي جف .. نيسا :تمام .. هي راحت و هو غير نظراتو و ملامحو لسراج … سراج :بعتذر مشان الي شفتو احنا .. قطع كلامو طارق :لا .. و لا يهمك … انت نزوة و بتروح … شاف فيه من الثقة و التكبر الي يحكي فيهم .. طارق : انت بتعرف نيسا قديش بتصرف بيومين بس ….. اجا يحكي وقفو .. طارق : الي بيشتغل عليه ابوك و امك مع بعضهم لحتى تعيشو فيهم لشهر كامل هو سعر الكوافير تبعها … بلع ريقو عم يهدي حالو … سراج: بابا تعيش انت ..

العضوة: 743708 , 5 years ago

طارق : الله يرحمو .. يعني يتيم كمان .. مع هالظروف الصعبة قدرتك تفوت ع هيك جامعة بتشرحلي كمية الذكاء الي تتمتع فيها .. انك تكسب هيك منحة شي مو سهل … يعني ذكاءك مخولك تقدر تشوف المسافات و الفروقات الي بينك و بين نيسا .. سراج : اي عم شوف .. عم شوف انو ما لازم رد عليك .. لان في مرا تعبت بتربيتي … طارق : كلام كلاسيكي لكل حدا فاشل ما عندو مصاري .. يحكيلك عالاخلاق مشان يعلي شأنو .. بس بنتي الاخلاق ما بتوكلها خبز ... قبل ما يخلص جملتو اجت نيسا بايديها ماء .. طارق : مافي داعي احكي اكتر انت فهمتني .. سراج :كتير فهمت .. نيسا : شو فهم ... طارق : و لاشي بابا … كنا عم نعمل درس بقياس المسافات … قرب عليها و باسها من جبينها .. طارق : كوني بخير . نيسا :و انت…باي بابا… هو راح و هي شافت بسراج كيف مغمض عيونو و مرتكز براسو عالحيط .. نيسا : سراح شو صار ..اذا زعجك بشي احكيلي . .. سراج : لا .. نيسا : شو في لكان.. سراج: بالبلور تبعي كان في ضباب … هو مسح هذاك الضباب مشان اقدر شوف بوضوح الحقيقة … نيسا : شو يعني .. ليش تحكي بالالغاز … سراج : و لاشي نيسا حكينا حكي عادي .. قالي انو معجب بذكائي .. نيسا : عنجد … سراج :اها … نيسا : تفاهمتو مع بعض يعني .. سراج : كتير .. نيسا : ما عم تستغباني ما … سراج : لا .. نيسا : هو ابي ممكن تحسو متعالي شوي .. بس ضحك باستهزاء .. . سراج: شوي! نيسا : طيب كتير بس مانو سيء .. سراج : اها .. مانو سيء .. قربت عليه و حضنتو .. ربطت ايديها بظهرو و راسها ع صدرو .. نيسا : فرحت انكم تعرفتو .. باسها من راسها .. سراج : و انا …

العضوة: 743708 , 5 years ago

اول ما دخل عالسكن .. رمى كل حملو عالتخت …. عم يحس نفسو مرهقة .. كانو كبر بغير سنو شو قسيت عليه هالدنيا ...لهلا مش حابة تضحكلو .. اخذ تلفونو و اتصل بامو .. سراج : سلطانة السلطانات .. شو عم تعملي سلطانة : كنت بستناك تتصل وينك لهلا … سراج : شكلك زهقتي لحالك .. بتتذكري عم يوسف البواب الي حكيتلك عنو هون قالي بدو يستحسن .. شو قولتك برشحلو ياكي … سلطانة : قولتي انو الشحاطة ما تقدر تخترق التلفون بس رح تلاقيها مستنيتك عند الباب اول ما تجي .. ضحك و مع ضحكتو تعبت عيونو دمووع … سلطانة : سراج … شو هاي النبرة ابني .. انت فيك شي احكي لامك .. كتم الغصة الي بحلقو عم يحاول يغير نبرتو .. سراج : مشتقلك بس … بدي حط راسي ع ركبتك و تلعبيلي بشعري .. سلطانة : انت مارح تكبر .. بدك تفضحني و انا عم قول ع حالي باعتة رجال .. سراج : كبرت .. حتى اكبر من عمري صدقيني… سلطانة : نبرتك لساها حازة بقلبي .. لو انك مخبي شي و مابدك تقلي ما برضي عليك … ضغط ع شفايفوو عم يحاول يمزح و يضحك … آخر شي بدو ياه يش

العضوة: 743708 , 5 years ago

غل بالها عليه سراج : برايي انتي كبرتي بالعمر و صرتي تخرفي .. هاي اثار الشيخوخة .. راحت عليكي … سلطانة :ولاااااا … انت اشتقت للقتلة من عندي اكتر مني شكلك .. لحمك بحكك .. خلص حكي معها و ما تركها غير لما ضحكها و مسح كل شك داخلها … سكر التلفون و وقف عند الشباك … عم يسترجع كل لحظة و كل ضحكة لنيسا …لحظات رسمت ع وشو ابتسامة بس كانت مخلطة بقهر … ايام كتيرة عدت عم يتجاهل مكالماتها … بالجامعة بارد معها و ماعم يحكي كتير .. كان مارق من الكافيتيرا بدو يشتري سيجارة شافها جاية من بعيييد … اجا يغير طريقو بس شافتو … اجت تركض لعندو .. نيسا :سراج .. اتصلت فيك الف مرة .. ويينك.. سراج : ما شفت … نيسا :طيب ليش انت ما اتصلت فيني … سراج : كنت بدرس ما لقيت وقت .. نيسا : فهمت .. بدك نروح نقعد نشرب قهوة مع بعض … سراج : بدي فووت عالدرس … نيسا : لسة في ساعة … سراج :اتفقت مع سلييم بدي فهمو شي … يالا بتركك … هو راح و هي دموعها نزلو …. ضلت واقفة بمكانها كتير لحتى شافتها سمر اجت لعندها … سمر :نيسو … شو عم تعملي هون … انت بكياانة شي .. عملتلها براسها لا … سمر :تعي اقعدي هون تعي … خلتها تقعد عالطااولة و عطتها ماء تشرب .. سمر : شو في احكيلي … نيسا :هو ماعاد يحبني .. سمر :مين .. سراج ؟ .. . نيسا : اي …ماعم يطيقني صاير .. سمر : ما بظن .. كان مع سلييم من شوي .. و حسيتو مو ع بعضو هو كمان .. برايي في شي صاير معو … نيسا : متل شو .. عملتلها بكتافها ما بعرف سمر : انتي لا تزعلي .. رح حاول خلي سليم يعرف منو شو في .. من هذاك اليوم ما رجعت اتصلت فيه … كل ليلة تنام ماسكة التلفون تستنى يتصل فيها … اي رنة اي مسج تنط مفكرتها منو و تصير تبكي لما تشوفها من حدا تاني

العضوة: 743708 , 5 years ago

بقاعة كرة السلة .. كان سليم ماسك سهم معبى ماء و اجا بدو يرش طلاب رابطهم عالكرسي .. لحد ما وقفلو ايديه سراج ..و راح عم يفكلهم الحبال … سليم :خلينا نعمل اتفاقية .. انا بطلت اتنمر عليك و عقدت معك هدنة رفعت فيها راية السلام بس هذا مو يعني تدخل بالتسلاية تبعي … سراج :الناس مو تسلاية سليم … سليم : بالنسبة الك .... سراج : كون منيح سليم … سليم : خطاب التعامل مع الغير تبع كل يوم حافظو .. انا هيك .. انا سيء ... سراج : انت مانك سيء ... انت بدك تعمل مشاكل و تلفت نظر ابوك لحتى يهتم فيك … كلامو خلاه يجن مسكو من خنااقو سليم : انت شو عم تحكي … بعدلو ايديه عن خنااقو… سراج : مارح يجي سليم .. رح يحل المشكلة بتلفون متل العادة … مهما عملت مارح يجي … شاف فيه شوي … تمالك حالو و اجا طالع …وقفو بكلامو .. سراج : انت اقوى من انك تحتاجو بحيااتك … التفت لعندو .. سليم : قول هالحكي لحالك … بدل ما تشفق علي … اشفق ع حالك … عم تعذب حالك و معذب معك البنت … انت آخر واحد يعطيني دروس … دفشو بايديه هو راح و سراج اخذ الكرة من الارض … رماها من بعيد اجت بالسلة … غلغل اصابعو وسط شعرو و صرخ انعاد الصدى بالقاعة … بعد يومين شاف سليم قاعد بالكافيتيريا راح لعندو … سراج:راية السلام مرة ثانية ؟ … سليم : مافي حرب بيننا … سراج : في زعل .. سليم : لا مافي .. سراج : لا في ..ماكان لازم اضغط ع جرحك .. سليم : ماعندي جروح .. التفت للبنت الي جاية … سليم : هذييك الكرش تبعك و الا عملتي خصر من قداام …

العضوة: 743708 , 5 years ago

شافت فيه ع جنب و راحت مزعوجة .. سراج : سليييم !! بكفي .. سليم : لما ترجع تحكي مع نيسا ببقبل نصايحك .. اجت سمر باست سليم من خدو و قعدت وسطهم … سمر : شو عامل سراج .. سراج : عايش .. شاف نيسا جاية من بعييد قام .. سراج : فايت عالدرس .. بترككم هلا.. سليم : اهرب اهرب .. كان عم يمشي لما حس بايديها وقفتو لمستها خلتو يغمض عيونو انو مابدو يخوض معها باي حوار ابدا بالزور ماسك حالو .. .. نيسا : سراج !.. سراج : نعم .. نيسا : انا بس .. كان بدي قلك .. مهمت و ما عرفت تحكي .. عم تلعب باصابعها بتوتر و لسانها انربط … سراج : خليني سهل عليكي .. نيسا احنا مختلفين لدرجة عالمك و عالمي معكوسين و مستحيل نقدر نلتقي .. نيسا : ش .. شو يعني هالحكي .. سراج : انا ما بدي ياكي نيسا .. بظن مافيني كون واضح و صريح اكتر …. شهقت مع كلمتو .… ايديها رجفت .... التفتت تروح بس وقفت و ردت رجعت لعندو … نيسا : تعرف الناس الي من عالمك شو مفكرين … مفكرين لانو عنا مصاري يعني ماعنا مشاعر و ما بنحس … اخذت شنطتها و طالعت منها علبة صغيرة … نيسا : مشان ما اجرح كرامتك صرلي ايام بدور ع شي يكون عندو قيمة معنوية و ماعندو قيمة مادية … مشان شو .. لان ما بدي ياك تنجرح … مسكتلو ايديه و حطلو العلبة بكف ايدو .. نيسا : كل سنة و انت بخير …نصيحة للسنوات الجاية ما تدعس ع قلوب تانية متل ما دعست ع قلبي …. قالت كلامها و راحت تاركتو مصدووم شارد بالعلبة …. من التعب حتى انو نسي انو اليوم عيد ميلادو .... راح قعد بزاوية وراء الجامعة و فتح العلبة … كان فيها عقد خشبي مكتوب فيه سلطانة

العضوة: 743708 , 5 years ago

و عاللجهة الثانية مكتوب فخامة الاميرة نيسو .. ضحك ع هبلها وقلبو عصر بنفس الوقت … اخذ نفس من اعمااقو عم يحكي حاالو سراج : يااا الله …لسة ما خلص امتحاني؟.. رجع عالسكن اتصل بامو كانت عم تعايدو و تغنيلو و هو عم يحاول يضحك بالزورر … سكر الخط و حط مخدة فوق راسو يدو يمنع التفكيير الي ثاقب عقلو . حتي اجاه مسج .. فتح لقاه سليم باعتلو موقع و كاتبلو لازم تجي … حمل حالو و طلع …. بمطعم وين كانت رح تعمل حفلة صغيرة لعيد ميلادو … طلعت فوق الطاولة عم ترقص ..و سليم عم يقنعها تنزل …. سليم : نيسو .. بكفي خلص رقصتي بكفي هالقد … نيسا : شو بكفي .. احنا لسة بالبداية … نزلت راحت وين البار … نيسا : صبلي كمان صبلي . سليم :بكفي تشربي … نيسا : في حكة هيك باذني قولتك في شي حشرة دخلت فيها و الا عنجد سليم عم ينصحني ما اشرب …؟؟؟ سليم : الشرب للتسلاية مو لحتى تخمدي وجعك … لان لا الشرب و لا الرقص رح يخمدووه .... ماتت ضحك ع كلامو و عم تضرب ع رجلها …. نيسا : بالله عيد شو قلت بدي اكتبها بمجلة الاقوال المأثوورة … راحت لعند كيكة القاتو الي عاملتها و غرست فيها ايديها … نيسا : اشتمني سليم… قلي يا غبية عم تتعلمي وصفاات … و عم تعمليلو كيكة اقتصادية باقل كلفة ممكنة….انت تعرف قديش من كيكة عملت لحتى زبطت معي … تحيا الكيكات المنزلية الصحية … وقفت و مسكت الكيكة حاطتها جنب راسها عم تعمل اشهار … نيسا : هل تريد كيكة باقل الاسعار ….افخم و اروع مذاق في المداار … اليكم كيكة نيسا للافطااار ..للحجز و الطلب يرجى الاتصال … سليم : لك شو عم تعملي انزلي.. .. اخذت الكيكة و طبعتلو ياها بوشو … نيسا : خنقتني بنصاايحك … روح انت كمان صرت ممل .. مابدي ياك..

العضوة: 743708 , 5 years ago

.. مابدي ياك.. مسح الكاتو من وشو و استسلم قعد بس يطلع فيها كيف عم ترقص من غير موسيقى … اول ما دخل المطعم و شافها كيف جانة ما قدر يصدق … اجاه سليم .. سليم : لا تستغرب انت الي وصلتها لهاي الحالة …. سكت ما لقى شو يقول لسة ما استوعب .. سليم :انا رايح .. هي عندك هلا .. عملو براسو اي … نيسا : شوفو مين اجا .... بس تأخرت احنا قطعنا الكيكة و خلصنا … مدلها ايديه مشان تنزل .. سراج: تعي … ضربتلو ايديه… نيسا : لسة ما خلصت رقص …. سراج :تعي نرقص مع بعض .. نيسا : اطلع انت لعندي … سراج : هاتي ايدك طلعيني … هي مدت ايديها و هو حملها نزلها و هي عم تتخبط بدها تنزل … نيسا :اتركنيي .. قلتلك بدي ارقص فووق… سراج : اهدي شو رأيك نرقص ببيتك … نيسا : لسة ما خلص عيد ميلادك … سراج : انا معك … شو بدك بعيد ميلادي … نيسا : انت تركتني … انت اناني … بسرعة انقلبت و صارت تبكي و تشهق … سراج : انا آسف .. اهدي .. نيسا : بعد عني لا تلمسني … سراج : خليني آخذك ع بيتك … حملها و قال للبواب يوقفلهم تاكسي … نيسا : لا ما بروح قبل ما ننفخ عالشمعات… سراح :رح ننفخ بالبيت .. نيسا : عنا شمع ؟… سراج : اي عنا…. نيسا : و بدنا نتمنى ما … سراج : اهاا نيسا : بدي اتمنى اني فيق ما اعرفك ... بدي انسى كل شي و امسح كل شي من ذاكرتي … ركبها بالتاكسي بالزور … كل الطريق عم تبكي لحتى نامت … وصلو قدام بيتها دفع للتاكسي اجرتو و حملها .. الهواء البارد خلاها تفتح عيونها .. نيسا : سراج انت اجيت … سراج : اها … وين مفاتيح البيت … نيسا : بالشنطة … سراج : و الشنطة وين … نيسا : الشنطة .. سراج : اي الشنطة .. نيسا : ما بعرف … سراج : كيف بدنا ندخل … ماتتت ضحك

العضوة: 743708 , 5 years ago

نيسا :نزلني انا بنام بهذيك الزاوية .... طيب فيني نام هون كمان …. و هون مكاان حلو جنب الزريعات …احسن شي اتسطح قدام الكاراج… خلاها توقف و مسكلها خدودها عم يحاول يفيقها … سراج :صحصحي معي شوي … مافي طريقة نفتح الباب فيها؟ … نيسا : نعساانة .. بدي نام … سراج : ركزي معي شوي … نيسا : سراج .. انا بحبك كتير .. و انت بتحبني ؟ .. سراج : اي بحبك .. . هلا احكيني كيف بنقدر نفتح الباب .… نيسا : خليني اتسطح هون .. سراج : نيييييييسا … انفجرت بكي .. نيسا : انت عم تصرخ علي … سراج :لا ما عم بصرخ .. نيسا : لا انت عم تعيط علي…. ليش انا شو عملتلك انا .. سراج : خلص لا تبكي انا آسف … نيسا : لا انت تركتني انت ما بتحبني .. ليش تركتني .. انت كذاب انت ما عدت حبيتني … اخذت الزرييعة الي جنب الباب و ضربتها عالارض كسرتها … بلحظة تذكر انو عندو نسخة من مفتاحها عطتو ياها … حط ايديه بجيابو عم يدعي يكون حطو مع مفاتيحو … .. دور بيناتهم .. لما لقاه تنفس … اخذو بسرعة و فتح الباب و خلاها تفوووت … حملها ع طول عالحمااام و فتح فوقها الماء … نيسا : اتركني ما بدي اتحمم … سراج : خليكي هون … راح جابلها ثياب و رجع لقاها متل ما تركها .. سراج : يالا تعي …. اخذ المنشفة حطها بشعرها و عم ينزعلها ثيايها … غيرلها ياهم … و حطها عالسرييير ع طول غمضت عيونها … طول الليل ما ناام عم يطلع فيها و قلبو يعصر وسط ضلوعو … الصبح فتحت عيونها … مع وجع

العضوة: 743708 , 5 years ago

راسها الي سيطر عليها .. نيسا : اااي يا امي راسي … حطت ايدها بالدرج تدور ع مسكن اول ما طالعت عيونها شافتو قداامها … نيسا : سراج … سراج : صباح الخير … صرتي احسن؟ … بلشت تتذكر خيالات من ليلة مباارح و عرفت حالها شو خبصت … قرب عليها و حط ايديه بعد خصلة كانت نازلة ع عيونها … سراج : احسن؟ نيسا : منيحة .. خلص فيك تروح … سراج : بدي ضل .. نيسا : ليش مو قلتلي ما بدي ياكي .. شهقت و بلشت تبكي … مسكها عندو و حضنها بقوة … سراج : بدي ياكي … بدي ياكي اكتر من اي حدا … . نيسا : ليش لكان تركتني شو عملتلك.. سراج : انا آسف .. حط ايديه عم يمسحلها دموعها … سراج : بقلبي و بعقلي لو تشوفي شو عاملة فيهم.. نيسا : انت كذاب انت ما بتحبني .. حط ايديه بخدودها عم يخليها تشوف بعيونو … سراج : و حياة عيونك بحبك .. نيسا : بس تركتني .. سراج: مارح اتركك مرة تانية .. حطت راسها بصدرو و بلشت تبكي بالصوت .. سراج : انا آسف .. الله يلعنني منيح هيك .. بس لا تبكي حقك علي . شو ما قال ما رضيت تسكت … تركها تبكي لحتى شبعت كل قميصو عبتلو ياه دمووع فجاة سكتت … سراج : خلصتي ؟ .. . نيسا : اي سراج : ليش كل هالبكي .. نيسا : كنت بكيت اكتر بس راسي وجعني ... رفعت راسها من صدرو عم تشوف فيه .. نيسا : بتعرف اني لازم ازعل و مالازم سامحك بسهولة ع تركك الي بس انا ماعندي هديك القوة لضل من غيرك اكتر لهيك بدي سامحك و ما بدي بنفس الوقت … سراج: بعرف لان قلبك ما في منو ما بيحمل الضغينة و الزعل .…

العضوة: 743708 , 5 years ago

نيسا : مارح تضحك علي بكلمتين ...بدي طريقة اني ما سامحك بس كمان ما ببعد عنك .. بدي حل … لازم تحس بقيمتي … سراج : امممم … شو رأيك تسامحيني هالمرة انا تربيت و مارح عيدها .. … نيسا :هيك بسهولة يعني .. سراج :هالمرة بس … نيسا :مو قبل ما تحس بغلطك و تفهم قيمتي و تصير انت الي تركض ورايي .. لازم تتشنطط مشاني … سراج: خلص رح صير اركض وراكي ..و اتشنطط .. دورت راسها عم تسمح انفها بقميصو .. سراج: امسحي امسحي .... نيسا : رح سامحك بس لان عيد ميلادك … حط ايديه فرجاها العقد برقبتو … سراج :رح خليه عندي ع طوول .. ابتسمت .. نيسا : انت لبستو … سراج : اي هيك ها فرجيني هذيك الضحكة .. نيسا : لا تشيلو من رقبتك .. سراج : ماا بشيلو .. الايام عدت عم تتسابق مع بعضها … ما حسو كيف خلصت السنة … يوم النتيجة .. شاف اسمو ع اول القائمات كلهم … اخذ نفس من اعماقو .. بس راح يدور ع نيسا لقاها مو جايبة المعدل …. نفخ معصب … شاف سليم و سمر و لا واحد فيهم جايب كمان .. اخذ التلفون و اتصل بنيسا ماعم ترد عليه … اكيد مارح تقوم هلا لان مبارح كل الليل سهرو برا … اخذ حالو و راح لعندها …. لقاها نايمة و لابسة ثياب نوم كانو مو لابسة شي… بلع ريقو يحكي .. سراج :نيسا .. قومي .. قومي شوفي معدلك الزقت … فتحت عين بعين .. نيسا : قديش .. . سراج : 43 % … نيسا :كتير منيح ماني بعيدة عالمعدل … سراج : بالله فرحانة بحالك … قومي رح نبلش ندرس انت و ياكي بدك تنجحي … نيسا : تماام … لسة شهرين رح ندرس .. بدي نام هلا … مسكتلو ايديه عم تدفعو لعندها … نيسا : تعى نام معي … اتسطح جمبها عانقتو و حطت راسها بصدرو .. سراج : شو رأيك تلبسي شي فوقك … نيسا : تؤ .. سراج : بس هيك ماب.. سكتتو تحكي .. نيسا : انت كيف قدرت تفيق بكير لك مبارح رجعنا وش الصبح عالبيت.. سراج : متعود ... 4 ساعات بكفوني نوم .. نيسا : انا 4 ساعات بعملهم قيلولة بعد ما نام 12 ساعة …

العضوة: 743708 , 5 years ago

سراج : نامي لكان … شافها غمضت عيونها و رجعت نامت كان شيىا لم يكن .. ما حس كيف غفي معها …. فتح عيونو مع حكة انفو لما كان شعرها عم يدغدغوو … نيسا : صبااحو حبيبي .. و الا مساؤو احسن .. سراج :قديش الساعة … نيسا : 5 … قام مخضوض … سراج : شوو … نيسا : شو بك .. سراج : ليش ما فيقتيني .. نيسا : لسة هلا فقت قبلك ب 5 دقائق … سراج :تأخرت بدي جهز غراضي .. بتعرفي بكرا راجع عالضيعة بكير … نيسا : تمام رح تجمعهم … خليني اشبع منك .. مو مصدقة رح ضل بعيدة عنك شهر كامل… و لو ما التربص الي رح نعملو بالمشفى كنت 3 اشهر ما بشوفك … سراج :لا تذكريني .. ما بعرف رح اجي اشتغل و الا اعمل تربص و الا اهتم بدراستك انتي الي ضيعيتيها مشان ما تخسري السنة… نيسا : هذا الي هامك .. مو هامك انك رح تبعد عني.. حتى يمكن رح تخلص مني و مارح تشتقلي .. سراج : رح اشتقلك .. بس اشتقت كمان لامي و للضيعة .. عندي حياة تانية هنيك كمان …يالا خليني قوم … نيسا : تمام اتصل فيني .. بااسها من انفها و قام غسل وشو و طلع … الصبح حمل كل الغراض … عم يركض بدو يلحق الباص … عم ستصل فيها و ما بترد … ع اساس بدها تجي تودعو … بس تأخرت و الباص رح تمشي … اجا يركب … وقفو صوت الزمووور تبع سيارة سلييم … اجا هو و سمر و نيسا … سراج: شو عم يصير شو جابكم انتو … سليم : نحنا جايين معك .. سراج:بالله شو … نزلت نيسا من السيارة و مس

العضوة: 743708 , 5 years ago

كتو من ايدو .. نيسا : يالا تعى .. سراج: ليش جايين .. نيسا : بدنا نعطل هنيك .. قال المناظر كتير حلوة و في شالالات هنيك … سلييم : يالا اركب بنحكي بالسيارة … سراج: مارح تجو لاي مكان … سمر : لا تكون ممل … نيسا : حبيبي مشاني… عملتلو عيون تترجى و باستو من خدو .. نفخ و تنهد .. سراج : بشرط .. الي بقولو انا بصير … سليم : ما بوعدك .. سراج: ماحدا بيجي لكان … دفشتو سمر ليواافق … سليم : تمام بحاول … عملو براسو لا .. سليم : خلص يوعدك يالا … سراج : منييح .. اول شي بدكم تغيرو لبسكم .. سليم : و ليش .. سراج:بقصد مشان سمر و نيسا لما نوصل هنيك رح تفهمو ليش … بدكم تلبسو شي مغطى اكتر .. سمر :خلص تمام .. بتوقفولنا بالطريق بنغير ثيابنا … سليم : يالا اركب .. سراج:اطلع احمل الغراض معي .. قعد هو جنب سليم و البنات من وراء ..كل الطريق كان يعيديلهم و يحفظهم نفس الحكي … سليم : فهمنا سراج … كلنا نجحنا بمعدلات منيحة … و كلنا عم نعيش مع اهلنا و البنات اجو هون بعد ما اخذنا اذن و طمنننا اهلهم … و بعمرنا ما شربنا و لا سهرنا بالبارات … نيسا : بس قولتك حماتي بتكرهني اذا عرفت لاني شاطرة و لا بعيش مع اهلي… سراج : امي قلبها طيب رح تقبلك متل ما انتي .. بس ما بدي اشغللها بالها علي بدي ياها يكون بالها مرتاح …حياتكم بالنسبة الها غريية…و رح ينشغل بالها .. سمر: كتير حلوة علاقتك بامك … شاف بسلييم كيف مزعوج .. حب يغير الموضوع… سراج :ايه .. حطلنا موسيقى سليم .. سمر : اي و افتحلنا السقف … لما وصلو كانو البنات نايمين ع بعضهم ورااء و سراج يغفى و يقوم شوي يحكي مع سلييم .. سليم : بتعرف الطريق من هون ما .. سراج : اي بدك تكمل ع طول و تدور عاليسار … نييسا يالا قومي وصلنا … سمر و انتي امسحي الروج شوي .… فتحو عيونهم عم ينظمو شعرههم و حالتهم ... سمر :اوف رقبتي وجعتني ... سليم : قومو قومو تاركيني لحالي .. ع اساس بدنا نتناوب عالسواقة ..خليتوها براسي انا .. مع دخلتهم للحي كل الانظاار توجهت ع السيارة … خاصة انو اول مرة يشوفو هيك سيارة بحياتهم … وقفو قدام السوبرماركت … اشترو نصو و طلعو .. سراج :ماكان في داعي لكل هالشي الي اشتريتوه … سليم : ليش الكل عم يطلع علينا حاسس حالي جاي من المريخ …

العضوة: 743708 , 5 years ago

😙

العضوة: 743708 , 5 years ago

سراج: هن شايفينكم هيك اصلا … وصلو عالبيت هو وقف السيارة و كل الصغار التفو حوالين السيارة عم يمسوها … و كل الجيران طلعو من بيوتهم و عم يطلعو عليهم من الابواب … سمر : نيسو تعي امسكي ايدي خفت … نيسا : مافهمت ليس الكل مركز معنا حتى لبسنا و غيرناه … سراج : سلطااانتي .. افتحي الباب انا اجيت … قامت تركض من مكانها فتحت الباب سلطانة : ابني … عانقتو ….شردت لما شافت الي جايين معو .. سراج:هدول رفقاتي امي .. اجو يتعرفو عليكي … سلطانة : عنجد .. اهلين و سهلين …تفضلو تفضلو .. دخلو لجوا و قعدو بالصالون .. نيسا :اهلين انا اسمي نيسا … شافتها من فوق لتحت .. و شافت بسراج و فهمت انو هاي هي الشخطورة تبعو .. سلطانة :هممم انتي تبع التلفون … خجلت نيسا .. و شها صار الوان .. سمر :و انا سمر .. سليم : و انا سليم … سلطانة : نورتو كلكم .. قرصت سراج عم تهمس باذنو .. سلطانة : ليش ما خبرتني كنت حضرتلهم شي .. هيك تخليني بكسفة الوش .. سليم : مافي داعي ابدا .. سراج: لزقو فيني باخر لحظة و انا ما كنت بعرف … سلطانة : لكان خليني روح اعمللهم احلى طبخات المنطقة تذوقوها بعرفكم تعبانين من السفر و جوعانين … نيسا :لا تعبي حالك عنجد مافي داعي .. سراج :لا تعبو انتم حالكم معها مهما قلتو رح تقوم و تطبخ ..خليني روح اشتريلك الغراض .. نيسا :خذني معك .. سراح: تعي .. قامت كتبتلو ورقة طويلة … اجيت تعطيه مصاري قاللها عندي .. طلع مع نيسا عم يفرجيها المكان و الماشي و الجاي مركز معهم … نيسا : لكان هون كبرت .. . سراج: اها ..