العضوة: 127492 , 7 years ago

@user-119894 امين يارب والحمد الله على سلامتك

العضوة: 119894 , 7 years ago

قصة ولادتي ... اولا انا ولدت في امريكا بحكم اني طالبه حاليا عندهم .. الحمدلله ولدت قبل ٣ ايام .. طبعا قبل نهاية شهري لان معي سكر حمل وقالوا لازم تولدين قبل نهاية اسبوع ٤٠ فولودوني في الاسبوع ٣٩ نهايته .. بالنسبه لولادتي و لاني ولدت مو في موعدي فكانت صعبه والحمدلله .. انا بكريه و رحت لهم والرحم مقفل تماما و عطوني تحاميل تفتح الرحم و جلست يوم كامل من ١٠ الصبح ل ١٠ الصبح اليوم اللي بعده وخلال هالساعات عطوني مرتين تحاميل و مافتح الا ٢ سانتي .. وبعدها باليوم الثاني قالوا لي بنعطيك محلول الطلق الصناعي بالوريد .. قلت طيب و بدأو اعطوني اياه و جلست عليه لحد اليوم الثالث من الساعه ١٢ باليوم الثاني لحد الساعه ١٢ باليوم الثالث .. طبعا هنا انا ماتحملت الم الطلق الصناعي ممممت بشكل غير طبيعي و بديت اصارخ واقول ابي ابرة الظهر و جوو اعطوني اياها و بعد ما اخذتها ماعاد حسيت بالالم ابدا و جنبي جهاز فيه زر .. اذا حسيت بالالم اضغط ع الزر و يزيد جرعه المخدر بالابره و يروح الالم .. جلست عليها مثل ماقلت لكم يوم كامل و بعدين بالفجر الساعه ٢ جت الدكتوره وكشفت عالتوسع و لقته ٤ سانتي هنا انا انهرت نفسيا قالت لي بفك موية راس الجنين .. بيعطي توسع اكثر .. قلت طيب .. و فكته لي وراحت ونزل المويا كله .. و بعدها كل ساعتين تجي تشيك و تلاقيه يفتح تدريجي لحد ماصارت الساعه ٣ العصر وقالت لي ٨ سانتي قلت الحمدلله يارررب و بعدها انتظرت لحد ما فتح ١٠ ع الساعه ٧ المغرب و بعدها جت الدكتوره و الممرضات قالوا خلاص الحين وقت الدفع ..

العضوة: 119894 , 7 years ago

وجربوا معي ادفع و قالوا دفعك خفيف و قفلوا مفعول ابرة الظهر وقالوا الحين مافيه اي مخدر ولا مسكن علشان تدفعين .. و فعلا راح المفعول و حسيت بكل الام الطلق الصناعي .. وقالوا يلا ادفعي و جلست ادفع و يقولون وقفي وهكذا .. طبعا الالم جنني صرت اتحرك بالسرير واصارخ ويضرب كله بظهري حاررر جدا و ايضا تحت صدري على طول بداية بطني لدرجه ما اقدر اضغط بالدفع وجلست اصرخ عليهم و اطلب مسكن ومحد رضى يعطيني شي و انا احس بالراس تحت يعني احس بشي واقف بين رجولي ويقولون لي ادفعي نشوف شعر الراس احنا وانا احاول ادفع واحاول وما طلع واقول للدكتوره قصصي بسسرعه قصي وهي ولا كأنها تسمع و اترجاها تقص وماترد علي و دموعي بدت تصب و شوي ابوس يدينهم ابي مسكن و ماسكيني بيديني ممرضات واسحب يديني منهم وهم ماسكينها احس قيودوني وثنتين ماسكات رجولي فاتحينها لاني اسكرها واتحرك وانط بالسرير واخر شي صاروا يمسكوني يثبتوني وانا انهررررت و طلبت عمليه .. قلت انا ابي عمليه بسسرعه الحين وجلست العن فيهم وهم لما طلبت العمليه جلسوا يسألوني بهدوء .. متأكده تبغين عمليه؟ قلت ايه ايه ابي عمليه خلاص .. قالوا انتي باقي شوي وتولدين خلاص بس ساعدينا بالدفع .. قلت ابي عمليه ومارد عليهم .. و طلعت الدكتوره قالت بروح اجيب الاوراق للعمليه توقعين عليها . وخلتني مع الممرضات وهم كل شي يقولون لي ادفعي .. وانا ادفع وماطلع الجنين

العضوة: 119894 , 7 years ago

.. و بعدها صررخخت باعلى شي عندي وقلت ودوني عمليه ولا حطولي مسكن و لا قصوني بسسسرعه الا دخل علي طاقم و ش كثرهم .. الغرفه امتلت ممرضين وطلاب تدريب و دكاتره وكل واحد يكلمني من جهه .. انه هديئ و ادفعي ومن هالكلام ونا ماعاد ارد ع احد و فجأه وانا استفررغ و استفرغ و عادي جابوا لي حوض استفرغ فيه و بعدها يقولون ادفعي يعني ولا كأني بموت عندهم .. في هاللحظه جت دكتوره غير عن اللي طلعت .. توها مداومه حتى انها دخلت بلبسها العادي مادريت انها دكتوره .. استدعوها لي .. و اول مادخلت وقالت انا الدكتوره وانا اترجاها بالعمليه او المسكن .. وهي تعطيني جرعه وحده لابرة الظهر .. خفف شووي بس من الالم .. يعني الحراره اللي كانت تضرب بظهري خفت بنسبه قليله بس اهون الحمدلله .. وقالت لي يلا ادفعي وصارت هي اللي تشرف علي و طلبتها تقص و ماترد علي لحد مادفعت اقوى ماعندي و طلعت بنتي الحممممممممدللله و يحطونها علي و الله ولا حتى ناظرت فيها ..

العضوة: 119894 , 7 years ago

و شالووها عني و هنا هي زادت جرعة ابرة الظهر لين ماعاد حسيت بشي وبدت تخيط ولحد ماخلصت و باركت لي وطلعت .. ويوم ارتحت ورفعت عيني الا اشوف جمممهور كامل فوق راسي .. الغرفه فعلا مليانه .. قلت خيرر كل هالعالم دخلوا عندي .. و اركز الا بينهم ٣ عيال .. والاغلب بنات .. قلت متى دخلتوا انتوا .. قالوا كل القسم سمع صراخك .. وسويتي استنفار وكلنا جينا نساعدك .. و الدكتوره اللي ولدتك تم استدعائها من بيتها .. واللي كانت موجوده قبل وراحت تشوف اوراق العمليه .. اساسا ماراحت تشوف الاوراق .. طلعت لانها تعبت منك .. و انا ماعاد ادري كأني بحلم و يوم ناظرت للساعه الا هي ١٠ ونص .. قلت كم ساعه وانا ادفع قالوا لي ٣ ساعات .. ياررررب رررحمتك بس .. قلت الدكتوره قصت لي المنطقه .. قالوا لي لا .. و بسس انتهت قصة ولادتي ع خيررر الحمددلله ..

العضوة: 119894 , 7 years ago

طبعا انا طلبت القص كذا مره وهم مارضوا يقصوني يبغوني اولد بدون قص ولا تدخل منهم ابدا .. ولا حولوني عمليه و لاشي .. يمكن ولادتي طوووولت و تعبت فيها لاني بكريه و بطلق صناعي بدون اي توسع للرحم سابقا و بددون قص .. كل هذي عوامل بعد الله ساهمت يمكن في تأخير ولادتي و خروج الجنين .. والحمدلله كل شي مقدر ومكتوب .. طبعا مثل ماقلت لكم .. انا حبيت اكتب قصة ولادتي هنا لاني ابي افضفض و انا هنا بغربه و ماعندي الا زوجي وماكان فيه احد من اهلي او خواتي او امي .. ولما قرروا لي موعد للولاده بالطلق الصناعي انا ماكنت ادري وش السالفه .. وزوجي حلفني ما اعلم امي الا بعد ما اولد يقول مابيها تشيل همك وانا قلت طيب ولا علمت احد و بعد ماولدت وعلمت امي .. عصصبت علي وقالت ليش رحتي لموعدهم كان جلستي بالبيت لحد ماتجيك الولاده الطبيعي من الله .. مره زعلت علي .. وانا مدري وش السالفه والله .. بس مكتوب لي من ربي والحمدلله ع كل حال .. واعتذر اني طولت بالكلام وشرحت بالتفاصيل .. بس لاني كل ما بتكلم بطلع اللي بخاطري .. يسكتوني .. ومحد يسمعني .. و الحمدلله دائما وابداااا .. ويارررررررررررب يرزقكم بالولاده الميسسره السهله و يفرج عليكم و يسسعد قلوبكم يارررب و تشوفون ضناكم بكل صحه وعافيه يااكريم ❤️❤️❤️ اعتذر على الاطاله 😬💔

العضوة: 129589 , 7 years ago

يوة اوجعني بطني من قريت قصه الولاده ..كيف بسوي اجل انا 😭

العضوة: 129589 , 7 years ago

وانا اقراء حسيت اني معك بالغرفه 😂 دخلت جو

العضوة: 142417 , 7 years ago

بس كيف يعني يعملو كدة حسبي الله عليهم ..لازم قص مستحيل تولدي من دون قص والا يشق لك المكان بالكامل وهذا ما حدث معك عشان كدة خيطت ...مافي رحمة في قلوبهم عادي تقص والجنين يطلع وترجع تخيط ولا كان حصل شي بس ربي سلمك من الشر ..حمد الله على السلامة ...الف مبروك

العضوة: 143243 , 7 years ago

الحمدلله على سلامتك ومبروك البنوته 💕💕 لانك قلتي البكريه لاتدخل تحمست ودخلت اقراء 😭 الله ياجرك على هالتعب ويرزقك برها ويهون علينا الولاده قسم اني بخوف مايعلمه الا رب العالمين حتى النوم صايره انام ساعه واقوم مفزوعه من كثر التفكير بالولاده المشكله باقي لي اعتبر ببداية الثامن 32 اسبوع شلون لاقربت الولاده 😭💔

العضوة: 143243 , 7 years ago

@user-129589 انا نفسك لدرجه اقراء واسوي نفسها احس اني قاعده ادفع 😂😂 واخذ نفس قاعده اجرب

العضوة: 119894 , 7 years ago

والله مدري كيف صار هذا كله بس الحمدلله مقدر و مكتوب .. وانا مرره ماعندي اي فكره و لا خلفية و لاشي .. دخلوني ودخلت 😅.. والحمدلله حمدا كثيرا على نعمه ..

العضوة: 129589 , 7 years ago

@user-143243 انتي تحسين انك تدفعين ..وانا احس اني ماخذه وضعيه المراقب 😂 .. الحمدالله اللي ربي هونها عليها ..وعقبالك يارب وعقبالي وعقبال الحوامل

العضوة: 142885 , 7 years ago

الف الف مبروك والحمدلله على سلامتك وسلامت بنتك وان شاء الله كل هذا التعب في ميزان حسناتك برغم قد جربت الولاده بس والله قصتك جدا مؤلمه ومحزن الحمدلله بس والله المستشفيات العربيه ارحم

العضوة: 119894 , 7 years ago

@user-143243 لا ياقلبي لا تفكرين كذا .. خليه على الله و ان شاء الله بإذن الله تتسهل لك يارررب .. واكيد كل تجربه تختلف عن الثانيه و كل وحده قدرة جسمها وتحملها يختلف عن الثانيه .. ومو بالضروره التجربه تتكرر مع الكل .. انتي خلي ثقتك بالله كبيره وادعيه ربي يسهل لك ولادتك و اعملي بالاسباب بعد التوكل ع الله وبإذن الله تتسهل .. الله يفرج لك وييسر لك ياررب و يرزقك بشوفة ضناك بأتم صحه وعافيه ❤️