حملت بولد بعد بنتين .. فرحت بحملي هذا كأني اول مرة احمل .. وانتظرت تعدي شهور الحمل بلهفة عشان اشوف ولدي اللي تعلقت فيه قبل اشوفه .. كانت ولادته اصعب ولادة ولدتها بس كله هان لما شفته وحطوه على صدري .. بريء و جميل يحك وجهه بيديه الصغيرة شعور صعب أنساه او أوصفه ماكنت اعرف انها يمكن تكون اخر مرة احضنه وهو حي .. طبيعي وكامل اخذوه للحضانه وانا اخذوني لغرفتي و نمت فرحانة انتظر بكره اشوفه .. لكن فرحتي فيه ماكملت فجعوني اليوم الثاني انه يمكن يكون فيه مرض في القلب لانه الأكسجين قاعد ينقص والولد تحول لونه ازرق ينتظرون دكتور القلب يفحصه وياكد .. مرت ساعات كانه سنين ننتظر دكتور القلب وانا عندي امل انه يطلع كلامهم غلط وتشخيصهم خطأ .. لكن طلع أسوأ من اللي توقعته .. عيب خلقي شديد في القلب ماله حل .. قلب بدون صمامات .. قالولي قلبه ماراح يعيشه كثير وكل المستشفيات رفضت تستقبله .. الايام تمر علي سنين .. في قلبي غصة كل شي يذكرني ان لي ولد في العناية ينتظر اجله .. ازوره ومااقدر احمله ولا أضمه .. كله أسلاك وأكسجين وابر واجهزه .. صغير على هالألم .. يارب الطف به .. يارب لا اعتراض ..