محاضرة نسا 😂😂😂😂😂😂 راحت الست لدكتور النسا بتاعها عشان يتابع معاها الحمل أصلها حامل في الخامس و كانت و اخدة معاها مامتها ....و يا ريت اللي جرى ما كان... الام: تخيل يا دكتور انها عايزة تعمل "أندر ساونا" الدكتور ملامحه تتغير و يبص لبنتها: ايه الـ "أندر ساونا" دي بالظبط؟! الست: تقصد "ألترا ساوند" يا دكتور الدكتور: آه..طب و دي فيها ايه يا حجة؟! عشان تعرف الجنين ولد ولا بت؟ الام: يا عين أمك...و انت محتاج بقى اللي اسمه الاندر ساونا عشان يقوللك ولد ولا بنت؟! الدكتور: يعني ايه؟ الام: ماتبص بعينك يا دكتور...ما انتاش شايف مناخيرها مكببة ازاي...يبقى واد طبعاً... الست تحسس على مناخيرها: ماما...مش كدة!! الدكتور: و هي لما مناخيرها تكبر يبقى اللي في بطنها واد؟!! الام: امال ايه؟! ماعلموكش كدة في محاضرة المناخير؟! الدكتور: محاضرة الايه؟! الام: المناخير الدكتور: تصوري...صح...انا افتكرت اني ماحضرتش المحاضرة دي بس خدت كشكول محاضرات مدحت زميلي....فعلاً (الست) بلاش أندر ساونا...(يغمزها و يهمس) بس الترا ساوند ممكن... الام: ايوة كدة لزومها ايه الأجهزة و الإشعاعات هو احنا ناقصين أمراض... الدكتور: (للست) و انتِ اخبار صحتِك ايه؟ الام: بتجيلها حموضة من وقت للتاني، و مابتاكولش...قلت لها الحموضة دي من شعر الواد...مالهاش دعوة بالأكل بس مابتسمعش الكلام!! الدكتور: حموضة من شعر الواد؟!! ليه هو الواد في معدتها؟! الام: ما كله منفد على كله يا دكتور...هو انا اللي حاقوللك؟!...ايه ماحضرتش محاضرة الحموضة في الكلية... الدكتور: لا دي حَضَرْتها...بس كانت كذا محاضرة ورا بعض... مش واحدة ولا اتنين...اصل زي ما انتِ عارفة الحموضة ممكن تستمر الـ ٩ تشهر كلهم...معلش تلاقي محاضرة منهم وقعت مني سهواً... الام: احنا يا دكتور لا حضرنا محاضرات ولا دياولو...العلم في الراس مش في الكراس... الدكتور: ماشاء الله...(للست) و أكلِك يا ترى شكله ايه؟! الام: بتموت في انها تزود قرفة عالاكل...عمال على بطال...جاي عليها الحمل بالوحم عالقرفة...ايه الحمل اللي بيزن على خراب عشه دا؟!! الدكتور: مش فاهم؟! ايه المشكلة في القرفة؟!! الام: بالذمة مش عيب تسأل و انت دكتور ملو هدومك...ماتعرفش ان القرفة بتحمي الطلق؟!! الدكتور: بتحميه ازاي يعني؟! الام: بتحميه ازاي؟! بالميا و الصابون...ايه يا دكتور ما تركز معانا...يعني بتزود أعراض الطلق...ايه برضه ماذكرتش باب القرفة في كتاب الطب؟! الدكتور: شوفي ازاي؟!...على أيامنا كانوا شالوا الباب دا من الكتاب و زودوه على قسم العطارة... عفونا منه... منهم لله!! مش كان زماني دلوقتي أديت لبنتك النصيحة المظبوطة! شالوا القرفة الهي ربنا يقرفهم يا قادر يا كريم!!! الست: تخيل يا دكتور ماما عايزاني اكتر من اكل الحلاوة؟! الدكتور: اشمعنى؟! الام: عشان السمسم يا دكتور بيكتر اللبن بعد الولادة...عشان كدة لازم تاكل حلاوة؟! الدكتور: يا حلاوة!!! و قبل ما تسألي...انا ساقط مادة الحلاوة كلها...و خصوصاً الشفوي...اصلهم كانوا بيسألوا أسئلة في النوعين: الطحينية و الشعر... الام: الَّه امال انت اتخرجت ازاي عايز افهم اذا ماعندكش فكرة عن الحمل أساساً...و احنا جايينلك ليه من اصله؟! الست: ماما؟! مش كدة قولنا الدكتور: تصدقي انتِ عندك حق...بس بصراحة رسالة الدكتوراه بتاعتي هي اللي شفعتلي بصراحة!!! لولاها ماكنتش اتخرجت! الام: و عملتها في ايه ان شاء الله؟؟! الدكتور: في المُغات!