بسم الله نبدا .. رحت طبعاً يوم السبت المساء علشان اخذ الصناعي وقالو لازم تنويم لان الصناعي نعطيه الصبح فقط لان الاستشاريين يكونون موجودين , المهم وادخل التنويم ولا احكي لكم عن حماستي للولاده 🤦🏻‍♀️ , كنت انتظر هاللحظه علشان ارتاح وكل شوي انتظر واعد الوقت متى يجي الصبح. وجاء اخيرا الوقت الي هو يوم الاحد , فحصتني وقالت واحد ونص وعطتني نص تحميله الساعه 11 وكنت متحمسه متى يبدا مفعولها , وكانو يسوو تخطيط للطلق ويطلع خط واحد مستقيم ما فيه اي تموجات يعني ما معي طلوق 🙂💔 , ومره انقهرت انه حتى هذي ما جابت نتيجه , قالو بعد ست ساعات نعطيك وحده ثانيه فكنت طول الوقت امشي بالاسياب واتحرك علشان يفتح الرحم ويساعدهم , جت الساعه 7 الحمدلله وجت تعطيني التحميله الثانيه ومازلت وقتها متحمسسه واقول خلاص ان شاء الله بشد حيلي وماراح اخذ الثالثه وهذي بتكون تحميلة ولادتي , وكانو الي حولي من المريضات يضحكون علي ويقولو مجنونه احد يتحمس يولد انتي اصلاً ما جربتي ولا تدرين عن شي , كنت اقول لهم انتم مو مستعدات نفسياً ولا عندكم ايجابيه وحماس وانا ياقلبي ما ادري وش رايحه عليه 😭😂 ، المهم بديت احس بمفعولها وجاي زي الوجع بالظهر وبعدين راح للبطن بس كان وجع محتمل والتخطيط يطلع تموجات طلق هِنا فرحت انه اخيرا فيه نتيجه, وصرت امشي بالاسياب واتحرك لحد ما صار كل دقيقه الوجع وصار كل ماله يقوى هنا انا خفت صراحه ومرره متألمه من الوجع لدرجه صرت احبي مقدر امشي ولا اجلس😭 , جت كشفت علي على الساعه 9 قالت مفتوح 5ونص هنا طرت من الفرحه انه خلاص هانت ونزلوني الكشك وكان في بالي كلها ساعه بالكثير ودفعتين وانا والد😔😭 , بس للأسف طلع الموضوع اكبر من كذا وقعدت من 9 المساء لحد 5 الفجر وانا اطلق واتمخض لين مالله فرجها الساعه 5 الفجر يوم الاثنين وفهد جنبي ♥️, بعد طلوق مستمره ما توقف لمده 10 ساعات. وهذي قصتي بس بفضفض عن اشياء نفسيه صارت لي وقت الـ10 ساعات هذي واحس اثرها فيني للحين😔.