الاغراض اللي هنا طرحتها كلها عن تجربتي من واقع ٣ ولادات سابقه وفيه اشياء استعنت بخبرات البنات وترا ممكن تلغين بعض الاشيا وممكن تزودين اشياء ودك تضيفينها براحتك انا عني خذيت ٣ غيارات للبيبي كامله تحسبا لو لا قدر الله كنت عمليه وكل غيار حطيته بكيس شفاف اللي يجي شريط اغلاق بحط لكم صورة الكيس تحت وكتبت على كل كيس baby رقم مثلا 1 و متى ينلبس عشان اذا جت الممرضه تطلبني لبس له ع طول اقولها خذي كيس البيبي رقم كذا لان فيه غيار بعد الولاده(١) وفيه والغيار الثاني لو استفرغ او تسرب عزكم الله عليه اسهال (٢) واللبس الثالث للخرجه من المستشفى (٣) وكل كيس فيه (( كوفله وربطتها اللي هي المهود+ لبس افرول اللي هو بربتوز +قبعه +شراب اذا الافرول مو مغطي الرجل++قفاز عشان لوفكيته ما يمخش وجهه +التبانه الداخليه )) وحطيت له منشفه برضو بكيس يحفظها داخل الشنطه ...وحطيت له ملفين كبار واحد داخل المستشفى من البرد والثاني للخرجه من المستشفى وخذيت له عدة النظافه كامله من سيباميد لاني ما اضمن اذا المستشفى يعطون فأخذت احتياط((شامبو وكريم مرطب وكلونيا ولوشن )) والوتر وايبس(المناديل المبللة للبيبي) ومناديل عاديه واذا حابه قطن اذان وقطن عادي ومسحه طبيه للسرة+خذيت علبة حليب له +رضاعه +مصاصه ((لان ما اضمن حليبي الطبيعي اذا يكفيه بالبدايه ولاني ماني ضامنه يوفرون له حليب صناعي )) وخذيت له كمية حفايض تحسبا لو طولت وماعطوني المستشفى.. وانا نفس الشي حطيت لي ٣ غيارات ونفس الشي بأكياس كل كيس فيه (( قميص قطن فيه فتحه رضاعه + صدريه قطن مريحه +كلوت لاستخدام مره وحده +لقنز قطني نص ساق او نص فخذ+ شراب +كوتكس )) حطيت كل غيار لي بكيس عشان لو بغيت ابدل ع طول اخذ الكيس يكون كل شي فيه وادخل الحمام ما اجلس احوس ... وطبعا خذيت لي طرحتين قطن...اريح لي مع البرد +منشفتي وحطيت كيس كامل كوتكس(ما اضمن المستشفى يعطوني كل شوي ) ...وشنطة صغنونه داخلها معجون اسنان وفرشه و مشط ومسكرا وكحل وروج بلون طبيعي وكريم وجه وكريم يد صغنون ومزيل عرق.. وشامبو لي ميني وسليبرز عزكم الله .. وعني افضل القميص القطني عن البجامه لان لو لا قدر الله عمليه بتكون متعبه لك البجامه مع خياطة القيصريه...والموضوع يرجع لك اممم وطبعا وقت اروح المستشفى بحط الشاحن ..ومجهزة علبة مره بالثلاجه صغنونه منقوعه بمويه ..ومجهزة علبة صغيره كور تمر معجونه برشاد وحبه بركه لبعد الولاده وسناك يخفف علي لو جعت لاني ما استسيغ اكل المستشفى ولو متأكده انك اكيييد طبيعي ممكن تاخذين بس غيارين لك وللبيبي ..انا كل ولادتي طبيعي بس برضو ما احد ضامن وش يصير وخاصه ان اهلي مو حولي ولا احد امون عليه ..فجهزت اغراضي وكثرتها افضل من انها تنقص واتوهق هذا بالتفصيل وترا تحسين الكلام واجد وهو بالاخير اخذ شنطة صغيره ...بس حبيت افصل واشرح بشكل اوضح بما انه فيه بكريات ممكن يحتاجون شرح وافي ودعواتكم بتيسير ولادتي❤