الحمدلله الذي بنعمتة تتم الصالحات ماميز الحمدلله اتحليت بالسلامة لي اربعة اسابيع انا دفعة 2اغسطس كملت تسعة شهور واربع ايام جاتني موية فجر ومشيت المستشفي مع شروق الشمس دخلت للدكتور وكان الرحم قافل ومافي تقلصات ولادة اتمشيت ساعة ورجعت كشفت كنت فاتحة صباع ولغاية الساعة 12 ظهر كانت بداية الطلق وتقلصات الرحم متباعدة مشيت تاني عملت تخطيط للجنين وظهرت التقلصات بزيادة بعدها بساعة اتقاربت التقلصات كل 12 دقيقة بعد ساعة بقت كل 7دقايق وبعديها اتقارب الوجع وبقيت اصرخ من الالم قلت للدكتور دخلني عملية وانو مكان جرح العملية بيوجعني استهبال مني هنا الدكتور خاف وجا سالني عمليتك قبل سنتين ولا اقل قلت لية سنتين وشهرين بعد نص ساعة سمعت الدكتور بتكلم عن انو حادخل قيصري وجابوا لي ادوية العملية وجهزوا اللبس والغرفة وفي اللحظة دي جاني دم ومرت الداية عليا وسالتني الحاصل شنو كلمتها عندي دم بعد الالم كشفت عليا وقالت لي راس البيبي قريب وولادتي حاتتسهل وقربت علما انو لمن قرر الدكتور العملية كنت فاتحة 4صباع بعديها اخدتني الداية لغرفة الولادة وقالت لي لمن يجي الوجع ادعمي. دعمت اربعة دعمات والحمد لله اتحليت بالسلامة وجبت احلي بنوتة ولما شفتها نسيت كل الالم والوجع وعقبال كل الحوامل وربنا يرزق كل مشتاق الذرية الصالحة