بسم الله الرحمن الرحيم بكتب لكم قصة حملي وولادتي ،، انا قبل الزواج كنت متفقه مع زوجي نأخر موضوع الزواج سنه عشان نستمتع مع بعض بدون اطفال وصياح ولويه وصحيح تزوجت بشوال وشوال السنه اللي بعدها تأخرت الدورة علي ٧ أيام وقلت له يشتري لي تحليل ع اساس بسويه الصباح بس ما قدر يصبر واصر علي اسويه الليل قبل ما انام وسويت التحليل وع طول طلع خطين واطلع له وانا ابتسم واول ماشاف خطين فرح بقوة وقال بكرة الصباح نروح المستشفى عشان نتأكد وطلع صحيح حامل وطبعا ما قدر يصبر ومن وانا في المستشفى اتصل لامه لانهم كانو مسافرين وبشرها وبشر امي ما انتظر انا ابشرها 😂😂 المهم مرت شهور الحمل بسلام والوحام كان خفيف بس صرت ما احب اشرب ماي تقلب كبدي من اشربه و الحموضة ذبحتني وكل ما تقدمت الاشهر تزيد الحموضة ولما صرت في الشهر الخامس كنت نايمه عند امي وجلست لصلاة الصبح واحس ظهري يألمني بس كان الالم محتمل اشوي بعدين صار كل ماله ويزيد المغرب خلاص ما قدرت اتحمل بس ابكي اتصلت امي بزوجي وقالت له يجي نروح المستشفى اشوي الا متصل يقولي لازم تروحين الحين ما تقدرين تصبرين اشوي ( جالس يشاهد مباراة ما يبي يفوتها ) وانا ماغير ابكي وبس اقول كم يعني اصبر سمعني ابكي حن علي قال خلاص يلا بجي ويجي واروح المستشفى شافتني الدكتوره وقالت بتسوي سونار وانا داخلي ارقص من الفرحة بس مو قادرة من الالم كان ودي اعرف جنس الجنين لان كل مارحت يقولو لي مو باين او مسكر رجولة او الحبل السري في النص وسوت لي سونار الا تسألني عرفتي جنس الجنين والا باقي قلت لا قالت " وردي " يالله قد ايش فرحت لان كان نفسي في بنت وبعدها الا تقول باين عدها في السونار ان فيه طلق مبكر هذا الا مسبب الالم وسوت تحاليل عشان تبي تعرف من ايش الطلق وطلع عندي التهاب في البول وانتو بكرامه الا كان ملازمني طول فترة الحمل وعطتني مضاد ومرهم يخفف الالم والحمد لله يوم ثاني خف الالم لكن اللي يشوفني يقولي وجهي صار اصفر من التعب وبعد اسبوع رحت مع امي السوق وبعدها رجعت البيت ولما جيت بنام الا ويرجع لي الالم مره ثانيه وكنت حزتها متزاعله مع ابو الشباب فسكت عشان مابي برستيجي يروح قدامه 😂😂 مدري وش كنت احس فيه حزتها وماغير امشي في غرفتي رايحة جاية لان كل ما مشيت يخف الالم وكنت افكر اتصل لامي بس قلت ما ابي افزعها في نص الليل كل اشوي امسك جوالي بتصل واهون وطبعا للحين مصره ما اجلس زوجي من النوم وهو اصلا ما جلس لي ( نومه ثقيل ما يجلس بسرعهة ) وصرت انازع الالم لوحدي لحد ما تعبت ونمت جلست يوم ثاني الا الالم راح ثلاث ارباعه فرحت قلت الحمد لله ومرت الشهور ووصلت لنص الثامن انتظر متى بس يجيني الفرج ابي اولد خلاص تعبت من الثقل الا اسمع مرت حماي ولدت فرحت لها وقلت عقبالي متى بس يجي دوري وكنت اقول لزوجي ابي اطلع امشي عشان بسرعه اولد ومشيت لي يومين وكنت اقول له قبل لا اولد ابي اكون مخلصة تنظيف البيت وحاطة في بالي اني بطول ع ما اولد بحكم الا اسمعه ان البكريه تطول ما تولد بداية التاسع فقلت اول يوم في التاسع ببتدي تنظيف وقبل لا ادخل التاسع بيومين جاني الم خفيف لا يكاد يذكر بس قلت مستحيل ولادة بعدني ما دخلت شهري واروح لبنت خالتي عازمتني على عشاء و اسهر معاها يوم ثاني جاني الم خفيف كمان لكن قلت لا لا مستحيل بولد الحين ورحت بيت اهلي وسبحان الله مع انه الالم راح لكن امي حست فيه شيء تقولي شكلك بتولدين وانا اقول لا وين اولد باقي وايد وارجع البيت الا الالم يزيد بس كان محتمل واقول لزوجي بطني يألمني هو ما توقع ولادة يقولي يمكن ماكلة شيء ونام وانا جالسة واحسب كل ماجا لي الالم الا واكتشف ان الام منتظم يجي كل خمس دقايق وانا انصدم بس بعدني اصبر نفسي واقول ما بولد لان الالم محتمل مو مثل ما اسمع من الناس وماجلست زوجي قلت مسكين ماباجلسة وبعدين يطلع خرط لا ولادة ولا شيء وصبرت الى وقت الدوام وقلت بكلم امي اول فتحت الواتس اشوف اخر ظهور لها الا طلعت متصل الان قلت لها الا تقولي لاتخلي زوجك يروح الدوام وقلت له قال اجل انا بروح استاذن وبجي لكن اذا صار شيء دقي علي برجع على طول مع ان ما اتوقع تولدي الحين بكرة تدخلي التاسع وعصبت علي امي ليش تخلينه يطلع ما تدرين وش يصير ومن هالكلام وانا اقول لها عادي الالم مو قوي المهم خفت من كلامها واتصلت له قلت له يرجع وجا ورحنا ع طول ع المستشفى تقريبا الساعه ٨ ونص الصباح مريت ع امي اول واحنا في الطريق وزوجي يضحك يقولي خلاص بتولدين صحيح يعني خلاص بصير اب وهو يضحك واشوي يصورني سلفي ويقولي اخر سلفي مع كرشتش وانا ودي اامصعه من رقبته من الالم ووصلنا المستشفى  ودخلت انا مع امي الطوارئ ودخلت الكشك الا تقولي الدكتوره ٥ سم وانا الا يصير وجهي كذا 😱😱 و تجيلي البكوة واقول في قلبي خلاص مافيه مفر ولادة ولادة واقول لامي وتدمع عينها بس مسكت نفسها عشان ما ابكي انا وخذت امي اوراق الدخول توديها لزوجي شان يوقعوها ويجيبها لان مستشفى حكومي فما يدخل الزوج القسم وصارت امي الله يخليها هي الوسيط بينا هنا امي كلمت بنت عمتي لانها كانت ممرضة بنفس المستشفى عشان تتوصى فيني وقالت لها تم وانا ركبوني قسم الولادة وقالو لامي خلاص روحي وتعالو لها وقت الزيارة لما ركبت قسم الولادة استقبلتني بنت عمتي وهي تقولي لا تخافي بنطلعه خلوني ابدل ملابسي وحطو علي جهاز الطلق وانا كل اشوي اقول لهم ما ابي توسيع وهم يقولو بنحاول ما نوسع بس الاغلب بتحتاجي لان بكريه وانا يجيني احباط ما ابي توسيع كنت خايفه منه اكثر من الولادة وطبعا بما ان عندي واسطة كان الممرضات كلهم متجمعين عندي ويدعون لي ويواسوني وانا بس ابي اغطي وجهي مستحيه نسيت اقول لكم ان بس ركبت فوق قاسو لي طلع الرحم فاتح ٧ سم وهم مستغربين يقولو ما شاء الله بكريه وفتح سريع وهنا خلاص صار الالم لا يحتمل وفكو كيس الماي وصار الالم يزيد اشوي قاسو صار ٩ سم اتصلت بنت عمتي تبشر امي ان خلاص قريب اولد وعلق على ٩ ساعه كامله وبعدها صار ١٠ و يقولو لي اذا حسيتي بشيء نادي علينا وبنجي كانو معاي بنفس الغرفة بس بيني وبينهم ستارة وكل ماجات لي الطلقة قمت اصرخ بقوة  تعالو ويجون الا راح الالم يقولو وش تحسي اقول لهم ما ادري ويروحون  ورا الستارة واشوي تجي الطلقه اصرخ عليهم تعاااالو وكذا لين خلاص صرت ادفع ومع الاسف ما صبرو علي وسوو لي توسيع والحمد لله يمكن ٣ دفعات وولدت ببنتي حبيبتي مع أذان الظهر وحطوها على صدري يالله ما اوصف لكم كيف الشعور الله لا يحرم احد من هاللحظة وسمعتها تكبي وابكي معاها واتصل لزوجي وانا ابكي اقوله انا ولدت الا يقولي طيب ليش تبكين الحين قلت مافيه شيء !!! يقولي بعدين سمعتك تبكين خفت على بالي صاير شيء للبيبي وامي بشرتها بنت عمتي ومن الفرحة ماخليت احد ما اتصلت له بشرته وانا بعدني في غرفة الولادة ولدت تاريخ ٦/٨ وكانو عاطيني موعد للولادة ٧/٩ وبس الحين بنتي عمرها سنتين و ٩ شهور الله يخليها لي ويخفف من دلاعتها 💔😆😆 والحمد لله على كل شيء والله يرزق كل وحدة تتمنى الذرية ويسهل على كل حامل يارب ❤️ وان شاء الله بكره اكتب قصه ولادتي الثانيه 😊