السلام عليكم .. صباحكم حب قصة ولادتي ماتوقعتها بتكون كذا ابدا كنت مستصعبه كل شيء ومتخيله اشياء كثير مرعبه طبعا من كثر كلام الحريم الي اسمعه اولا انا نزل علي دم يوم الاربعاء في الصباح وتوقعت ان عندي ولاده لان نزول الدم جا بعده الم دوره وخفت كثير وماقدرت انام وانتظرت لين اذن الظهر ورحت للمستشفى كشفت علي الدكتوره وقالت رحمك مقفل وانتي مافيك ولاده واخذت عينه من الدم وقالت راح تطلع النتيجه بعد اسبوع!! رجعت البيت ذاك اليوم والوضع عادي جدا وامارس حياتي الطبيعيه تماما نمت الليل وقمت من الم فضيع في بطني وظهري يروح ويجي ومنتظم فقلت اكيد اكيد هذا الطلق ! لكن يردني كلام الدكتوره يوم تقول رحمك مقفل وماعندك ولاده! قلت ياربي كيف بتحمل الاوجاع هذي لمدة اسبوع!! مر اليوم كاااامل وانا اتالم وابكي لين جا يوم الجمعه نمت الساعه 11 يوم الجمعه وصحيت الساعه 3 صباح يوم السبت وانا في قمة الالم والمعاناة رحت ابكي واتلوى عند امي قلت لها مقدر اتحمل خلاص بطني بيتقطع والدم يمشي ماوقف قالت امي شكل عندك ولاده!! قلت ولدوني قيصري اعطوني مسكنات او اي شيء انا خلاص بموت من الالم ! ياعمري اثاريني في شدة الطلق وانا مادري مشيت على كلام الدكتوره ذيك حسبي الله عليها💔 رحت المستشفى مع زوجي وامي وكشفو علي قالو الرحم عندك مفتوح 5 سم يلا ولاده !! انا انصدمت ماتوقعت يكون عندي ولاده ابدااا دخلوني غرفة لبست ملابس المستشفى وحطو على بطني جهاز حق الطلق والثاني حق نبض الجنين وركبولي اكسجين وركبو المغذيه وجهاز الضغط وجهاز القلب وانسدحت على ذاك السرير وانا بموت بموت من الوجع والالم وقاعده ابكي وامي وزوجي يناظرون فيني واشوف الهم بعيونهم😭 قلت لزوجي بسرعه ابي ابرة الظهر انا بموت مو قادره اتحمل راح للدكتوره وقالت له دكتورة التخدير عندها عمليه استنو 10 دقايق انتظرت ويزيد الالم واصرخ فيهم بسرعه ابي الابره ويرجع زوجي يكلمهم جت الدكتوره وكشفت علي وقالت رحمك 7 سم خلاص انتي بتولدين اصبري شوي قلت مقدر اعطوني الابره وبعد محاولات بالموت اعطوني الابره حسبي الله عليهم بس اخذت الابره جلست بعدها ساعتين وولدت اخذت الابره والرحم مفتوح 7 سم الساعه 6 وولدت الساعه 10 الصباح والله العظيم يابنات ان الابره رحمه من رب العالمين واشكر الي سواها واخترعها والله العظيم اني ماحلف كذابه اني قاعده اولد ماحس بوجع ابدا حتى لحظة خروج الجنين مافي الم بس حسيت شيء كبير خرج لكن مافي الم حتى الخياط ماحسيت فيه فعلا استمتعت بولادتي هذي والحمدلله ربي يسرها والي متخوفه من الابره انا اقولك من واقع تجربة خذيها ولاتخافين اصلا ذيك اللحظه تتمنين اي شيء عشان يخف الالم خذي الابره وتوكلي على الله وربي يسهل عليكم ويزرق كل محروم يارب وبالنسبه لاعراض الابره الجانبيه ترا ماحسيت بشيء لاجاني صداع ولا غيره ومن بعد تجربتي في الولاده باخذها حلق في اذني مو اي كلام اقراه او اسمعه راح يصير لي فعلا خيالي كان قبيح بعكس الواقع كان جدا جميل وياربي لك الحمد على رحمتك فيني ذيك اللحظه .. دعواتكم لي