قبل لا اكمل القصه حابه اقول يعني المشاهدات عاليه والتعليقات بس اقل من المتوقع مدري يمكن ماعجبتكم قصتي يعني جد تهمني التعليقات الله يسعدكم بدا زوجي العلاج كنت اصحى معاه الصباح عشان افكرو بالدوا وانه ماينسى ولا يوم العلاج كنت حريصه مرا كله عشان الحمل كله عشان ابغا افرح كنت وقتها اطالع في المرايا يالله معقوله ووصلت لده الوزن عمري في حياتي ماكان وزني كدا فكرت ليش مانزلوا ومنها اخفف اكل ويكون اكلي صحي سلطات وشوربات ودجاج ع الفرن وابعد نهائي عن العصيرات وبالفعل ده الي سويتو كنت كل صباح رياضه ع السير سااعه وفي الليل رقص زومبا كان اكلي خالي من الزيوت وكان سلطات وشوربات في الليل والغدا بيكون اكلي منوع بس الزيت مرا خفيف ،، مر اول الشهر وياخساره مافي حمل جا الشهر التاني وكنا نفس الشي مستمرين لحد نص الشهر سوت تحليل الحمل ومافي فايده وقتها فقدت الامل وقولتلو ابغا اروح لسمير عباس نشوف ايش المشكله روحنا وانتظرنا لحد ماجا دورنا دخلنا ع الدكتور وقالنا انتو لسا ماخلصتو التلات شهور ليش جيتو قولتلو انا فقدت الامل ابغا تلقيح بكم سعره قال ولا يهمك حتعملي التلقيخ لو ماسار حمل خلي الشهرين يعدوا وان ماسار تعالي وع السعر سعرها 2000 يالله قلبي وجعني من فين حنجيب ال 2000 احنا مع علاجاتو وسعرها الغالي مانلاقي اكل اخر الشهر ولا نقدر نعمل ولا نسوي شي خرجنا من المركز وانا وههو فينا هموم الارض في يوم اتصلت اختي قالتلي جبتلك معايا فيتامينات كويسه للاظافر والشعر جبت علبتين واحده ليكي واحده ليا فرحت وشكرتها واخدتها منها بديت اشرب الفيتامينات بعد الفطور وبعد الغدا وبعد العشا قرات من ضمن الفيتامينات الفوليك قولت ممكن تساعدني بعد الله وخلص الشهر التاني وبدينا في اخر شهر من العلاج وعلى نهايه الشهر التالت وزني نزل وماتتخيلوا الحمدلله نزل 11 كيلو الحمدلله زوجي وقتها تعب وسخونه يالله طلعلو خراج تاني قولتلو روح سوي العمليه روح الحكومي اكيد عندهم وببلاش اقتنع بكلامي وراح مع ابوه اتصل عليا المغرب قال حقعد تلات ايام في المستشفا تالت يوم حددوا العمليه دعيتلو وقولتلو بروح اجل عند اهلي عشان اخويا يوصلني الدوام ويرجعني قفلت من عنده اتصلت ع اخويا اخدني وروحت بيت اهلي وقتها كنت بس اروح الحمام بكتره وانا في الدوام وف الببت وكنت اقول اكيد من شرب المويا اليوم التالت سوا زوجي العمليه وكلمته وانا في الدوام وقال انه خارج بكرا الليل قولتلو بالسلامه واستناك خرجت من الدوام طلبت من اخويا يوقفني الصيدليه وقفني واشتريت التحليل االمنزلي دخلت بيت اهلي وخشيت الحمام الله يكرمكم وانا مرعوبه سويت التحليل وبان الخط الاول وثواني وبان الخط التاني وقفت من الصدمه خرجت وروحت ل اختي < اختي مو متزوجه اصغر مني بسنتين وريتها التحليل ماعرفت راحت نادت ماما وقتها ماما قالتلي اديني العلبه اعطيتها وكانت تقول ياااارب يابنتي بكرا سوي تحليل دم وان شاء الله خير افتكر داك اليوم يابنات مانومت كنت مواصله وخايفه صحيت ع 6 وصحيت اختي معايا كانت شايله همي استنينا الين 9 وياخساره ماكانت عندنا سياره وبابا في الدوام واصريت وقتها الا اروح لبسنا العبايه وخرجنا مشي للشارع العام وقفنا سياره وروحنا مستشفا خاص سويت التحليل وانتظرنا برا كنت كل مرا اروح الحمام كل ثانيه مااكدب عليكم ابغا اطمن نزل دم ولا مانزل كل شويا اشوف لحد ماجا الوقت دخلنا ع الدكتورة وانا رجولي تتنفض قالتلي الدكتوره مالك ياحبيبتي خايفه ليه مبروك انتي حامل وقتها دمعت عيوني من الفرحه يالله الحمدلله ربي حقق حلمي واخيرن روحنا البيت وبشرت اهلي بالتلفون وكله مبسوط اتصلت ع ابوة قولتلو ابغاك في موضوع ممكن تمرني صدقوني كان مو عاجبه الموضوع ويصرفني ويقولي خير خير مرت ساعتين وانا متحمسه ابغا اقولوا الموضوع لحد ماجا ركبت معاه السياره وع طول بشرته بحملي ع بالكم فرح تعرفوا ايش قال قالي ليش استعجلتو كان خليتوها بعد عشر سنين عشر ياظالم عشره يسير عمرنا 40 سنه كسر فرحتي قولتلو ياريت ماتقول لزوجي لانه انا ابغا ابشرو وصلت البيت بشرت اهلو فرحتهم مو زي فرحه اهلي سبحان الله < انا عايشه مع اهله استنيت زوجي جا ووريته التحليل ماوصفلكم نقز من الفرحه فرح نسيت كل وجع وجعني هو فرحت لفرحه لانه تعبت واخيرن ربي عوضني الله يسهل يارب ويكمل حملي على خير < يتبع