السلام عليكم ورحمة الله وبركاته الحمدلله على سلامتكم ومبروك ماجاكم ، واللي باقي تنتظر الله يقومها بالسلامه ويقر عينها .. موضوعي عن النفاس واهتمامها بنفسها وأكلها وأول شي انا سعودية وعايلتي من زمان على هالشغلات امي بنفساتها وحتى الاهتمام وقت الدورة يكون قريب من النفاس بس بشكل اخف ، الملابس : اول شي انتي حامل من الشهر السابع تطلعين تجهزين على خفيف ملابس للنفاس ارواب وملابس داخليه وشرابات واحرصي يكون كل شي مريح وقطططني وللرضاعه اختاري حمالات تكون للرضاعة مو تشترين ملابس شتوية بعز الصيف وتذبحين نفسك لا لبس يكون مريح وبس والمكيف لاتشغلينه على بروده عاليه خلي الجو معتدل افضل لك ولأطفالك واللي بتولد بالشتاء او الجو عندهم بارد طبعاً تدفى زين ، بالنسبة لي شتاء صيف اذا كانت علي الدورة وحتى لما كنت نفاس زي هالأيام بالسعودية كان حر لكن كنت ادفي عمري والبس طويل وحتى الف طرحة قطنية او البس توربان الأكل : كانت دلة الاعشاب والحلبة مع الحليب دايم عندي عشان الرضاعة الطبيعية يابنات لازم تأكلون زين والتمرة عند راسي امي تسويه لي مفروك مع كمون وفلفل اسود شوي وقرفة وحبة البركة وممكن تضيفين له رشاد او شمر بس انا ماكنت احط لأن حوايجي فيها ،، الفطور مراصيع مع عسل وسمنة او مع كشنة وزي ماقلت الحليب مع الحلبة عندي طول الوقت ومع الفطور احط بكاسة الحليب ملعقة من الحوايج أو مع الاكل او ألهمها لهوم وبعطيكم أفكار للفطور ممكن عصيدة تمر او عصيدة عادية بالبر ومعها بيض وممكن قرص عادي مفروك مع سمن وعسل زي ماتحبون .. الغداء ايدام لحم .. مرقوق .. قبوط .. عصيدة بر مع لحم وامي تحط لي برضوا مع اكلي حلبة وماش وماتحط صلصة طماطم لأنها تجيب حارق حتى البهارات بنات لاتكثرون منها وفلفل اسود او ابيض صح مفيد بس مايتكثر منه عشان مايقلب بطنك العشاء ممكن زي الفطور او شوربات شوربة لحم او دجاج او خضار وترا اللحم والدجاج مفيدين بنات حاولوا دخلونها بالأكل كثير الحوائج سويتها بنفسي عشان اضمن نظافتها وكنت اخذ منها لهوم مع الحليب او مع الاكل مرتين او ثلاث يومياً ومو معناته تأخذين حوائج ماتهتمين بالأكل ماراح تفيدك اذا ما اكلتي الكل يهتم سواء ولدتي قيصري او طبيعي مو والدة قيصري معناه ماتحتاجين تاكلين او منظفينك لا طبعاً بينزل منك دم وتحتاجين اهتمام الأعشاب كنت اشرب بابونج لأنه يهدي والشمر يدر الحليب ومعروف الشمر اصلاً انه يرفع هرمون الحليب اللي تبي ترضع طبيعي ومهتمه تشرب منه والحححلبة هذي بعد سحر .. حاولي تمتنعين او تخففين الاكل اللي ينفخ البطن مثل البقوليات تقدرين تدخلين لأكلك سلطات اذا تحبين او فواكة براحتكم كنت اخذ بعد مكملات كاتبتها لي الدكتورة حديد الحين بالنسبة للأكلات الممنوعة وقت الدورة مثل الملوخية والبامية واللبن والحوامض وغيرها بنات انا ماكنت اكل اي ممنوع بوقت النفاس او الدورة كلها أربعين يوم وفيه اشياء كثير مفيدة وتقدرين تاكلين بعدها اللي تحبينه بس براحتكم بالنهاية بس انا كنت ماشية على نظام امي والحمدلله طلعت ونظامي تمام وبشرتي وشعري جداً راضيه وكان وجهي الحمدلله منور ومليان مو ذبلانه ترا الاكل يلعب دور وتبين تنحفين اجلي هالشي لبعد النفاس الحمدلله الحين رجعت لوزني قبل الحمل وأقل ماشاءالله اول الأيام بالمستشفى انا والدة قيصري اخذت معي مرة وحطيت لي كسرة مرة في مويه وبعد ماولدت مباشرة شربت من الموية وشميت من المره كنت لافتها بمنديل وكل شوي اشم منها وحطيتها قريب من مكان الجرح وطبعاً اخذ المضاد وحتى اللي والدة طبيعي نفس الشي تاخذ مرة وتشمها عشان مايشم الجرح اكلت اول يوم من اكل المستشفى فطوري كان بيض مسلوق وشاي لأن انا قيصري فـ اول يومين كان صعب علي اروح الحمام الله يكرمكم وحتى كان بطني مليان هواء وجسمي كله يألمني من الهواء أكتافي وظهري وكنت على الكمون اشرب منه وايضاً اقول لكم انه سسسسسحر الحمدلله بعدها مشت أموري وبدأت اكل زين للموضوع تكمله اذا ناسية شي برجع اكتب ونصائح مهمة للي والدة قيصري خاصة انتظروني ❤️❤️