مرحلة قبل الولادة مش هاتكلم فيما يخص الأم طبعا لأن ده نسأل فيه أطباء النساء و التوليد هاتكلم فى كام نقطة يخصوا البيبى أولا : الفيتامينات اللى بتاخدها الأم أثناء الحمل ( مهمه طبعا علشان صحتها هى لأن البيبى ملوش دعوة خالص و غذاءه بيجيله لحد عنده عن طريق دم الأم مهما كانت حالتها الصحية ) بس مهم جدا إن الأم تاخد كالسيوم 1200 مجم يوميا خصوصا من الشهر السابع للحمل إلى تمام ال 3 أو 6 شهور الأولى للرضاعة الطبيعية ده علشان لو عندك نسبة رصاص بجسمك متتنقلش للطفل لأن الكالسيوم له تأثير عكسى للرصاص ( و طبعا الرصاص له تأثير سىء على الجهاز العصبى للطفل و على نسبة الذكاء الولادى و على صناعة الدم و على العظام ) ثانى شىء : فكرة انك تكلمى طفلك و هو جنين فى بطنك : الحكاية مش أن الطفل هايسمعك و يفهمك ( لأ ) هو سامع أيوه بس مفيش فهم لسه خالص . و لكن ده لتقوية الرابطة بينك و بينه و بيقلل جدا نسبة التأثر بمشكلة اكتئاب ما بعد الوضع ( فيه أمهات اثناء الحمل و بعد وجع الولاده بيزيد عليها الإكتئاب و يصل بها لرفض الطفل أو عدم نزول اللبن له غصب عنها !!!) ثالثا نعرف إن توتر الأم أثناء الحمل له تأثير سلبى على البيبى و بيوصل له مواد ضاره تقلل الدم اللى واصل عن طريق المشيمة ) رابعا : لو عندك طفل و انت حامل .....لازم تعديه جيدا طوال فترة الحمل و تخليه معاكى خطوة بخطوة علشان ما يحصلش غيرة و تظهر على طفلك الأول فى صورة سلوك عدوانى أو انعزالى أو حتى تدهور صحى و فقدان للشهية