منقولة عجبتني هالقصة 😂😂😂😂😂 مبارح عالسهرة كنت لابسة اللبس الميداني يعني (( البيجامة))😁 وعاملة كوكينة .. ومتربعة وكرشي مدحدح ومرحرح وعقلي وتفكيري محصور على كوز الرمان يلي أيد عما تفصفصو.. والإيد التانية عما تجرف متل الجرافة وارفعون لعند تمي يلي عامل زاوية منفرجة 😑 يعني بالمختصر كان شكلي لا يمت بالانوثة بِ صلة .. بس ما كتير كان هاممني المهم جواز و تجوزت 😏 عريس وموجود .. وجوزي تعود وأصلاتا" ما بدقق ولا بيحكي 😎 رن جواله عالساعة عشرة .. طلع ابن عمو .. قلو: وك كيفك ابن العم .. بعد زمان والله رد ابن عمو وقلو: تتذكر البنت يلي كنت حبها .. طلبتها اكتر من مرة وأهلها رفضوا .. لاني فقير ومعتر .. قررنا انا وياها نهرب وهربت معي .. وهلق مستأجر بيت على قد مصاريي .. والي أسبوع .. سكنت بالحارة عندك قوم تعا نكسبك بسهرة وجيب مدامتك .. واخوك .. ونعرف مرتي عالعيلة .. قاعدين ماليين😎 قلو: على راسي ابن العم نص ساعة بالكتير بنكون عندك 😊 قلي : حزري شو ؟؟ ابن عمي تجوز خطيفة .. قومي نروح زيارة لعندون ونباركلون .. ومنو بناخدلون دزينة صحون وكاسات .. ورح نقطو مصاري خطيّة حالتو على قدو .. وماعندو شي وبيتو فاضي 😢 انا فورا" دب الحماس والشعور الإنساني بدمي .. شلفت صحن الرمان ومسحت الشراشير الحمرا تبع الرمان يلي ع تمي .. بكمي😁.. وركضت وين في شغلة مابدي ياها إلا ودحشتو بالكيس .. كاسات كل موديل شكل.. فناجين ادنيها مكسورة .. صحون من كل قطر أغنية .. تياب مهترية .. شراشف رايحة ألوانه .. حتى زعلت عليها انو عروس جديدة وطلعت خطيفة وما طلعت معها شي غير تيابا يلي لابستون.. قلت خليني اخدلها كم دلوعة وتفريعة من عندي على أبو كم قلم حمرا وظل.. وهدوليك الحركات 💄👗👙👚 نكتت خزانتي وين في تفريعة صفيانة بلا ريش دحشتا بالكيس .. ووين في قلم حمرا ابني أكل نصو دحشتو 😁 مبسوطة وطاير عقلي على عمل الخير يلي رح اعملو .وأكيد بالغراض هي رح إكسر عينها وتصير تستهاب مني 😎. وأساسا" هنة رح ينبسطو فيهن .. لانن محتاجين .. والمحتاج مارح يدقق على الكمااليات ..بس رح يهمو الأساسيات 😌 خلصت واجيت لعند جوزي أبو حدو وحاملة معي كيس كبير .. وقلتلو يله انا جاهزة. دق لأخوك يجي 😎 قلي هيك رايحة بالبيجامة؟؟ قلتلو معلي حبيبي مشان ما حسسها انو انا احسن منها ورح كون طبيعية مو قلتلي بيتون براس الحارة هون ؟؟ قلي : صح معك حق بس زبطي شعراتك عالقليلة .. رحت عالمغسلة لكّيت شعراتي بلقّاطة حمرا .. وحطيت شوية حمرا على تمي .. ولبست الزنّوبة .وطلعنا 😊 دقينا الباب وفتنا وقعدنا بالبيت يلي يا حسرتي عليه شو منتوف 😢 راح جوزي أبو حدو وعبطو وباركلو وعطاه ظرف المصاري نقوط .. وأخوه كمان نقطو بمصاري .. وأنا عابطة هالكيس بحضني وكءني حاملة كنز علي بابا 😎 قعدنا حكينا وضحكنا كيف هيك تحدو الصعاب وتجوزوا وماخافو من حدا 😁 فجأة سمعت صوت كعب عالي عم يطقطق وانفتح الباب ومرتو حاملة معها الضيافة😑 انا عيوني فورا" بلشت تطّلع على هالكعب يلي عم يرن رن .. بزمتي عما اكتب وماعارفة اكتب الوصف .. لانو كل ما أتذكر برجف 😭 بعد ما فاتت العروس جوزي وأخوه فتحو تمهم ورخو حنكهم 😢 انا اخدت وضعية المصعوق المفلوج .. بلشت انا وجوزي وأخوه نطلع بطلوع من عند الكعب أبو 15 سم .. لعند أصابيع البوبو يا خيار .. عليها طول متل عرق الفول .. بيشبه العود .. انا طلعت قدامها أبو كاعود😢. عليها جسم خزيئ .خارق حارق متفجر .. مو متلي انا جعفر😱 الشعر اسود طويل وناعم عكتافها نايم ..مو متلي انا متل شعرات الخضرجي أبو كاسم 😓 العيون خضرة .. وعالمكياج متل القمرة وانا حدها قد البقرة 😭 صوتها وهي عما تحكينا ناعم وحنون .. وصوتي قدامها متل الحشاش يلي عايش عالتتن والاركيلة والمعسل بالنعنع واليمون 🌱🍋 كلو لابستو من أحسن ما يكون .. إستقبالها كان كتير راقي .. وضحكتها بتشل .مو متلي انا قد ما نعمت ضحكتي بتطلع معي نيااااهع هع هع هع 😢 منظر جوزي وأخوه بيشبه افلام كرتون تبع ((توم وجيري)) ..وقت تمرق القطة الحلوة قدام القط جيري 😭 .. بزمتي شفت جوزي بس راحت تاخد الصينية نكش أخوه مشان يشوف مناكير أصابيع رجليها شو حلوين 😭 انا عبّق وخنّق وجهي ..صار بيشبه الصوبيا يلي معبقة وبدها ثواني لتنفض 😓 قالت العروس لجوزا .. بيبي ما عرفتنا عالهالوجوه الكريمة😍 جوزي فات بألف حيط قلا انا ابن خالو ... قصدي ابن عمو اللزم 😅 وهاد ابن عمتي الصغير .. قصدي قصدي أخي الصغير😅 خربطنا بنبلش😅 وهي مدامتي 😒 فورا العروس اطلعت علي وقالت OMG😱 ياعمري عليكي ليش باينة أكبر من جوزك 😱 انا هون كان باقيلي نكشة لإنفجر .. جحرت على جوزي ... ورفعتلو حاجب ونيمت التاني ونترت الرقبة والراس .. يعني هديك الحركة تبع ؟؟.. عالسريع خلينا نمشي 😡 والله فز جوزي على أربعتو ولا كلمة ..لانو بيعرفني وقت تجيني الجنّونة 😷 وصلت على بيتي النار عما تشعل جواتي .. غيرانة منها ورح جن ... رح افقع .قال أنا مبينة أكبر قال . تخانقت مع جوزي كيف متل الاجدب قلب قدامها .. بلشت عصب وشلف كلشي حواليي متل آندير تيكر .. جوزي ساكت تركني عبر ما بداخلي .. فجأة رن جوال جوزي وطلع ابن عمو وقلو : شو ابن العم نسيان كيس الزبالة عندي كبو انا ولا انتا تجي تاخدوا تكبو 😂😂😂😂😂😂😂