مثل هيج يوم وهيج ليلة ب١٣ / ١ /٢٠١٨ كانت ليلة سودة وليلة ما أتمناها لعدوي وكلما اتذكرها وكأنما صارت البارحة وسبحان الله اني قبلها شهر كامل وضعي مو تمام اختنك واحس روحي تريد تطلع واحتصر وابجي على شنو ما ادري الدنيا الواسعة ضاگت بعيني وفعلا بهذا اليوم عرفت ليش هيج صار بيه طلع هذا انذار اليه بهاي الليله ! اطفالي ما بيهم شي يمشون ويلعبون بس مالهم خلك هم ما اعرف ليش حتى گولت لأبوهم اشوف ابني احمد الصغير ضايج ووجها متغير هاي الايام وحتى ضحكته باهته مو مثل قبل گلي لا توهوسين ماكو شي سبحان الله يعني هم الام تحس بأطفالها وهم الطفل يحس بالقدر اللي ينتظره! بذيج الليلة اجاني ابني طلب اكل من كل مواعين العشا واحنا دنحظر بالعشا واي شي يطلبه انطيته اله بس ما ياكل بس يأشر ويريد وما اكل وراها بشوية اجاني يركض يريدني اشيله وهو مستحيل بهيج وقت يطلب مني هيج شي بس هم شلته وخليته على ظهري وهو يدندن بكلمات ما اعرف شنو ! وراها شخر ووكع راسه على كتفي باوعت عليه ما احس الا انشمر جثة وصار بين ايدي بس يتقيأ ويبلع بالقيأ اني صيحت عالي صوتي اخذناه اني وابوه نركض للمستشفى وبالسيارة نسويله اسعافات وصلنا المستشفى اجوي الدكاترة ضربوا على گلبه ويحركون بيه ويدورون على وريد ماكو اباوع على ابني مفتوح نص عين وما يستجيب بهاي الاثناء اني هنا صرت بحال ما ينوصف بس بعدهم يحاولون وشككوا ملابسه وضلوا يسعفون اكثر من دكتور اني أيست والناس صارت اعداد مو طبيعية كلها تتفرج والاقارب والعشيرة كلها حظرت اول مرة ادخل بهيج وضع وهيج ضوضاء الدنيا تفتر بيه ساعة اكول هذا حلم وهسة افز منه ومن اباوع على ابني شلون منزعينه بهذا البرد وعلى جلدة السدية وهم بعدهم يحركون بيه كلتلة دكتور شنو ليش احمد ميستجيب يباوع علينا بتردد وخوف يكول( مات) كلتلة دكتور گول مات مو خطية الولد جسمه على الجلدة والدنيا باردة شلته وخليته بحظني واحجي وياه بصوت ناصي بأذنه اگوله ماما احمد اگعد ادري بيك فاقد وهسة تگعد ماما افتح عينك لان راح ياخذوك مني وبعد ما اشوفك واحرك بگلبه واتوسل بيه ماكو فائدة اقاربي عبالهم اتخبلت ما احس الا جروه مني واني بلا وعي وهيج بسرعة لحظات ودقايق سريعة صار جثة ! اخذناه للبيت فررناه بالبيت وابوه شايله يحجي وياه يكوله بابا هنا جنت تنام هنا تلعب هاي ملاعيبك وهذا بايسكل مالك شلون بعد ما تصعد بيه سوى عدنا انهيار الاقارب والجيران كلها بالبيت تتفرج على مصيبتنا اللي مو ع البال وراها ابوه گله بابا اني متعود اذبحك وگلتلك اليوم بليل اسبحك وفعلا دخل للحمام سبح ابنه ويگوله هاي اخر سبحه الك هنا😔 خليناه بالاستقبال فرشت فراشه ووجهناه للقبلة واحنا للصبح يمه ننتظر شوكت يفتح عينه ! بس احمد نايم و ورموشة الطوال كالساع اتخيلهن يتحركن لا اله الا الله صار عزائه ٣ ايام والعشيرة كلها حظرت والحظور مو طبيعي من كل المحافظات والناس ما قصرت عبالك شاب ومتوفي ولا عبالك طفل وثاني يوم العزاء جبنا كيك وشمعة السنتين لان قبط سنتين ثاني يوم وفاته وصينيته اني سويتها ولميت شكو طفل وجمعتهم وكلتلهم احمد ويانا يلله كلنا خلي نقراله انشودة العيد ميلاد وفعلا يصفكون فرحانين وكلها واكفه وصاحب العيد ميلاد ماكو اني وياهم اصفگ وابچي ونسوان العزاء يبچون وياية عبالهم مو بوعيي .وراها ضليت سنة كاملة معلولة ومحد يعرف شبيه والف الحمد لله عبرت هاي المرحلة ويا رب يحفظكم ويحفظ اولادكم ولا يشوفكم مكروه #اسفة بس شأسوي لازم اخفف اعتبروني اختكم وحجيت اللي بگلبي 😔 كلما اتذكر ركضة ابني عليه بيومها اشبع قهر گلت لعد ابني من شاف عزرائيل اجاني يحتمي بيه ميدري القدر اقوى مني ومنه !#وبالحلم من اجاني گلي اريد أحظنج اجى ونام بحظني ويحرك براسه حيل يريد يدخل بگلبي عبالك ومن سألته لعد ليش تركتني گلي ماما والله ما ردت اروح بس هم خطفوني منج اجباري وهم رجعت اتذكرت ركضته عليه ! انا لله وانا اليه راجعون 😔