نصائح عامة .. لاي وحدة تفكر انها تنجب اطفال .. 1 * الزواج من الاقارب فوتيه .. مشاكل وراثية واغلب المتلازمات يجي من زواج الاقارب .. 2 * لو اتزوجتي لازم تصبري سنتين بالضبط لو مافيش حمل وقتها امشي للدكتور وتابعي مش من اول شهر تسمعي كلام حناك وحماتك علاش مافيش صغار .. 3 * لو صار حمل تابعي في الشهور الاولى حتى كل اسبوعين وبعد 5 شهور من الحمل ديري بالك لان الالتهابات والمشاكل وكل شي ممكن يدخلك في ولادة مبكرة .. 4 * لو سخر ربي وكملتي حملك ل 9 اشهر ع خير حاولي تجيبي طبيعي لانه افضل ليك ولطفلك ..الطبيعي العيل ينعصر وكل السوائل تطلع من جسمه والرئة تطلع جافة بعكس القيصري البيبي يفتحو عليه وكانه غارق في امية والرئة تطلع مش جافة ومرات يدهش ويخش الحضانة ( يسموها الدهشة المؤقتة لحديثي الولادة ) وزيدي عليهم مشاكل التخدير وخياطة البطن وان البطن ماتتحملش هلبا خياطة وفتح وكل قيصرية محسوبة عليك .. 5 * فصيلة دمك ومشاكل المرضية المزمنة زي الحساسية مفروض تعرفيهم وتبلغي اي دكتور تراجعي عنده (هلبا يوم الولادة متاعها تقولك مانعرفش فصيلة دمي تقول دمها جديد واول مرة تسمع بيه ) فصيلتك سالبة لازم طبيب الاطفال يعرفها لانه حيسحبو من طفلك تحليل خاطر مشاكل الصفير ومرات مشاكل تكسر الدم وتضارب الفصائل بينك وبين طفلك وماتنسيش ابرة الفصيلة (لو انتي سالبة وطفلك موجبة لازم تاخدي ابرة الفصيلة ) ولو الزوز سالبات مافيش داعي تاخديها .. 6 * بعد تجيبي طفلك رضعيه طبيعي .. مافيش دسكة ماعنديش حليب لانه الحليب باش ينزل لازم الطفل يرضع الحلمة ويتحفز عندك هرمونات اللي تساعد ف ادرار الحليب والرضاعة الطبيعية تساعد في انقباض الرحم وتحمي حتى من سرطانات الثدي ف المستقبل وتعطي مناعة لطفلك .. 7 * بعد يجي طفلك قوليلهم هاتوه حطوه ع خدي او ع بطنك المهم احضنيه وسكري راسك ع الرضاعة الطبيعية .. 8 * بعد تروحي بيه الحوش (الشيطان الازرق مايشوفاش ولا تخلي حد يبوسه ولا يقيمه ولا يمزرطه لا حناك ولا حد ) درتي اسبوع درتي لمة هادا كله طفلك ماليشي علاقة بيه خليه بعيد عن الزحمة والدوشة ..وبالله اختاري اسم كويس بلاش من الاسماء الغريبة والتركية ... 9 * الكحل والوشق والكمامين والجاوي وجو التعليقة ف وسط الحوايج والقرين اللي في راسه .. ياودي مافي حد بيضربه بعين غير سمي عليه بسم الله ودعاء وبس ... 10 * الدوش تالت يوم اليومين الاولين مسح بكلنكس بس . 11 * التطعيم وانتي مروحة من المصحة طعميه .. 12 * لازم تعرضيه للشمس من الايامات الاولى ولو ربع ساعة (خايفة من الصقع عندك شمس تخش لداره افتحي البرسيانة وسكري المرش وخليه يتعرض للشمس او في السيارة ) ولبسيه عادي مش تلبسيه الدولاب كله لانه حيعرق وابسط نسمة حتى دافية حيمرض ... 13 * القماط مش كويس ( لانه لما ينشحط مرات يصيرله ارتخاء ف الحوض وخاصة في البنات ) ارحميه مسكين مطبقتيه ع بعضه ولو تبي تعرفي اول ماتفكي القماط شوفي كيف حيتكسل طول .. ولو مسكرة راسك ديريه من فوق بس وخلي رجليه بدون قماط ... 14 * الحاجات اللي بياخدهم بعد الولادة ( فيتامين د وبودرة مضاد حيوي للصرة وقطرة غازات وقطرة املاح للانف ) رضعي طفلك وقرعيه كويس وماتخليشي تجيه الشهيقة هلبا لان لما تجيه معناها العيل راضع فوق اللازم ( مش رباية العيل زي ماتجري بيكم الحاجة تبرا ) ويرضع مايل وبعد الرضاعة يرقد مايل 45 درجة وكانه نص مقعمز باش مايرجعش لانهم كلهم عندهم اتساع بسيط ف المرئ يتنحى في عمر الست شهور ... 15 * الصرة تنظفي عادي بكحول طبي وتحطي بودرة المضاد ( مش كمون حوت وكحل وطياح سعد ) .. 16 * عيونه تنظفيهم بقطرة الاملاح ويمتسحو بكلنكس جاف وخاصة لو يزبطو ويديرو ف عمش كل صبح .. 17 * الماكلة من بعد 4 شهور وديما تبدي بخضرة زي القرعة والسفناري اطبخي واضربي ف الخلاط وعطيه بالشوي بالشوي لانه لو تبديله بالحاجات الحلوة بيتعود ع الحلو بس ومعاش ياكل الخضرا حتى لما يكبر .. 18 * بعد الست شهور وكليه عادي حاجات تانية ..وحاولي ماتعطيش الخبزة لبعد السنة لانها مرات تديرله حساسية لانها فيه بروتين الغلوتين يسبب حساسية .. 19 * العسل وحليب البقر ممنوع قبل السنة لانه فيهم بكتيريا ماعنداش ليها مناعة وبعد السنة عادي .. 20 * لما يمرض بحرارة او اي شي ارفعيه طول للدكتور مش تجري بيه الساعة 3 ف الليل وتقولي للدكتور انه مريض من 4 ايام فاتو لانه حيخرط عليك .. 21 * طفلك عيونه في البداية حيجو شهب او زرق لانه مش متعرض للضوء بس واول مايتعرض حيتتنشط خلايا الاصباغ وحياخد لونهم الليبي القهوي ولا الاكحل وبيطلع زي اماليه ( لدلك ارخي روحك وماتتجكتريش قدام الناس راه ولدك ليبي مش اوروبي ) .. 22 * لو جاته حرارة بالله عليك اوخيتي ديري دوش بمية بس مش تنقعيه ف الخل والزيت والليم وبعدين تجيبيه للمصحة وتقتلينا بالريحة .. 23 * في مصحات وفي مستشفيات لما يمرض ارفعيه ليهم مش ترفعيه للحاجة تبرا تلشطه ولا تكويه .. ولا اداكا الشيباني متاع بوخنفوسة اللي يحط في الخنفوسة بحدا خشم البيبي ولو قرصاته معناها ولدك عنده الطيرة ويحطهاله في دبشه وتقعد معاه شهور ولما تطلع الخنفوسة من دبش العيل معناها هكي شفي ... هادا سحر وجهل واظني حتى كفر .. 24 * مافيش حاجة اسمها الطيرة وخزعبلات العزايز .. رانا في 2020 والناس وصلت للمريخ واحني نحطو ف الغربال بحدا راس العيل باش ماتجيش الطيرة اللي ماعمره واحد شافها اصلا .. لو عندك استعداد تديري الحاجة هادم تزوجي وجيبي صغار والا ريحي روحك لانها اعظم امانة انك تربي طفل .. حقا نسيت لو اتزوجتي ماتتجكتريش ع البنات صحابك لانه الشي هادا طبيعي ويصير كل 20 ثانية ف العالم لدلك هدئي من روعك ولا تصبغي شعرك اصفر .. بعد النصائح هادم لازم تربيه اخلاقيا ومش دلع زايد باش لما يكبر يا يطلع دكتور ولا مهندس يا اما مليشياوي ويرفس في خلق ربي .. وفي الحالتين بيدعو عليك الناس او بيدعولك .