مرحبا حبيباتي واخواتي الي شاركوني كل لحظاتي الصعبه ولحظات الانتظار .. حبيت ابشركم ولدت البارحه ف المساء الساعه ٨ وجبت حمودي حبيبي ولله الحمد والمنه طبعا الي متابعيني عارفين اني بكريه اول حمل و خلاص على اخر التاسع ف الاسبوع ال ٤٠ كان باقيلي يومين واخلص شهري .. لكن شاء الله انو خلال اخر مراجعه ليا عند الدكتوره لقينا المويا بدت تقل على الجنين وبالتالي نقصت الحركه والرحم عندي مازال مسكر مو فاتح ولا نص سم وراس البيبي تحت لكن مو داخل ف الحوض .. قالتلي دكتورتي ماني مطمنه عشان حكاية المويا وقل الحركه والافضل نولد قيصري خلاص رجعت البيت واستخرت الله وفكرت وقررنا نتوكل على الله وجيت مستشفى هاله بن لادن اليوم العصر الساعه ٤ وعملت التحاليل اللازمه ودخلت قيصري وولدت الساعه ٨ العشا ً.. وسبحان الله لقو البيبي متبرز اصلا ف بطني وكان تعبان شويه بس الحمد لله لحقوه وشفطوله كل شي والان صحته كويسه قالتلي الدكتوره الحمد لله اننا طلعناه اليوم سبحان الله لو كان تاخر اكثر كان تعب وتاثرت رئته لاسمح الله بسبب التبرز .. لكن رحمة الله الهمتنا وطلع في الوقت المناسب والف حمد وشكر لله .. وبس حبايبي هذي قصة ولادتي انا الان مرقده ف المستشفى يومين عشان العمليه ويارب يقويني ويفرحكم جميعا بشوفة اطفالكم بصحه وسلامه يارب