العضوة: 782632 , 5 years ago

@user-774204 وين طلعوا الله يجمعكن يا رب

العضوة: 774204 , 5 years ago

امين يارب

العضوة: 774204 , 5 years ago

أمين يارب اشي في الاردن واشي بتركيا

العضوة: 782632 , 5 years ago

@user-774204 مهم بخير طولي بالك

العضوة: 743708 , 5 years ago

أعدت بالمكتب .. شغلت السيكارة وسندت راسي ع الكرسي .. رن موبايلي كان عباس كان عم يحكي معي وكأن في بيناتنا صحبة قديمة .. عباس : شو الاخبار سيد صلاح شتقنالك صلاح : اختصر سيد عباس عباس : له له .. شبك زعلان ومكتئب اكيد مرتك السبب شوف هن النسوان مابيجي من وراهن غير النكد ووجع الراس سماع بقى اليوم عازمك عسهرة تنسيك احسن مرة صلاح : هالشي مابخصك .. طلبيتك وصلتك وخلصت ولو في اي غلط تفضل احكي لاتصرف .. عباس : هههههه معصب معصب صلاح : انت عم تحاول تستفزني ؟ شو بدك بالضبط ؟ عباس : الباشا بدو يشوفك صلاح : أيا باشا ؟ عباس : شريف بيك صلاح : بيك هههه سماع لقلك ألعابكن مابتمشي عليي .. لهون لابقى تتصل ابدا عباس : رح أجي لعندك عالمكتب ونتفاهم .. سلام قفل الخط وبعد شوي وصل لعندي عالمكتب .. دخل وهو مبتسم : فهمتنا غلط ياسيد صلاح .. نحنا كل همنا نكسبك شريك صلاح : انت عم تتمسخر ولا شو ؟ صدقني بالي مو فاضيلك لا انت ولا الباشا تبعك عباس : طيب تعا معي عالسهرة وبوعدك ماتكون غير رضيان ياسيدي وبحكيلك كلشي بدو ياه منك الباشا وكلو بتمنو .. صفنت و انا عم بسحب من سيكارتي بقوة تحرق نفسي .. هزيت براسي : موافق رحنا سوا على كباريه كان في حجز طاولة باسم عباس هنيك رحبو فينا هو شكلو زبون دائم ومعروف .. اعدنا ع الطاولة : يلا احكي يلي عندك .. عباس : مو قبل مانشرب شي يروق راسنا شبنا .. صلاح : ماشي عباس : شوف استاذ صلاح .. الباشا بدو منك خدمة صغيرة مقابل مبلغ كبير كتير ... صلاح : خير شو الخدمة .. عباس : في شحنة بضاعة جاييته من برا ولو استلما باسمو رح يصير عليه مشاكل و ضرائب كبيرة وهالشي بسبب الكميات الكبيرة يلي بيستوردها من برا .. الخدمة انك تستورد هالبضائع على اسمك وبس وتتعامل معها وكأن الك .. بالمقابل رح يصرفلك شيك قيمتو مليونين .. صلاح : هاااا ومعقول الضرائب تكون اكتر من هالمبلغ يلي رح يعطيني ياه ؟ عباس : فيك تحكي بعشرات الملايين

العضوة: 774204 , 5 years ago

أي والله الحمدالله

العضوة: 743708 , 5 years ago

يلي رح يعطيني ياه ؟ عباس : فيك تحكي بعشرات الملايين صلاح : وليش اخترتوني الي ؟ في كتير تجار اكبر مني و افهم مني عباس : لان ماحدا رح يشك انو البضاعة مو الك والكل رح يفكر انو عم تستورد من برا لتوسع مجال شغلك .. صلاح : موافق .. عباس : معناتا لما نطلع من هون رح اعطيك المصاري --------- رجعت بوقت متأخر عالبيت كانت الأضوية كلا مطفية ارتميت عالكنباية ونمت للصبح فقت على صوت موبايلي كان عباس عم يتصل : كلشي صار جاهز باقي انت تروح تدخل معلوماتك مشان الاستلام وعالاغلب رح تستلم اليوم المسا ... ويسعد صباحك يا افندي

العضوة: 743708 , 5 years ago

صلاح : طيب .. شوي وبرجع بتصل فيك لأعرف التفاصيل يلي بدي اعملا . اول ماوصلت عالمكتب كان التاجر يلي اسمو نزيه ناطرني فتحت الباب ودخلتو .. صلاح : قلي ياعم في شي لازمك شي ؟ نزيه : انت لازمك شي ؟ استغربت منو : لا نزيه : انا بعرف بحادثة وفاة زوجتك وبنتك الله يرحمهم ويمكن الحادثة أثرت على نفسيتك وعملتلك ضغط وفراغ ...بس ياريت تملي فراغك بشي يفيدك ماتضيع حالك وتتورط يا ابني . صلاح : انت عن شو عم تحكي ؟ ماعم بفهم عليك ... نزيه : انا اجيت لحتى حزرك .. ومعتبرك متل ابني سليم وخايف عليك صلاح : عمو ابو سليم كل انسان الله خلقلو عقل وقادر يفكر و انا مستحيل اترك حدا يضحك على عقلي ...يكتر خيرك عالنصيحة بس في شي انا شايفه مناسب و انشالله مارح يكون غلط .. نزيه : طيب .. الله يهديك .. عنئذنك طلع من المكتب و انا سحبت سيجارة و اخدت تلفوني واتصلت بعباس خبرني كل الشغلات يلي بدي اعرفا بعدين طلعت زبطت وراق الاستلام ودفعت المبلغ يلي اعطاني ياه عباس .. استنيت للمسا لوقت وصلتني البضاعة ... الساعة 9 المسا كنت واقف انا وعباس وعم نستنا صلاح : انت بتعرف شي تاجر اسمو نزيه عيد ؟ عباس : لا ابدا .. مين هاد ؟ صلاح : ولاشي هو تاجر و اتوقعت انك بتعرفه يعني لان بتعرفو كل التجار عباس : لا مامنعرفو والأحسن الك و لراحة بالك انو ماتجيب سيرة شريف بيك لأي حدا لان هو مابحب الناس تضل تحكي بسيرتو .. بعد شوي وصلت البضاعة وقعت ع الاستلام وأمنت عالشباب يلي رح يوصلو البضاعة للمخازن ورجعت عالمكتب اعدت لحالي .. بعد شوي اندئ باب المكتب بطريقة مزعجة ، قمت وفتحت الباب وانا معصب وعم صرخ ليلي عم يدئ ... فتحتو طلعت بوجهي دورية شرطة : حضرتك صلاح ؟ صلاح : اي تفضل الشرطي : شرف معنا عالقسم صلاح : خير شو عامل شوفي ؟ الشرطي : هنيك بتعرف .. ----------

العضوة: 743708 , 5 years ago

( قبل شهرين ) كنا آعدين بحديقة البيت والدنيا ليل وعتمة وهدوء .. السما مليانة نجوم ونجمة بحضني بين ايديي عم نتأملن سوا صلاح : نجمة .. بتعرفي ليش سميناكي هيك ؟ نجمة : لأن انت وماما بتحبو النجوم .. هيك الانسة قالتلي صلاح : لأ .. نجمة : ليش بلله ؟ صلاح : لان كان بدي كل ماكون بعيد عنك اتطلع بالسما وكل ماشوف نجمة اتذكرك واتذكر انو لازم كون قوي فيكي .. آخد نور عتمتي من وجودك يانجمتي الحلوة .. تذكرت هالحكي وانا بسيارة الشرطة وعم اتطلع من الشباك عأكتر نجمة مضوية بالسما .. تذكرت انو نجمة معي وجنبي .

العضوة: 743708 , 5 years ago

وصلنا عالمخفر دخلت عمكتب الضابط . كنت واقف وصافن ماني فهمان شي ولا عرفان ليش انا هون . الضابط : اهلين استاذ صلاح .. خير خير شو عامل صلاح : مابعرف .. الشباب جابوني ومافهموني السيرة الضابط : مافي شي خطير حبيبي مشكلة بسيطة كتير صلاح : طيب شو تهمتي شو عامل ؟ الضابط : مخدرات صلاح : شووو .. انا بحياتي ما قربت عهالشغلات وحتى ما جربتا بعمري عملولي فحص للدم وتأكدو حتى الضابط : بس ولاك لاتحكي غير لما انا بسألك .. هزيت براسي وسكتت ، كنت حاسس بخوف كبير بقلبي وتغيير لوني وفي وجع راس حاسو من جوات دماغي وحتى الجرح يلي ببطني حسيتو صار يوجعني .. الضابط : انت شو بتشتغل ؟ صلاح : تاجر صغير بالدهان ومواد البناء الضابط : شو كانت البضاعة يلي استوردتا اليوم ؟ صلاح : دهان و اكياس اسمنت الضابط : ومزال انت قلت انك تاجر صغير معناتا كيف جايب طلبية كبيرة وسعرا ملايين ؟ صلاح : الطلبية مو الي هي بصراحة لشخص تاني بعرفو الضابط : ليك لا تلف وتدور وتقلي لشخص تاني وتالت .. الطلبية باسمك والمصاري محولين من اسمك والتهمة لابستك لبس . صلاح : ياسيدي مشان الله .. خلوني اتصل بالزلمة صاحب البضاعة والله انا مادخلني لاتبلوني الضابط : تعا يا أنس خود صلاح عملو سهرة مرتبة بس بدون ضرب لان مجروح . صلاح : ياسيدي فهمني والله مادخلني . اخدوني عالزنزانة وحبسني ضليت اعد عالأرض لحالي ، عتمة وبرد وتعب .. انسندت عالحيط و انا عم ابكي صوت نجمة وشوق ماعم يروح انا سامع صواتهن معي ، صدى الضحكات ...

العضوة: 743708 , 5 years ago

نمت ، و الصبح فقت على صوت الحارس عم ينادي باسمي وقلي لعند الضابط يلا .. طلعت لعندو كان قاعد ورا المكتب : شلون لقيت النومة عنا مريحة لاتقلي صلاح : سيدي والله مادخلني @rwayate الضابط : صاحب البضاعة سلم حالو و اعترف انو انت ما الك علاقة و برئك من التهمة لهيك انت رح تطلع هلئ ولو عرفت انك رجعت تشتغل هالشغل صدقني لعلق مشنقتك .. صلاح : سيديي مين يلي سلم حالو ؟ عباس ولا شريف ؟ الضابط : رح عد للتلاتة ازا ماصرت برا المكتب رح رجعك عالزنزانة طلعت من عند الضابط ورحت على مكتبي .. اول ماوصلت لهنيك كان في كم واحد من اصحاب المحلات واقفين مع بعض .. رميت السلام وكملت طريقي ، ناداني واحد منهن : صلاح صلاح صلاح : ايوا ماعرفت مين اتوفى ؟ صلاح : لا مين ؟ الحجي نزيه صاحب المحل يلي ورانا طلعت عالمكتب واتصلت برقم عباس ماكان يرد عليي بعدين لحتى رد .. حكالي انه رح يجي لعندي ويفهمني كلشي .. اول ما اجا خبرني انو في حدا كان مدبر الموضوع وحاطت مخدرات بقلب علب الدهان والبضاعة و انكشفت الشغلة ولما عرفو انه باسمي اجو واخدوني بس شريف بيك بعت حدا من رجاله وخلاه يحمل التهمة عني ويعترف انو البضاعة الو و انا مابعرف شو المدبر مجرد تاجر وعم اتعامل معه .. طبعا القصة كلا مادخلت لعقلي و انا متأكد انو التهريبة كان مخططلها من زمان ويلي صار مقصود صلاح : حزروني من الشغل مع شريف بس ماصدقت وهلئ تربيت فعلا عباس : يعني ماعد بدك تشتغل معنا ؟ صلاح : لاقو غيري عباس : بالنسبةة لشريف بيك فأي حدا بيدخل معو مابيطلع عايش لهيك احسنلك تدير بالك صلاح : عم تهددني يعني ؟ عباس : لا ابدا بس لاتنسى انك متورط بتجارة المخدرات يعني بسلامة سمعتك بالسوق بكلمة وحدة ببطل حدا يتعامل مع واحد نصاب وتاجر بالممنوعات وغير هيك شريف بيك قادر يبعت حدا يقول انو الرجال تعرض لضغط وتهديد من حدا من عيلتك ولهيك راح حمل التهمة عنك يعني رجال شريف بيك عالموت .. وبالمناسبة اقرا الفاتحة على روح صاحبك نزيه .. سلام ياغالي ..

العضوة: 743708 , 5 years ago

كنت عرفان انو يلي صار لعبة لعبوها عليي كرمال ياخدوني لصفهن ويمسكوني من إيدي يلي بتوجعني الجنب الأول ينزعوا سمعتي بالسوق والناس لما تسمع هيك ماعد رح توثق فيني ولا توثق ببضاعتي ولا تأمن تتعامل معي والجنب التاني هو التهديد الواضح بالقتل .. معقول موت نزيه الهن علاقةة فيه ؟ .. بعد شوي اجا رفيئي سامح أعد معي : شو صاير ؟ صلاح : تركني بحالي وبهمومي .. سامح : لك صلاح مابدك تحكي مع امك و ابوك والله محروق قلبن عليك مبارح أمك حكت معي وهي عم تبكي وبدا ياني فوت واسطة بيناتكن صلاح : أمي ما أذنبت بشي بس أبي مستحيل فكر اتطلع فيه ... و حالف على أمي بالطلاق ازا بتشوفني سامح : ليش انت وابوك هيك علاقتكن ؟ صلاح : لأن بدو ياني كون تحت أمرو بكل شي .. بدو يتحكم بحياتي من كل مكان .. سامح : صحيح قبل ما أنسى في تاجر بدو شريك هو بيعطي راس المال والشريك عليه الشغل .. وبصراحة حبيت فيدك الك لان الرجال موثوق اذا بتحب باخد منه موعد لنروح لعندو ... صلاح : طيب .. خود موعد لنشوف الوضع

العضوة: 743708 , 5 years ago

راح سامح و انا ضليت لحالي بالمكتب .. سحبت سيكارة وشغلتا واتطلعت من الشباك كانت الدنيا ليل والجو في هوا قوي .. تذكرت سليم ابن نزيه .. كان عندي شوية أسئلة وجوابا هو سليم .. أخدت غراضي وطلعت على محل نزيه كان فاتحو سليم و عم يشتغل فيه بدال أبوه ، سلمت و أعدت معو .. صلاح : انا صلاح صاحب ... قاطعني : اهلا استاذ صلاح معروف حضرتك تفضل .. اعدت انا وياه .. صلاح : الله يرحم الوالد كان زلمة محترم و بحالو مايغلط مع حدا سليم : تعيش .. هو الآدمي والمنيح ماحدا بريدو . صلاح : كيف يعني ؟ سليم : ابي مات قتل في حدا قتلو خنقوه بالغاز . صلاح : طيب حكيلي كيف ومين وشلون عرفتو انو قتل ؟ سليم : ابي كان سهران بالمحل عم يخلص حساباتو ومارجع عالبيت لما نتصل فيه مايرد تاني يوم قررت اجي عالمحل .. كان المحل مسكر وفي ريحة غاز طالعة منه .. فتحت الباب لقيت انينة غاز مفتوحة وابي وجهه أزرق ومرمي ع الأرض .. الفكرة انو نحنا ماعنا غاز بالمحل ولا عنا أدوات مطبخ فشو يلي جاب الأنينة بهاليوم بالزات عالمحل .. وغير هيك لما اجا الدكتورة وفحصو قلي سبب الوفاة من الغاز بس كان في أثر لضربة على راسه .. الدكتور قال ممكن تكون حدا ضاربو وبعدين حط الغاز ليبين انو الوفاة مجرد حادثة . صلاح : طيب مين يلي عمل هيك ، مين الو مصلحة ؟ سليم : انا بعرف .. بس مافيني آخد حقي صلاح : طيب حكيلي .. خليني ساعدك سليم : استاذ صلاح لو سمحت انا تأخرت كتير ولازم أمشي .. طلعت من المحل وركبت سيارتي ورجعت عالبيت ، كان الوقت متأخر وانا تعبان لهيك نمت دغري .. باليوم التاني اجاني اتصال من ضابط الشرطة يلي كان عم يبحث بقضية البولمان لما انقلب ، خبرني انو رح ينفتح تحقيق رسمي لان قضية البولمان كانت عن قصد مو حادث و رح يتابعو التحقيقات وبس يتوصلوا لشي رح يخبروني .. المشكلة انو مابدي اتذكر الشي يلي ماعم بنساه ، خليني عم بلتهي عن ضحكات نجمة وحركة شوق بالبيت .. ماني قدران فكر انوو هن ماتو و خلص وجودن من حياتي .. بس بنفس الوقت ماني قادر أتخيلن لسا معي ماني قادر اقتنع انو الأصوات يلي عم بسمعا هي مجرد تخيلات .. هن لساتن عايشين بقلبي بس تركوني لحالي وراحو ..

العضوة: 743708 , 5 years ago

طلعت عالمكتب ولما وصلت لقيت سامح ناطرني : طولت كتير صلاح : هاد وقتي بس انت شايفني بمنامك .. سامح : اخدت موعد من الرجال ، اليوم الساعة 7 المسا رح نروح رح امرئ اخدك بسيارتي الساعة 6 ونص بكون تحت البناية صلاح : طيب مستنيك .. سامح : يلا سلام باشا .. اتصل فيني عباس : اكابر ومن يومك اكابر صلاح بيك صلاح : شو بدك ؟ عباس : بدنا الرضا يامعلم صلاح : لما تحل عني انت ومعلمك رح يحل عليك الرضا ولو ماتركتوني بحالي يبقى الغضب رح ينزل عليك عباس : هههههههه حلوة الثقة بس مو عالكبار .. على كلن امك وابوك مشتاقينلك كتير كساب رضاهن .. ههههههه صلاح : هههههه غلطان ازا مفكر تهددني بأهلي بتعرف ليش ؟ لان صرلي 6 سنين ماتواصلت معهن وماني سائل عليهن ومابعرف ازا عايشين او ميتين ولا لأ .. فغيير الخطة تبعك لشي يفيدني اكتر منهن . @rwayate وسكر الخط .. حسيت دمي صار يغلي ، كيف وصلو لأهلي ؟ ماعد قدرت اتحمل خفت ليكونو عملولن شي لاهلي .. اتصلت فيهن ، ردت عليي بنت أخي الصغيرة وحكتلي انو تيتة عم تطبخ وجدو نايم .. سألتا عن صحتن وحكيتلا تنادي لتيتة لحاكيا .. اول ما اجت امي وقالت الو اتطمنت و ارتحت .. سمعت صوتا انو بخير ، وسكرت .. ماقدرت قلا ولا كلمة من خوفي عليها من حلفان أبي .. انجبرت احكي هيك مع عباس كرمال يحس انو أهلي مو مهمين بالنسبة الي ومابهمني وجودن وهيك بيبعد عن طريقهن وبدور على الشي التاني يلي يلوي دراعي فيه وطبعا هاد الشي مو موجود

العضوة: 743708 , 5 years ago

مضي الوقت و اجا سامح لياخدني على موعدنا .. طلعنا بالسيارة ومشي .. صلاح : انت من وين تعرفت عليه للرجال ؟ سامح : كنت قاعد عند واحد من صحابي التجار الكبار و أجا لعندو واحد بيعرفو سلمو على بعض وحكو بعدين قلو بدنا شريك للمعلم يكون اكابر و ابن حلال عليه الشغل وعالمعلم راس المال .. صاحبي قلو والله شغلي لفوق راسي مو خرج استلم شي جديد بس شوف سامح هاد الرجال يلي قاعد ومعروف بالسوق .. بس كمان انا ماعندي وقت وفضا للشراكة وشغل جديد .. فقلت ماحدا بوثق فيه غير صلاح لفيدك .. صلاح : ماقصرت ابو السمح ، الله يقدم الخير .. وصلنا عالفيلا .. كانت بتشبه القصر كبيرة ومكسية بشكل فاخر .. دخلنا لجوا كان صاحب الشغل قاعد عالكرسي وجنبو في تنين حرس مسلحين ولابسين تياب رسمية وواقفين باستعداد .. كان حاطت السيكار بتمو وعم يسحب ويبتسم .. سامح : مرحبا يابيك .. البيك : اهلا سامح : هاد صلاح .. صلاح هاد مروان بيك .. صلاح : تشرفنا يابيك .. بعد شوي واحد من الحراسة جاب شنتة كبيرة و أعطاها لسامح البيك : هي المبلغ يلي اتفقنا عليه ياسامح سامح : تعيش يابيك تعيش وهي سلمتك في شي تاني بتحب اعملو .. البيك : لا يلله امشي .. كنت عم اتطلع وصافن ومتفاجئ !! رفيقي باعني لناس مابعرف مين هن ولا بعرف شو بدن مني ... كرمال شنتة مصاري ؟ لهالدرجة العشرة رخيصة ... ضليت واقف وثابت .. مروان بيك : يلله ياصلاح احكيلي البضاعة وين راحت بهداك اليوم .. صلاح : مابعرف عن شو عم تحكي مروان : لا لا فهمان عليي منيح ... صلاح : بجوز مروان : مين أخد البضاعة ولاك .. انت الوحيد يلي بتعرف صلاح : و أنت غلطان لان مابعرف شي عن يلي عم تقولو .. مروان : يعني بدك تقنعني انو مابتعرف شي عنهن ولا معك خبر . صلاح : مو ضروري اقنعك بس بكفي انو هي الحقيقة . مروان : مو مشكلة رح تضل عنا زيارة لبين ماتقرر تحكي ..