العضوة: 743708 , 5 years ago

مسكوني الحرس و أجو بدن ياخدوني .. بحركة سريعةة ضربت اول واحد بوكس وسحبت المسدس من إيدو وحطيتو على راس مروان : لاحدا يقرب و إلا بقوص صرت جر مروان معي و انا حاطت الفرد على راسو هيك لحتى الشب التاني اعطاني فردو وصرت عند الباب .. دفشت مروان و ركدت بسرعة لجهة الشارع أخدت تكسي ورجعت على بيتي ... باليوم التاني اتصل فيني عباس وخبرني أنو في شنتة رح يجبلي ياها عالمكتب ومطلوب مني وصلا لأصحابا ... بالأول رفضت بس بعد ما صار يبتزني بقصة البضاعة ماكان قدامي إلا أنو وافق .. خبرني انو رح يجي بعد ساعتين .. بعد شوي دخل سليم ابن نزيه .. كان وجهو احمر وباين عليه متل المرعوب : استاذ صلاح بترجاك بترجاك لا تفوت هالفوتات .. انا عم حذرك اعتبرني أخوك كلامو كان غريب كتير : عن أيا فوتات عم تحكي ؟ سليم : الغلط نفسو يلي هلئ خطر ببالك ، انا بترجاك تبعد عنو لأن مانك قد نتيجتو .. صلاح : شو ماكان الشي يلي أنت بتقصدو رح قلك انو ماعندي شي أخسرو ... هاد طبعا إذا كان في شي غلط .. وبنصحك توضح عن شو عم تحكي .. سليم : انا رح امشي بس انساني و اعتبر انك ما عرفتني .. وياريت ماتخبر حدا باسمي او بإني أجيت وحذرتك مشان مايصير فيني متل اللي صار مع ابي .. بعد ماطلع سليم من مكتبي ، دخل ضابط من الشرطة وطلبني عالمخفر بدون مايقلي السبب ، بالبداية فكرت شي بخص عباس بس بالمخفر اكتشفت شي تاني تماما .. يلي عرفته انو رفيق سامح يلي عايش معه بنفس البيت مات بضربة سكين وكل الأدلة بتوضح انو سامح القاتل .. حكيت يلي بعرفو عن سامح بدون ماجيب قصة غدرو إلي وبعدين مشيت وطبعا اللي كان واضح من ملامح سامح ومن كل الأدلة انو هو اللي قتل صبحي رفيقو .. اخدوا سامح عالحبس لبين ماينتهي التحقيق ويتحول عالنيابة ، أما انا فرجعت على مكتبي .. رجعت على المكتب كان عباس

العضوة: 743708 , 5 years ago

رجعت على المكتب كان عباس واقف مستنيني برا ،.صار يسب بكلام مو بمحلو وهو عم يشتمني ويقلي مفكرني بشتغل عندك ولا مفكرني تحت أمرك ... صلاح : رح تسكت ولا شو ؟ على فكرة انتو يلي بحاجتي مو أنا لهيك احترمني .. عباس : هههه بحاجتك قلتلي . صلاح : لو لقيتوا البديل يبقى الله معي ... ماعلينا اعطيني التفاصيل وهي رح تكون آخر مرة بشتغل فيها معكن .. من بعدا انسوا وجودي عباس : بالنسبة لموضوع الشنتة فأنت رح تروح عالعنوان يلي مكتوب بالورقة وتستنا هنيك وبس يجيك اتصال من رقم خاص بتترك الشنتة وبترجع بدون ما تلتفت لوراك وبس ... اما بالنسبة لموضوع آخر مرة فهاد منحكي فيه بعدين .. يلا سلام ضبيت الشنتة تحت الطاولة بعدين سحبت سيكارة و أعدت عالكرسي .. يمكن لو كانو نجمة وشوق عايشين كان كلشي صعب حسيتو سهل .. يمكن ماكنت قربت من هالطريق .. كنت محتاج جنبي أي حدا .. أي حدا يوقف معي ويسندني ويدعمني .. لقيت حالي باخد التلفون وعم بتصل بأهلي .. يمكن صوت أمي كان يعطيني راحة بس ماتوقعت انو ابي يلي يرد .. أول ما قال الو ، سكرت السماعة ..

العضوة: 743708 , 5 years ago

صار موعد تسليم الشنتة أخدتا وطلعت بالسيارة .. الطريق كان طويل كتير وصلت لأماكن أول مرة بشوفا وفاضية ومافيا سكن ابدا .. وقفت عند العلامة يلي كانت شجرة واقعة على عرض الطريق وصرت استنا .. لحتى رن موبايلي .. أول مارديت في حدا حكالي تروك الشنتة و روح و إياك تلتف ع جنبك او وراك .. امشي بطريقك وبس عملت متل ماحكالي .. تركت الشنتة ومشيت وركبت سيارتي ورجعت عالبيت كل شي كان فايت ببعضو .. بعد شوي وصلتني رسالة على موبايلي من حدا عم يقلي افتح الباب ورح تلاقي صندوق . فتحت الباب كان في عالأرض صندوق بقلبو في قماشة مفرودة بشكل مربع على قياس الصندوق وبس ماكان فيه شي تاني .. سحبت القماشة كان تحتا في ورقة مكتوب عليها رقم وجنب الرقم مكتوب ' لو ماحكيت معنا رح تخسر ' اخدت التلفون و اتصلت .. رد عليي حدا بصوت عريض : كنت متأكد من اتصالك صلاح : مين انت وشو بدك بسرعة احكي الرجال : ههههه على طول معصب .. سمعني بلا كترة حكي بكرا الساعة 8 رح يتم التسليم عن طريقك ورح تاخد البضاعة لشريف أحمد .. بشارع القلعة القديمة .. صلاح : لاقوا حدا غيري ، انا ما دخلني ... الرجال : ههههه على فكرة بيت اهلك حلوو .. بس لو الشباك اكبر من هيك ...بتعرف موقعو يلي جنب الشارع وتحتووفي سوبر ماركت كبير كتير حلو ... باقي فوت لجوات البيت و اعرف مواصفاتو ...بس شو برأيك رح يعجبني ؟ صلاح : لو صار شي لأهلي او انخدشو خدش واحد رح انهيك انت وجماعتك كلن فهمان يا وسخ اوعا تفكرني خايف منك انا بايع حياتي والدنيا كلا الرجال : يبقى على موعدنا بكرا .. سلام

العضوة: 743708 , 5 years ago

سحبت كرسي و اعدت ع الطاولة وشغلت السيجارة .. مابعرف ليش الدنيا عم تضيق فيني .. مابعرف شو يلي وصلني لهون .. يمكن الفقد بخلينا نعمل المستحيل .. يمكن النقص بخلينا نشتغل عالزيادة بطريق غلط .. يمكن الطريق مجهول بالبداية كان واضح ومعلوم بس بكل خطوة عم تظهر إشارة X وتتعقد الأمور .. اتصلت بشريف وخبرتو عن الاتصال يلي اجاني وعن الموعد .. شريف : روح جيب البضاعة وعميل متل مابدو صلاح : هالمرة مارح اشتغل ببلاش .. انا بدي مبلغ مقابل الشغل شريف : اديش بدك ؟ صلاح : 3 مليون شريف : مليون وبس .. لاتنسى انك متورط و وقت تضرنا رح تضر حالك قبلنا .. صلاح : موافق .. شريف : رح حط المصاري برصيدك بالبنك و ابعتلك الوصل لباب بيتك صلاح : لاء .. الساعة 7 ونص عباس بجبلي الشنتة والوصل عالمنطقة نفسا بسلمني ياهن و بيمشي و الساعة 8 بسلم شريكك شريف : موافق ----------------- تاني يوم جهزت حالي عالموعد وطلعت .. المكان كان شبه صحرا مافيا حدى اول ماوصلت كان عباس عم يستناني و بإيدو شنتة المخدرات .. نزلت من سيارتي وشغلت سيكارة : هي الشنتة بس ولا في غيرا ؟ عباس : هههه مو عاجبتك هي .. هزيت براسي وسكتت عباس : هاد الوصل اخدته وحطيتو بجيبي .. صوت سيارات شرطة من بعيد خلال ثواني كانت سيارات الأمن و الشرطة محاوطة المكان .. أخدو الشنتة و مسكوا عباس ومسكوني .. بقينا بالفرع لحتى بلش التحقيق معنا .. كنت مفكر حالي خلص ابتليت و رح انحبس معهن و اعتبر متعاون معهن .. بس بلحظة سؤال الضابط الي عن طبيعة شغلي جاوبتو فوراً اني عم بتعرض لابتزاز لسبب مجهول .. طبعا بالبداية ماصدقوني .. ورجعوني عالحبس .. بعد ساعتين نادوني وحكولي طلعت براءة في حدى حكا معنا و بينت براءتك .. وهيك طلعت من الموضوع . عباس بقي محبوس وثبتت التهمة عليه .. و بلش يعترف عن شريف و الناس يلي متعاملين معها و العمليات كل

العضوة: 743708 , 5 years ago

رجعت على بيتي وكنت تعبان من اعدة السجن و القصص يلي صارت معي .. كنت حاسس بخنقة جوات روحي ، ماحدا حاسس بوجعي غيري ، ماحدا نفسيتو متدمرة قدي .. ماحدا قرفان الدنيا قدي .. يمكن لو متت بشي عملية وكنت الضحية كان أهون عليي من العزاب يلي عم عيشو كل يوم .. كلن كانوا كسبانين بس الخسران الوحيد هو انا ..

العضوة: 743708 , 5 years ago

باليوم التاني رن موبايلي من بكير .. من غير ما أعرف مين المتصل كنت عرفان إنه في مصيبة كبيرة ناطرتني من ورا التلفون .. الاتصال كان من رقم غريب ، رديت : الو .. : معك مراد من طرف مروان بيك صلاح : من غير ماتحكي ولا كلمة قلو حل عني مراد : البيك بقلك لاتتسرع وسماع شو رح قلك صلاح : طيب ياسيدي روح قلو للبيك تبعك صلاح مابدو يسمع شي ولا بيعرف شي خلص مراد : معناتا رح تخسر كتير صلاح : لو عندي شي اخسرو ماكنت تعرفت على هيك عالم وسخة .. روحوا بجهنم انت و البيك تبعك سكرت التلفون وطلعت من البيت .. و انا عم افتح باب سيارتي حسيت بضربة على راسي و من بعدا غميت وماعد حسيت على شي ، بعد شوي بلشت ارجع اصحا بس ماكنت شايف من عزم الضربة كلشي عم شوفو مغبش و دايخ ، بس حاسس اني متسطح على سرير .. جلست حالي شوي و اتطلعت حوليي مالقيت حدا .. المكان كتير فخم ، و انا بغرفة مفروشة فرش مرتب كتير .. قمت من السرير و مشيت على مهلي بجهة الشباك .. اتطلعت لتحت ، ووقتا عرفت اني بفيلا مروان .. رجعت و أعدت مكاني بعدين قمت مشيت وكنت عم حاول أهرب من الغرفة .. شوي و دخل مروان لعندي : اهلا وسهلا شو هالزيارة المفاجئة هي سيد صلاح صلاح : شو رأيك اشتكي عليك ؟ مروان : موافق .. انت بتحكيلي وين راحت البضاعة و انا بخليك تشتكي شو رأيك !! هههههه صلاح : بدك تعرف البضاعة وين ؟ مروان : طبعا صلاح : انا بعرف وبقدر قلك بس بشرط .. مروان : احكي صلاح : انا لما بدي احكيلك الحقيقة يعني رح اتعرض للخطر ويعني رح صير شريك ، بالمقابل حقي أعرف كم عملية صرتو منفذين ومع مين تعاملت .. لان احتمال كبير انو استلم شغل معكن وفهمك كفاية مروان : هي أسرار ومو شغلتك تعرفا .. صلاح : حلو ، معناتا اختفاء البضاعة كمان اسرار ومارح تعرفا مروان : يعني وحدة بوحدة صلاح : هيك شي مروان : طيب .. الشركاء متل شريف أحمد ونزيه عيد وبلال اسمر لما حكا اسم نزيه عيد ، انصعقت يعني معقول هالرجال الدرويش الآدمي يطلع تاجر مخدرات ومعروف !!! طيب ليش يجي يحذرني منهن مزال هو بيشتغل معهن ..... صلاح : مين يلي قتل نزيه عيد ؟ مروان : شريف .. نزيه غلط وبيتحمل نتيجتو غلطو انو اجا وحذرك

العضوة: 743708 , 5 years ago

صلاح : بما انو نزيه بيشتغل معكن شو يلي دفعه ليجي يحذرني منكن !؟ مروان : اسئلتك كترت ومو هيك اتفقنا ... بدي اعرف البضاعة وين صارت صلاح : البضاعة مدفونة ... مخزن السيارات الشمالي القديم تحت الارض كل البضاعة .. المخزن مقفول وبيفتح من الساعة 8 الصبح للساعة 9 الصبح يوم التلاتا يعني بكرا رح تلاقيني هنيك عم بستناك لساعدكن .. تركتو وطلعت من الصالة وهو نادى لرجاله ، وقت طلعت وقفت ورا الباب ،، سمعته حكا لرجالو (( من هون لبكرا بعد مايساعدنا بالمخزن بدي تخلصوا عليه )) هربت بسرعة من الفيلا ورحت من طريق تاني ومارحت عالبيت .. اخدت غرفة بالأوتيل وبقيت فيا لليوم التاني ... الوقت قرب ينتهي وكلشي قرب يخلص ، من هون لبكرى معقول موت ! يمكن اذا بموت برتاح ، أكيد برتاح .. عالقليلة بشوف الناس يلي بحبا .. عالقليلة ماحدى رح يقرب مني .. بس انا خايف ! خايف موت و انا عايش .. خايف موت أكتر .. انا انسان ميت بس لو بقيت عايش رح موت أكتر . بقيت سهران لوقت طلع الضو .. اتصل فيني مروان بس مارديت هيييك لحتى وصلت على مكان المخزن ، رديت.. صلاح : الو مروان : وينك؟ صلاح : عم بستناك بالمخزن تعا .. انا كنت بعرف انه مروان بعت رجالو بالليل وفتشوا المخزن وحفرو الأرض من اماكن ماتبين عليي و تأكدوا انو مافي بضاعة .. ومتأكد انو اتصلوا فيني ليقتلوني لأن رح يفكروا عم بلعب معهن بعد ماوصلوا ودخلوا عالمخزن.. مروان : ليش عم تلعب بالنار ؟ صلاح : لأن في كتير ناس لازما حرق مروان : مو عرفان شو مصير يلي بيلعب معنا؟ صلاح : أنت برأيك رح اعطيك عنوان البضاعة و اسمحلك تاخدا من غير ما اكسب ولا ليرة منك ؟ شو أجدب انا مروان : ممممم اديش بدك صلاح : 10 مليون وهلئ بتعطيني شيك فيهن وخلال دقايق بسلمك كلشي مروان : موافق

العضوة: 743708 , 5 years ago

مروان كتبلي الشيك و أعطاني اياه ، كنت عرفان انو ناوي يقتلني متل ما اتفق مع رجالو بس بعد ماياخد البضاعة وهيك بيسترجع الشيك مني .. اخدت الشيك ودليتو ع مكان البضاعة وبالفعل أول مادوروا لقوها .. بعد لحظات سمعنا صوت سيارات الشرطة كانت مداهمة المنطقة وخلال ثواني كلياتنا كنا بالسيارات ..... انسندت عالحيط للمرة الرابعة يمكن ضميت راسي بين رجليي وسكرت أداني بإيديي ، كنت حابب اسمع صوت خلايا جسمي .. حابب اسمع صوت دمي وهو ماشي .. حابب اسمع صوت قلبي وروحي و اتذكر صوت شوق ونجمة .. غفلت عالأرض مابعرف اديش بعدين سمعت صوت المساعدة من بعيد وحدا قلي : صلاح براءة .. الإيد الخفية يلي عم تخليني اطلع بريئ كل مرة لازم أعرفا

العضوة: 743708 , 5 years ago

رجعت على بيتي و بهاليوم كنت حاسس انو خلصت من كل الشر يلي حواليي و الكل بعد عني ، بس حالياً بلشت حس بفراغ أو بالمعنى الأصح بلشت حس بالشوق لأهلي و بنتي ومرتي .. ((( قبل سنة ))) كنت انا وشوق بحديقة و آعدين عم نحكي شوق : ياصلاح بكفي بعد عن أهلك هالشي حرام .. صلاح : هن يلي اختارو .. بالأحرى أبي هيك بدو شوق : بس هاد مو حل .. كل أب بحب يختار لأبنو الشي الأفضل و يكون مأمنلو الشي المريح و أبوك لما كان حابب يمشيك على كيفو ماكان قصدو يحكمك أنا متأكدة صلاح : شوق بكفي .. هالموضوع انتهى من زمان ومو هلئ وقتو .. ركدت لعندي نجمة من بعيد : بابااا انا فقت هلئ وشتئتلك كتير صلاح : تعي ياروح بابا .. سحبت سيكارة وشغلتا و انا صافن ... الساعة 11 بالليل كل المحلات سكرت .. نزلت من البيت وركبت سيارتي ومشيت الطريق كان طويل بس وصلت .. جوات الغابة بقلب كوخ بعيد .. دقيت الباب .. --- : طولت كتير صلاح : بعتذر .. كنت مشغول .. وين آعدة ؟ ---- : بالطابق فوق صلاح : خدي الجاكيت علقيه الساعة 6 الصبح ركبت بالسيارة ولفيت لارجع ، نزلت الشباك وسحبت سيكارة ومشيت لحتى وصلت عالمكتب .. مسكت تلفوني و اتصلت : الو ، يلي أمرت فيه صار يا باشا .. عطيني العنوان ... طيب تمام ... عشر دقايق وبكون عندك رجعت شغلت السيارة وعليت الموسيقى ومشيت بسرعة

العضوة: 743708 , 5 years ago

وصلت على مكان موعدي .. كان بمزرعة كبيرة وفاضية وبعيدة كتير عن المدينة ... بآخر المزرعة كان في رجال طويل وضخم لابس طقم رسمي و بإيدو سيكار و داير ضهرو إلي .. أول ماصرت وراه : مرحبا يا باشا .. برم وجهو لعندي : براڤو كلشي عملتو كان ناجح معك وبتستاهل مكافأة عليه صلاح : ولوو تربايتك انا بابا وبعجبك -- : الله يرضا عليك ياصلاح .. وقفلي كلشي حالياً وهدّي اللعب شوي صلاح : أمرك باشا ركبت بسيارتي و أنا مبتسم وشغلت سيكارتي .. الابتسامة الخبيثة على وجهي .. ساعة نصر وساعة راحة .. ( قبل سبع سنين ) الساعة 2 بالليل كان الجو برد ومطر و العالم كلا ببيوتا ومطفية أضويتا ونايمة ، العتمة بأرجاء المنطقة وصوت الكلاب يلي جاية من بعيد .. صوت الرعد أحياناً وصوت ضربات المطر يلي بتخليك تحس إنك عايش لحالك بهالعالم مع مجموعة تغييرات طبيعية عم تصير من حواليك مستحيل تلاقي حدا بالشوارع بهيك وقت وجو .. إلّا شخص واحد هو " خفاش الليل " خفاش الليل هو اللقب المعروف لأبي . كل النهار كان يقضيه بمعمل الأسمنت يلي عنده و بالليل تبلش حركتو السرية .. معمل الاسمنت هو مجرد واجهة لتغطي الشغل الأساسي لأبي يعني اعتمد هالحركة لتسهل عليه شغلو و التواصل مع الشركاء .. تجارة المخدرات كانت اللعبة الأساسية عند أبي ، بالنهار يكون بالمعمل و بالليل يبلش الشغل .. يتاجر و يجيب بضاعة و يبلش شغلو .. التجار كانو يهابوه ويخافو منه لأن مادياً هو الوحيد يلي كان قادر ياخد كميات كبيرة وخسارة إلهن اذا بعد . ماحدا كان بجيب سيرة أبي قدام الناس الغريبة او حتى قدام التجار العاديين على طول كان معروف بخفاش الليل .

العضوة: 743708 , 5 years ago

بيوم من الأيام أبي كان عندو شغل مع شخص اسمو ( مروان ) .. هاد الشخص غدر بأبي وعن طريق بعض الرجال أبي عرف إنو مروان ناوي على نية وهي سرقة البضاعة قبل ماتوصل لموقع التسليم وهيك بكون كسب بضاعة حقا ملايين وبنفس الوقت ماخسر مالو .. بهاللحظة أبي قرر يلعب عليهن لعبة تانية .. طلب من مروان يحول له نص المبلغ و بعد مايسلمو بحول له كمالة المصاري .. مروان مارفض لأن نص المبلغ مابساوي شي قدام البضاعة يلي ناوي يسرقا .. بعد ما اتأكد أبي من الحوالة انو وصلت اتفق مع رجال يلاقوله عالطريق و وعأساس هن عصابة و سرقوا البضاعة .. بهالمشكلة اللي صارت مروان عرف انو البضاعة اختفت و عرف انو اللعبة انكشفت وكان واضح بالنسبة الو انو هاد مجرد ملعوب بس ماعندو أي دليل على حكيو .. بعد هاد الموقف أبي كان نازل عالمعمل بسيارتو .. فجأة بمكان بعيد شوي وفاضي اعترضت طريقو سيارة فيا رجال نزلوه وبلشو يضربوه لما حاول يهرب قوصو على رجليه في رجل من رجليه انعطبت و انضرب العصب فيها والعضم تعب لهيك صار يمشي عالعكازة . كلشي كان يصير انا ماكان عندي خبر فيه ولا حتى التجارة يلي كان يشتغلا أبي .. كنت مفكر الرزق والمال تبعه كله من رزق المعمل .. أول ماحكالي عصبت وبكيت و زعلت وقررت أبعد و اتركو و ضل لحالي نفسيتي ماعد اتقبلت أكتر .. ---------------------------- سكرت الباب ورايي و فتت عالصالون سكرت الجلايل و الشبابيك وطفيت الاضوية .. شغلت ضو شمعة و أخدتو معي .. طالعت شنتة وضبيت فيا مصاري و أوراق مهمة وخليتا على جنب .. كان في صورة بين هالأوراق أخدتا وتأملتا صورة شوق ونجمة وهن عم يحضرو لعيد ميلادي .. بهداك اليوم نجمة كانت عم تنفخ بوالين وشوق عم تحضر الكيك و الحلويات نجمة تعبت آخر شي ونامت عالكرسي .. دخلت عالبيت وصرنا نضحك انا وشوق بعدين حملتا وحطيتا بتختا و رجعت لعند شوق و ساعدتا بنفخ البوالين و قلتلا : في حدا بينفخ بوالين عيد ميلاده ! وبتذكر وقتة صارت تضحك وتقلي اي انت كسير هالقاعدة .

العضوة: 743708 , 5 years ago

كلن كانوا يجو يتواسطوا لأرجع اتصالح مع اهلي ... كل الناس كانوا بدن ياني ارجع زورهن و أحكي معهن بس انا كنت رافض .. كنت رافض لأني اتهددت .. اتهددت انو انحرم من أغلى شي بحياتي و انحرم من شوق ونجمة لهيك خفت عليهن وبعدت عن أهلي . حكيت لكل الناس انو أبي رجال قاسي وبدو ياني ضل تحت أمرو حتى بأمور حياتي الشخصية كان قاشي ولئيم وبدو يتحكم فيني .. حتى حلف على أمي بالطلاق اذا بتفكر تحكي معي من لما عاديته وبعدت .. بس الشي يلي مابتعرفه الناس انو و أبي طول ال 6 سنين ما كان في بيننا أي شي وكنا نحكي مع بعض على طول و كل يوم نتواصل وكلشي عملتو كان مجرد تمويه لحتى مايطولني أذى من ورا علاقات بابا ولحتى ماحدا يستهلكني ليضغط على بابا ، حاولت أظهر للناس انو اهلي آخر همي و بنفس الوقت أبس حاول يظهر للكل انو اذا بشوفني عم موت عندو استعداد يرميني برصاصة ومايسأل وبهيك صرت بعيد عن كلشي صار وماحدى استرجى يقرب مني .

العضوة: 743708 , 5 years ago

طلعت لعند سليم ابنو لنزيه اخدت عنوان بيته من تاجر ورحت لعنده ، كان عندي دافع أعرف عن أبوه معلومات .. وصلت على العنوان يلي كان معي ، شغلت سيكارة و اتطلعت عالبيت من كل زواياه ودقيت الباب هون طلع سليم فتحلي ، اول ماشافني اتلبك : اهلين استاذ صلاح ، تفضل دخلت وأعدت انا وياه : سليم انا تقريبا فهمت كلشي بس ضل عندي كم جزء من الصورة ماتركب معي سليم : استاذ فهمني انا مابقدر كون بصفك مابقدر، انا عندي ولاد ما الهن غيري صلاح : ابوك كان تاجر مخدرات ويشتغل مع مروان صح!؟ هز براسو : مزبوط صلاح : احكيلي كلشي يلا سليم : كان مجرد بائع صغير بمحلو ما إلو بالتجارة ولا بالسلطات ولا بالاستيراد حتى بضاعتو كلا كانت من تجار السوق والجملة .. بيوم من الأيام اجا لعنده حدا من رجال مروان وصار يشتريه بالمصاري .. كان هدفن الرئيسي انو أبي يوزع البضاعة بحكم بشاطة محلو ماحدا رح يشك انو توزيع البضاعة عن طريقو .. وشوي شوي بلش أبي ينعرف بين التجار الكبار و سيطو يوصل .. بيوم من الأيام أبي قرر انو يتوب ويترك هالمصلحة والشغل ويعيش حياتو لحالو بعيد عن المصايب .. رغم كل المصاري يلي صارت عندو بس حس بالذنب .. مجرد ما فكر هالتفكير ، اجو وقتلوا أخي زيدان كان عمرو 12 سنة وهددوه لو بفكر يبعد رح يقتلوني أنا و أختي .. وبوقتا أيي انغصب يضل انجبر يضل لأن خاف علينا .. وقتا عرف انو الطريث يلي فات فيه ما منو رجوع وما منو خلاص إلا الموت . أبي لما شاف عباس عندك وسمع من التجار انو صرت تشتغل معهن قرر يحذرك لأن عرف انو بالبداية رح تغريك المصاري بس بعدين رح تندم .. وبعد ما عرفو انو أجا وحذرك قتلوه وخلصوا عليه وغالباً يلي بفوت مابيطلع وهو عايش

العضوة: 743708 , 5 years ago

صلاح : ايوا ايوا .. طيب مين غير مروان كان يشتغل مع ابوك؟ سليم : مروان و شريف و كان في شخص مجهول اسمو خفاش الليل ماحدا بيعرف مين هو .. بس معروف انو زلمة قوي بعد ماطلعت من عند سليم حسيت بحزن كبير ولوم كبير انو انا و ابي كنا السبب بدمار عائلة .. ياترى لو سليم عرف انو ابي هو خفاش الليل شو ممكن يعمل ؟ معقول يقتلني !! او يقتلو الو !!!

العضوة: 743708 , 5 years ago

طلعت من عند سليم .. ركبت سيارتي وشغلت سيكارة مشيت مشيت .. لحتى فتت بطريق الغابة ، ماكان في غير صوت الكلاب وصوت الليل الصامت .. صوت المطر يلي عم يضرب على بلور سيارتي . حسيت انو ورثت عن أبي لقب خفاش الليل .. وصلت عالكوخ الغريب وقفت بعيد عنه وصفنت .. السر كان كبير ومو بأي وقت قادر بوح فيه .. ضليت واقف لمدة دقايق بعدين نزلت من السيارة ودقيت الباب .. انفتح ، كان جوا عكس الجو يلي برا .. كان دفا و نار الموقد عم تشعل شعل و أمان أكتر من الغابة يلي برا سواء كانت الغابة بمعناها الحرفي أو الغابة يلي عايشين فيها يلي هي عبارة عن مجموعة وحوش بشرية عم تلتهم ببعضا و كل مطلبا تكسب أكتر ولو على حساب حياة غيرا .. دخلت لجوا ، رميت الجاكيت وضحكت بصوت عالي : اشتقتلكن .. اشتقتلكن كتير ركضت لعندي نجمة وهي فاتحة إيديها الصغار وعانقتني .. حملتا وفتلت فيا .. بعد شوي ركضت شوق وضمتني صلاح : ياروحي انتو . تأخرت عليكن هالمرة كتير شوق : شتقنالك .. طمني حبيبي خلصت اللعبة ؟ هزيت براسي و ابتسمت . قبل سنة بالضبط أبي بلش يتهدد من قبل مجموعة أشخاص كان يشتغل معهن هالأشخاص كانوا تجار وبدن أبي لأن هو من بعد ما انعطب صار يبعد عن الشغل و الناس يلي متعامل معهن . بس في أشخاص منهن كانوا ضد انو يبعد ويضل عايش لأن خو عرف أسرار المفروض يلي يعرفا إما يكون معهن أو مصيرو الموت حتماً ...لما بلشت تنهال عليه التهديدات كانت أغلبا عم تهدده فيني وبعيلتي ، بهالوقت هاد هو فهم الكل انو صرلو 5 سنوات مابيتواصل معي وفي كره كبير بيناتنا و نحنا التنين مستحيل نكون متل أي أب و ابنه بهالعالم .. بقيت عم بعمل متل ما اتفثنا أنا و أبي انو ضل بعيد عن الكل و بعيد عن أهلي و اتعامل وكأنهم أعدائي . بعد بفترة كم شهر وصلت لأبي أخبار من رجال بيشتغلوا معهن أنو رح يقتلوني أنا وعيلتي خلال شهر ..