العضوة: 774204 , 5 years ago

رفع

العضوة: 743708 , 5 years ago

الضابط : رح نخصص دورية بالمنطقة تعمل بحث عليهم بركي مجربين ينقذو حالهن ... صلاح : و إذا ما التقو ؟ الضابط : رح يلتقو .. رح خبر تنين شرطة يوصلوك على بيتك وترتاح ونحنا منتواصل معك وقت يصير أي جديد . رجعت عالبيت ارتميت عالسرير وغفيت لليوم التاني فقت على صوت دقة الباب .. فتحت .. كان الضابط .. دخلتو عالبيت ... الضابط : الدورية مشطت المنطقة كاملة بس للأسف ما الهن أثر .. معناها هن ماطلعو من الشاحنة وبقيو فيها صلاح : شو يعني ؟ الضابط : الشاحنة لما انقلبت احترقت وما ضل منها أثر ، أنا مستصعب قلك الكلمة .. بس مزال هيك يبقى جثة مرتك وبنتك احترقت وتفحمت لهيك ما الهن أثر . صلاح : انتو عم تكذبوا .. شوق هلئ رح تجي ورح تجيب معها نجمة .. انا متأكد .. الضابط : يا ابني طول بالك والأقدار مكتوبة من السما خلي ايمانك قوي واستعين بلله عالصبر .. صلاح : طلعوا لبرى .. لبرى يلله انقلعوا .. دفشت الكل حتى صارو برا البيت وسكرت الباب واعدت وانسندت عليه دموعي كانت عم تنزل من عيوني بحرقة ... كنت شايفهن معي بالبيت .. شوق عم تلعب مع نجمة وعم يضحكو ويتطلعو عليي هن ما ماتو ليكني شايفهن هن قدامي على الكنباية يلي بآخر الصالون عم يضحكو .. ضربت راسي بالبيت وانا عم صرخ يااا الله .. يااارب ... تذكرت ( قبل شهر ) كنا آعدين بالمطبخ عم نتغدا .. نجمة : بابا خدني عالبحر انا كتير نفسي شوف البحر عن قريب .. شوق : ياريت ياصلاح .. صلاح : تكرم عيونك كم نجمة عندي انا .. قامت من كرسيا وركضت لعندي ضمتني وصارت تبوسني وهي عم تقول انت احلى اب بالعالم يا بابا الحلو .. ضحكنا انا وشوق . صلاح : رح اخدكن بس وقت آخد إجازة وبوعدكن عن قريب . شوق : انا امنيتي تترك شغلك وبس . صلاح : شوفي هي صح شغلة التجارة متعبة بس الها مستقبل ان شاءلله .. شوق :ا ن شاءلله .. حاسس بعتمة حوالين البيت .. حاسس بفقد .. حاسس بصدى صوت نجمة وصدى صوت شوق .. سامع غراض المطبخ عم تتحرك وكأن شوق عم تحضر الأكل .. سامع صوت دعسات رجلين نجمة وهي عم تركد ... تسطحت عالأرض ونمت .

العضوة: 774204 , 5 years ago

....

العضوة: 743708 , 5 years ago

باليوم التاني كنت طالع من البيت لحتى اتمشى بالشارع .. شفت جاري نازل عالدرج سلم عليي وعزاني بوفاة نجمة وشوق .. كل التعازي كنت بتقبلا بس هالتعزية عم اكره اسمعا .. الناس بتعزي أهل الميت كرمال يتصبر ويحس في حدا حواليه .. بس كيف يلي حواليي عم يعزو واحد مات !! مات اي مات .. واحد مشاعرو ماتت مع الماضي .. ماتت مع ذكرياتو .. مستحيل حدا يكون قادر يعيش بدون روحه و انا روحي ماتت لما ماتو نجمة وشوق .. كملت بطريقي ومشيت بالشارع و انا حاطت إيديي بجيوبي وحاسس بتعب .. كان في رجال جاية باتجاهي من بعيد ... سلم عليي وحكالي مو بالسهل تفقد ناس غاليين عليك و انا متعاطف معك جدا .. صفنت فيه وقلتلو : انت بتعرفني ؟ الرجال : بس أوقات مندفع تمن أغلاطنا ... مسكتو من رقبتو وكان نفسي خلص عليه وفش كل خلقي فيه : عن شو عم تحكي ولاك احكي لشوف مين انت مين

العضوة: 743708 , 5 years ago

كنت عم صرخ بطريقة مو معقولة كل تعصيبي وقهري طلع على هالشخص .. فك حاله من بين إيديي وهرب ... و أنا بسبب هالخناقة والتعصيب ولأنه دفشني صرت حس بوجع قوي بالجرح يلي ببطني وصار يطلع منه دم .. اخدت تكسي ورحت عالمشفى الطبيب كان عم يعاين الجرح وهو عم يحكيلي انو جرحك جديد وماكان لازم تنفعل لأن رح تأذي حالك .. سألني كيف مطعون هالطعنة ؟ صلاح : انا ماني مطعون ، عملت حادث ويمكن في شي حاد دخل ببطني .. ركز فيني الدكتور وحكالي : انت متأكد ؟ صلاح : طبعا انا كنت بحادث الشاحنة يلي صار من يومين الطبيب : المشكلة انو مارر على راسي كتير ناس متل حالتك لدرجة انو صرت حافظ ومتأكد من ضربة السكين وعمقا . صلاح : شو بتقصد ؟ الطبيب : مابقصد شي ولطالما انت عامل حادث يبقى احتمال كبير انو في شي دخل ببطنك . ضمدلي الجرح وعطاني دوا وطلعت من عنده .. الجرح كان عم يوجعني كتير مع انو اخدت الدوا و ارتحت بالبيت .. النوم هو الحل الوحيد لأرتاح من وجع الجرح بس هو الوجع القوي يلي عم يذكرني بوحدتي .. أول ماغمض عيوني بتذكر انو رح تجي شوق تفيقني .. ونجمة تتساءل عليي .... برجع بفيق مرعوب ... بفيق من الحلم للاقي واقع كابوس . من تاني يوم قررت ارجع انزل على شغلي يمكن ضييع وقتي .. يمكن لما شوف الناس انسى الشوق شوي .. انا بشتغل بمكتب وعندي مستودع بستورد بضاعة بتخص كلشي بيتعلق بالبناء من خشب وحديد و اسمنت وغيرو .. وضعي المادي وسط بس كنت عم حاول وسع المستودع واعمل صفقات كرمال يصير وضعي احسن بظل هالغلا والأوضاع القاسية و لأمن حياة ممتازة لمرتي وبنتي .. كنت رجال نشيط جدا عندي دافع كبير للحياة عندي دافع للنجاح ولتأمين حياة منيحة بس هلئ الدافع انطفى .. وماتت الحياة .. اذا بشتغل شحاد هلئ بقدر عيش ، يعني بالمختصر كلشي كنت بدي أسسه ماعد الو لزوم هلئ . و انا آعد بالمكتب ومخي مو معي ابدا دخل لعندي رجال ..

العضوة: 743708 , 5 years ago

حكالي انا عباس .. بشتغل بتجارة الدهانات .. صلاح : اتشرفت فيك عباس : بالحقيقة انا لازمني بضاعة لاني متعاقد مع ورشة وحاليا طلبو كمية كبيرة دهان ومتل مانك شايف الوضع الاقتصادي وصعوبة الطرقات و التدقيق يلي عامل زحمة لهيك بدي آخد بضاعة من عندك من المخزن بس منتحاسب عالسعرر القديم يلي انت اشتريت فيه . صلاح : مافي مشكلة . عباس : تمام .. اتفقنا .. ممكن سؤال ؟ صلاح : تفضل عباس : بتعرفو لشريف احمد ؟ صلاح : لأ .. بس تجهز كلشي زورني لنتفق وين بدي انقلك البضاعة .. طلع من مكتبي ومشي و انا تعبت من الأعدة .. لميت غراضي ورحت عالبيت .. شلحت جاكيتي ورميتو ع الكنباية و سكرت البرادي وطفيت الأضوية بعدين دخلك لنام .. اول ماتسطحت بتختي اندق الباب .. رجعت رحت لأفتح .. اتطلعت من العين الساحرة مافي حدا .. فتحت الباب كمان مالقيت حدا اجيت بدي سكر الباب ...اجت عيني عالأرض .. بوط نجمة ... بوط نجمة كان محطوط جنب الباب وبقلبو في ورقة .. اخدت البوط وطلعت عالشارع بسرعة اتطلعت يمين وشمال وحوالي البناية مافي حدا .. رجعت دخلت عالبيت و انا عم ابكي وضم البوط .. حطيتو جنبي عالكنباية و اخدت الورقة يلي كانت فيه .. كان مكتوب : (( العمر إلك )) .. مسحت دموعي وصفنت بالبوط والورقة ، مسكت البوط ومسسحتو : كيف وصل لأيدين العالم ? طلعت من البيت ورحت عالمشفى لعند الدكتور يلي عالجني قبل بيوم .. حكيت معه و طلبت منه يرجع يشوف الجرح ويتأكد شو سببو .. لما فحصني قلي : انا متأكد انو هي ضربة بأداة حادة .. يعني إما في أداة دخلت بجسمك من عزم الضربة أو حدا ضربك بأداة حادة .. صلاح : و أيا احتمال الأقوى ؟ الدكتور : الاحتمال التاني .. و انا طالع من عند الدكتور اتصل فيني عباس ... خبرني انو بدو يستلم البضاعة اليوم الساعة 7 المسا و اعطاني موعد لحتى انقلا .. رجعت عالمكتب طلبت من العمال يجهزو الطلبية و ينقلو البضاعة للشاحنة .. و انا كنت آعد بمكتبي وعم فكر .. لو حكي الدكتور كان صح معناتا انا كنت مقصود .. معناتا الحادث كان مخطط له من قبل .. بس ليش ؟ ومين ؟ دخل لعندي العامل وحكالي انو الطلبية صارت جاهزة . حكيت مع عباس وخبرتو انو رح اطلع و آخد البضاعة معي .

العضوة: 743708 , 5 years ago

رحت انا والسائق وعاملين مشان تنزيل الطلب .. العنوان كان بعيد عن المدينة ومتطرف وصلت ولقيت عباس هنيك .. عباس : تفضل سيد صلاح لنشرب شاي سوا لبين ما الشباب ينزلو الطلبية .. دخلنا عالفيلا لجوا كان في شب باين من طاقم الخدمة هنيك والفيلا عليها حراسة واضح انو لحدا مهم ، اعدنا .. صلاح : هي الفيلا الك ؟ عباس : لا .. صلاح : طيب ليش استلمت البضاعة هون ؟ عباس : معلش بيبقو رجال الورشة بيجو بينقلوها ..

العضوة: 743708 , 5 years ago

صلاح : طيب مافهمت .. مزال الفيلا مو الك ليش لتنزل الطلبية فيها ؟ عباس : بكفي اسئلة .. لان كل ماكانت معلوماتك اقل كل ماكنت بخير اكتر .. سكتت واستغربت من جوابه .. بعد شوي اجا شب من يلي بيشتغلو بالفيلا و أشر لعباس .. وهون هز براسو وقلي تعا سيد صلاح .. قمت معو وطلعنا على درج بوصل لصالون تاني بالطابق التاني .. كان في رجال لابس طقم رسمي وآعد وماسك بإيدو مسدس عم ينضفه .. لما دخلت بقي آعد بس اتطلع فيني ورجع كمل شغلو بالمسدس بدون مايحكي معي ولا كلمة .. ولا كأني موجود عباس : هاد هو صلاح .. صلاح : شوفي ؟ ومين حضرتكن ؟ عباس : الأستاذ شريف أحمد صاحب أهم شركات الدهانات وتاجر لكل لوازم البناء وعنده عدة معامل هون وبرات البلد .. صلاح : تشرفنا .. ترك مكانو شريف ومشي باتجاهي بعدين حط ايدو عكتفي وهو عم يضرب عليه ويبتسم : كنت مفكر صلاح شي رجال عمرو بالخمسين وصاحب نفوذ عظيم من ورى سمعتو بالسوق .. بس شايفلك ياعباس انو صلاح لساتو بغو شلت ايدو عن كتفي : احترم نفسك وبصفتك مين عم تحاكيني هيك ؟ اتطلعو ببعض هو وعباس وصارو يضحكو بقوة وكأن حكيت شي نكتة . شريف : ولااك انت يلي بتحترم حالك وبتعرف مع مين عم تحكي .. مسكتو من رقبتو وشديت بقوة : لو بدك انا مستعد اقتلك بأرضك وانهيك بهاللحظة لان ماعندي شي اخسرو بتحترم حالك احسن لحياتك . تركته ومشيت من الفيلا ورجعت على بيتي .. انا لساتني آعد ومستغرب من الحكي يلي سمعتو مين شريف ومين عباس و انا شو عامل .. انا بحياتي مو سمعان بأسماءهن أصلا ولا مرة سمعت بهالاسم بسوق الشغل . باليوم التاني طلعت لعند تجار السوق المعروفين وسألت عن هالرجال يلي اسمو شريف احمد لاعرف إذا فعلا هو تاجر كبير بس كل التجار يلي حوليي أكدولي أنو بحياتن مو سامعين باسم هيك تاجر ولا متعاملين معه . ماعدا شخص واحد اسمو نزيه عيد هو صاحب محل دهانات بسيط يعني مانو تاجر وحتى بجيب بضاعتو من المستودعات والمخازن يلي عند باقي التجار هو الوحيد يلي عرفه .. بس الغريب انو أول كملة قلي ياها هي بعد عن هالزلمة ولو طلب منك طلبية كبيرة مالك مصلحة يا ابني ... صلاح : طيب ليش فيني افهم ؟ نزيه : زلمة صاحب شر شوبدك فيه ؟ ولو رزقتك عليه يبقى بلا هالرزقة .. عم بنصحك .. أعدت بالمكتب .. شغلت السيكارة وسندت راسي

العضوة: 774204 , 5 years ago

رفع

العضوة: 774204 , 5 years ago

كملي

العضوة: 724645 , 5 years ago

كملي

العضوة: 782632 , 5 years ago

@user-743708 رفع

العضوة: 743708 , 5 years ago

يالله استنوا عليا شوي تعبانه كتير

العضوة: 782632 , 5 years ago

@user-743708 سلامتك خير شو بكي

العضوة: 477598 , 5 years ago

كملي