العضوة: 743708 , 5 years ago

اتفقنا انو علي رح يسافر ع المحافظة يلي عايشة فيها أمها لفيروزة .. وبعد شوي كل واحد فينا راح على بيتو .. اتصل فيني علي وخبرني أنو في مشكلة كبيرة صايرة بعيلتو لهيك مارح يقدر يسافر هو .. تلبكت كتير لأن بعد يومين رح يكون عندي عرض ومابلحق روح و ارجع خلال يوم ونص .. بس كمان مستحيل أقدر استنا لبعد ماتخلص العروض . ضبيت كم غرض وطلعت من البيت وبوجهي عالسيارة .. سافرت لحالي الطريق اكل 5 ساعات لبين ما وصلت .. رحت ع العنوان يلي كتبلي ياه علي .. كان بمنطقة بعيدة يعني غير اني وصلت للمحافظة بخمس ساعات بس كمان لسا بدي ساعة لأوصل لمنطقة البيت . وصلت ع العنوان نفسه بيت بطلعة قاسية جنبو في شجرة تين كبيرة . قربت ودقيت الباب .. فتحتلي ست عمرا شي 55 سنة شعرا أبيض وملفوف ولابسة فستان مزهر .. نزلت نضارتا وسألتني : مين انتي ؟ نهى : خالتو فينا نحكي شوي والله موضوع ضروري دخلت لعندا على البيت كانت عايشة لحالا مع ولد صغير .. نهى : خالة انتي أما لفيروزة ؟ الست : انتي مين وشوبدك ؟ نهى : روح فيروزة عم تلاحقني .. انا متأكدة عم تطلعلي بكل مكان .. بدا مني ساعدا وحررا وبترجاكي تساعديني لنخلي روحا ترتاح .. اتطلعت فيني وما ردت .. رجعت حكيتلا : وثقي فيني لو سمحتي .. الست : فيروزة هي جوهرة هالدنيا .. ماتت قبل ماتفرح بحياتا .. قتلوها الغدارين .. هاد الصبي يلي شايفتيه هو ابن فيروزة عمرو 13 سنة ماتت بدون ماتشوفو ويشوفا . فيروزة اشتغلت بمطعم لحتى تعيش لأن جوزي ماكان ابوها وماكانت تحب تتقل عليه .. الصبح كانت تشتغل نادلة بالمطعم و المسا عازفة بيانو .. وهي بعمر ال 20 في شب صار يتردد على المطعم حبو بعض .. وصارو يطلعو ويفوتو مع بعض وبعد فترة طلعت حامل منو .. هو بقي جنبا بس ماكان قادر يتزوجا لأن أبوه خاطبلو بنت عمو وهو مابدو ياها بس ماكان فيه يرفض .. ولدت فيروزة ببيت جارتنا وفجأة اختفت من البيت .. وبعد كم يوم لقيوها مقتولة وميتة . نهى : كيف ؟ طيب مين يلي خطفا ؟ الست : مامنعرف فجأة اختفت نهى : طيب والشب أبوه للولد وين ؟

العضوة: 743708 , 5 years ago

الست : بعد ما ماتت فيروزة اجا لعندي شاف ابنو وحكالي يبقى عندي أمانة لأن هو مافيه ياخدو ويربيه .. اتزوج بنت عمو ويمان ضل عندي .. نهى : يعني ماقدرتو تعرفو مين القاتل ؟ الست : لا وماتت فيروزة وماتت سيرتا وماتت الجريمة البشعة .. أخدت منها اسم وعنوان الشب يلي كانت فيروزة مرتبطة فيه . طلعت من بيتا وقررت روح لبيت الرجال يلي كانت فيروزة تحبو . البيت كان بمنطقة ضمن المدينة ببناء حديث .. طلعت ع الطابق التالت دقيت الباب .. فتحتلي صبية عمرا بأول التلاتين وحكتلي : مين حضرتك ؟ نهى : السيد مازن موجود ؟ هزتلي براسا وقالتلي : مين انتي ؟ وشو بدك من مازن ؟ نهى : لو سمحتي خليني أحكي معو موضوع كتير ضروري هزت براسا ودخلت لجوا .. بعد شوي طلعت ودخلتني لعندا ع البيت .. اجا مازن سلم عليي و اعد على الكنباية يلي جنبي .. عرفتو عن حالي و بعدين حكيتلو يلي عم بصير معي .. كان متفاجئ كتير ويلي خلاه متفاجئ أكتر انو شو دخلني لتجي لعندي روح فيروزة وليش انا مع انو مافي بيناتنا سابق معرفة ؟ مازن : فيروزة كانت حبيبتي وعشقنا بعض أنا وياها وتزوجنا عرفي بس انا ماكان فيني أعلن الزواج لان ابي خاطبلي بنت عمي ومافيني ألغي الخطبة حتى مايصير مشاكل بين العيلتين .. لما اختفت فيروزة أنا ماكنت بعرف شي عنها ولا كنت عم شوفا بس يلي بعرفو انو ولدت وماعاد لقوها بالبيت وبعد فترة عرفنا انو ميتة .. نهى : طيب انت بتشك بحدا ؟ كان إلها أعداء ؟ مازن : لك أعداء شو فيروزة كانت بنت طيبة مافي متل حنيتا وقلبا وتسامحا مع العالم .. نهى : الله يرحما .. شكلي مارح أوصل لمعلومات تفيدني .. مازن : أنا هاد كل يلي بعرفو ولو قادر أعرف مين يلي قتلا كنت بخنقو بإيديي .

العضوة: 724645 , 5 years ago

كملي بس باينتا مرعبة نوعا ما

العضوة: 743708 , 5 years ago

طلعت من بيت مازن و أنا حاسة بغصة كبيرة بنت بريئة تموت قتل .. ليش هالظلم ؟ اتطلعت على الساعة كانت 12 بالليل والساعة 1 الضهر من اليوم التاني رح يكون موعد العرض تبعي .. مشيت بسرعة بالسيارة ... الطريق كان عتمة وفاضي ومافيه بني آدم .. وصلت وجه الصبح عالمسرح .. دخلت على غرفتي ونمت شي ساعتين لبين ما أجو الممثلين وبلشنا بترتيبات المسرح والديكور والملابس والماكياج وكلشي بخص العرض يلي رح نقدمه .. اجا علي : شو انتي هون ؟ ايمتا اجيتي ؟ نهى : من الساعة 5 الصبح وصلت .. علي : يلا خلينا نجهز كلشي نهى : وينو طلال والفنانين تبعاتو غريب تأخر ؟ علي : لا اليوم العرض بس إلك و الأسبوع الجاية رح يقدم طلال .. نهى : أوف كيف هيك .. طيب اللجنة كيف قبلوا علي : في حدا من عيلته متوفي والوضع مكركب لهيك اللجنة اعطته عذر و وافقوا .. نهى : طيب .. ادعيلي ..

العضوة: 743708 , 5 years ago

اي قوي قلبك ولوه

العضوة: 743708 , 5 years ago

كنت ملبكة وعم نادي للكل وعم اعطي تعليمات و انا عم احكي بصوت عالي و أشر بإيديي .. اجت ندى لعندي .. فرحت كتير انو حدا من اهلي رح يوقف جنبي بهاللحظة .. حكتلي انو جايبة فطور لنفطر سوا قبل العرض .. اعدنا و أكلنا بعدين رجعت قرأت النص و زبطت كم شغلة مع الفنانين .. سمعت صوت حدا عم ينادي نهى .. التفتت لورايي المسرح مليان بس ماحدا عم يناديني .. رجعت سمعت اسمي من بعيد بس كمان مافي حدا حوليي .. صرت امشي باتجاه الصوت .. لورا المسرح وصلت لمكان فاضي والصوت اختفى .. رجعت على مكاني و اعطيت أمر انو كل مين ياخد مكانه لنبدأ العرض .. المسرح كان مليان عالم واللجنة كانوا آعدين و ناطرين .. بلش العرض وكنت مبسوطة كتير كلو صار متل مابدي .. و رأي اللجنة كان مفرح كتير العرض نال إعجابهم ومدحوا منه كتير . الممثلين كلهم راحو وضليت بغرفتي عم رتبا وضب غراضي ولبسي لحتى امشي .. تلفون علي كان عندي بالغرفة مرمي ع الطاولة .. رن مسكتو لحتى اعطيه ياه .. كان اسم المتصل مازن . اعطيته ياه و بقيت واقفة جنبه لحتى خلص حكي .. سألتو مين مازن ؟ حكالي هاد الشب نفسه يلي كانت تحبو فيروزة .. نهى : و أنت منين جبت رقمه ومنين هو بيعرفك ؟ علي : بصراحة انا تواصلت معه وكان بدي اجتمع فيه وهددو ليحكي شو بيعرف عن فيروزة لأني حسيته كذاب وشكيت انو يكون هو القاتل . نهى : وليش اتصل هو هلئ شو بدو ؟ علي : لأني طلبت منه بس يكون فاضي يحكي معي لنتفق نلتقي . نهى : علي ماعم بفهم عليك ؟ كيف هيك قبل بسرعة انه يشوفك .. علي : لأن ببساطة هددتو ازا مابيجي رح احكي للشرطة انو هو حبيب فيروزة وقتلا لأن جابت ولد وهو مابدو يتزوجا وهيك رح تنفتح دفاتر قديمة وينطلب للتحقيق وهو خاف وحكالي بقلك يلي بعرفو بس بدون شرطة ومنحل القصة بيناتنا . رجعت عالبيت و الأفكار عم تروح وتجي بعقلي .. قررت إني روح لعند العرافة غيوم وشوف شو رح تحكيلي .. استنيت لحتى طلع الصبح ورحت لعندا لحالي دقيت الباب بس ماكان حدا عم يفتحلي وضليت واقفة وماحدا رد عليي .

العضوة: 743708 , 5 years ago

كا في رجال ماشي جنب بيتا سألتو عن المرة يلي ساكنة هون .. حكالي إنه تركت البيت من فترة ومابيعرفو عنها شي .. رجعت على منطقتي ... هي العرافة تركت المنطقة وكان لازم اعرف منها شغلات أكتر وتساعدني بيلي بدي ياه .. ضليتني ماشية بالسيارة لعند بيت الجبل مابعرف شو يلي أخدني لهنيك .. نزلت ودقيت الباب ، كان مفتوح دفشتو ودخلت وصرت نادي فيروزة .. اذا انتي هون تعي .. بدي أحكي معك .. صرت اسمع صوت معزوفة عالبيانو وقتا عرفت إنه أجت .. طلعت عالطابق التاني ودخلت ع الغرفة يلي جاي الصوت منها .. ضليتني واقفة على باب الغرفة وصافنة وعم استنى .. حسيت بنفس ورايي لفيت وجهي بسرعة كانت فيروزة .. فيروزة : أنا تعبانة .. ساعديني نهى : رح ساعدك بوعدك .. بس عطيني معلومة قليلي مين يلي قتلك ؟ فيروزة : كلن قتلوني .. نهى : مين كلن ؟ احكيلي مين قتلك وبوعدك آخد حقك من الكل .. فيروزة : سألي اللي حوليكي .. سألي يلي قراب منك كتير .. سألي أبوكي .. نهى : مين ؟ شو دخل أبي ؟ فيروزة : يلله صار لازم تروحي كرمال ما تنأذي .. يلله روحي .. بلش يتغير صوتا وهي عم تحاكيني وعيونا تصير متل الشرار .. تركت البيت وطلعت فورا ، اتصلت بعلي وطلبت إني شوفو استنيتو بمطعم قريب من المسرح .. حطيت راسي ع الطاولة لبين ما أجا و أعد جنبي : نهى شبك ؟ ليش هيك شكلك ؟ نهى : انا تعبت من كلشي عم يصير .. حاسة انو روح فيروزة بلشت تأذيني لأني ما قدرت اعمل شي مشانا .. علي : طولي بالك .. انا جنبك .. وبكرا رح أتلاقى مع مازن و استدرجو بالحكي .. انا قلبي حاسسني إنه الو إيد بالقصة نهى : علي ساعدني لاتتركني لحالي لاني تعبت علي : مستحيل قلتلك أنا جنبك خطوة بخطوة .

العضوة: 743708 , 5 years ago

كنت آعدة بالبيت عم اقرأ نص لعمل جديد .. البيت فاضي وهدوء و انا لحالي .. اتصل فيني علي وحكالي البس بسرعة ولاقيلو بالشارع لأن بدو ياني بموضوع ضروري .. طلعت بسرعة وقت اجا اعدنا بالسيارة . علي : شفت مازن .. وحكالي إنه يلي قتلا هو رجال كبير ومازن مابيعرف شو يلي كان بينو وبينها حتى قتلا .. وماقدر يعرف اسمو ولا من وين هو .. وطلب مني انو هالشي يضل بيناتنا ومايطلع لبرا لان رح يصير في وجع راس .. نهى : مين هاد الكبير مين ؟ رجعت عالبيت و أعدت حلل و اربط الأفكار ببعضا .. كنت عم استنى ابي بفارغ الصبر لأسألو عن فيروزة . أول ما أجا اعدت معه وحكيتلو بدي اسألك عن بنت . ابتسم وقلي والله مابحاكي بنات أمك أغلى وحدة .. ضحكت وحكيتلو لا .. السؤال ماله علاقة بالحب و النسوان . بابا : طيب اسألي .. نهى : مين هي فيروزة ؟ بابا : فيروزة ؟ مين ؟ نهى : البنت يلي انقتلت من 13 سنة فيروزة بابا : صدقيني يا بابا مابعرفا @rwayate ولا بحياتي شفتا .. بس بتذكر أنو الناس صار ماعندا غير سيرة مقتل فيروزة .. وكانو يقولو انو مرت صاحب المطعم هي يلي قتلتا لأن كانت على علاقة مع زوجا صاحب المطعم . نهى : طيب شو اسمو المطعم يلي كانت تشتغل فيه بتعرف ؟ بابا : يمكن الزهرة .. بس أنتي ليش عم تسألي عن فيروزة ؟ نهى : اييي لان بدي اعمل فيلم من قصتا يعني هيك عم فكر . اعدت لحالي وصار عندي أكتر من متهم .. مازن .. مرت صاحب المطعم .. الختيار المجهول يلي حكا عنه مازن . هلئ صرت واقعة بين النار ، ماعد اعرف لاقي الحقيقة بكل الشكوك يلي عندي .. اخدت عنوان المطعم ورحت عليه اعدت عطاولة وطلبت أكل .. كان بدي حجة لأحكي مع صاحب المطعم يلي هو مضر بيك . اخدت شعرة من شعري وحطيتا بصحن الاكل .. ناديت للنادل وحكيتله اكلكن مو نضيف ولازم خبر صاحب المطعم .. التم فوق راسي كل الموظفين وهن يحكولي رح نغيير الصحن .. ورح نقدملك صحن ضيافة .. ورح نضيفك غدا كامل على حسابنا .. بس انا رفضت وكنت مصممة شوف صاحب المطعم او رح اشتكي عليهن ليتسكر المطعم من الصحة .

العضوة: 743708 , 5 years ago

بعد شوي اجا صاحب المطعم لعندي وحكالي خير خير شو صاير .. نهى : مضر بيك بدي اشرب فنجان قهوة معك لو سمحت ونتفاهم عن يلي صار اخدني على مكتبه وطلب من الموظفين يجيبولنا قهوة .. مضر : نحنا منعتذر اكيد هالموقف صار بدون قصد ورح نعوضك بمبلغ مالي نهى : أولا الحذر واجب .. تانيا انا مابدي مبلغ مالي .. تالتا انا مخرجة وعندي معارف كتير قادرة بكلمة وحدة خلي المطعم يتسكر .. مضر : روقي ست نهى الموضوع مو مستاهل .. نهى : تماما .. انا حبيت احكيلك لتاخد حذرك لان يمكن موظفينك مو منتبهين وهالشي خطر عالمطعم وسمعته .. مضر : مزبوط كلامك .. شكرا الك .. ونحنا منكرر اعتذارنا نهى : كيفا فيروزة ؟ اتطلع فيني باستغراب : مين فيروزة ؟ نهى : عازفة البيانو يلي كانت هون .. بتذكر انه اهلي كانو يجو ع المطعم ويجيبوني معهم وكنت حبا كتير .. مضر : فيروزة تركت الشغل من زمان وسمعت إنه ماتت نهى : اوف كيف ماتت ؟ مضر : يابنتي انا مابعرف شي بخصوص الموضوع .. طلعت من عندو ولسا في براسي ألف سؤال .. غيوم رح تساعدني لو رجعت رحت لعندا يمكن تكون رجعت . بس هالمرة خليني روح مع علي لأني بلشت خاف من الموضوع .. اتصلت بعلي وخبرتو انو ناوية روح لعند غيوم وهو مارفض حكالي رح خلص شغلي و اجي آخدك فورا . استنيتو وبعد شوي اجا ... وصلنا لعند غيوم وكنت متأكدة انو مارح نلاقيا بس الفضول دفعني لأجي لهون .. دقينا الباب ، انفتح لحاله وصوت غيوم كان عم يناديلنا من جوا .. فوتي يانهى .. بلعت ريقي ودخلت على غرفتا .. غيوم : شو صار ؟ نهى : مين يلي قتلا ؟ انا شاكة بكتير أشخاص ... غيوم : رجعي عالبيت يلي ساكنتو فيروزة بالصالون في كنبا قديمة ارفعيها .. بتلاقي أرض من خشب .. اكسري الخشب رح تلاقي صندوق .. طالعيه وشوفي يلي بقلبو يمكن يفيدك .. نهى : طيب و ... غيوم : زيارتكم انتهت .

العضوة: 743708 , 5 years ago

طلعنا من بيت غيوم ورحنا فورا على بيت الجبل .. دخلت عالصالون كان فعلا في كنبا خشب بعدتا وعلي كسر الخشب يلي تحتا وطالعلي الصندوق .. فتحتو كان في بقلبه ورقة مهترية وعليها كتابة قديمة .. دققت بالكتابة كانت عنوان بيت .. والتوقيع كان باسم مازن . طلعنا بالسيارة انا وعلي و انسندت عالشباك وغمضت عيوني : علي انا تعبانة كتير .. ونفسيتي تعبانة ماعد اتحمل .. ماعد شفت النوم من خوفي .. فيروزة طول الوقت معي .. على طول عم تطلعلي وشكلا قدامي .. صرت ابكي و انا عم احكي .. علي : خلص نهى .. نشالله رح نلاقي حل للقصة سوا .. نهى : ان شاءلله ... علي خدني عالبيت بدي ارتاح .

العضوة: 743708 , 5 years ago

دخلت عالبيت ماكان في حدا غير ندى وفرح .. تركتن وفتت على غرفتي .. لحقتني ندى وحكتلي انه رح تسخنلي أكل .. انسندت على تختي وصرت ابكي .. فعليا انا حاسة انو عضام جسمي مكسرة و راسي رح ينفجر من التفكير وقلة النوم .. وجهي صار غامق وتحت عيوني رمادي .. دخلت ندى على غرفتي و اعطتني صينية عليها أكل .. وسألتني : شو صاير معك ؟ نهى : تعبانة يا اختي .. صاير معي مشاكل .. ندى : طيب شو صار حكيلي .. نهى : بتعرفيا لفيروزة ندى : مين هي فيروزة ؟ نهى : هي بنت انقتلت من 13 سنة .. المشكلة انو روحا عم تلاحقني .. ماعم تروح من قدامي .. بدا ياني جيب حقا .. مابعرف شو عملت انا والله تعبت .. قليلي بتعرفيا ؟ ندى : يا اختي انا بسمع انو انقتلت .. ويلي قتلا هي مرت صاحب المطعم يلي كانت تشتغل فيه .. بس اكتر من هيك مابعرف .. نهى : طيب .. اختي خدي صينية الاكل لاني شبعت ، ورح نام شوي طلعت ندى من الغرفة و انا طفيت الاضوية وغمضت عيوني .. سمعت حركة عالخشب كأنو حدا عم يلعب بأضافرو عالخشب .. فتحت عيوني شفت عيون فيروزة بوجهي .. ركزت اكتر لقيتا اختفت .. جلست حالي و أعدت و اتطلعت حواليي منيح .. مافي حدا .. رجعت تسطحت ونمت .. @rwayate بقيت نايمة لتاني يوم الساعة 8 الصبح .. فئت كنت مرتاحة شوي .. دخلت ع الحمام اتحممت و اطلعت .. و انا رايحة على غرفتي سمعت ندى من ورا الباب ، كانت عم تحكي عالتلفون مع واحد حكتلو خلص انا ماعد فيني صبر .. قلبي رح يحترق عليك .. ايواااا معناتا ندى عشقانة ومخبية .. تركتا ورحت على غرفتي لبست و بعدين طلعت عالعنوان يلي كان مكتوب بالورقة .. البيت كان بعيد عن بيتي شي نص ساعة أول ماوصلت طلعت عالبناية يلي بالعنوان الطابق التاني .. دقيت الباب

العضوة: 743708 , 5 years ago

فتحتلي ست عمرا بالستين حكتلي مين حضرتك ؟ نهى : انا نهى الست : بشو بقدر اخدمك ؟ نهى : بدي حاكيك بموضوع بنت اسما فيروزة دفشت الباب عليي وهي عم تسكرو وعم تقول مابعرف شي ولاترجعي لهون . نهى : خالة الله يوفقك ساعديني .. رجعت فتحت الباب و اتطلعت فيني : فوتي .. اعدت معها وحكيتلا يلي عم بصير معي .. جاوبتني بلهجة حادة : انا بكون أما لوصال مرتو لمضر صاحب المطعم .. وصال كانت مفكرة انو فيروزة حامل من مضر وكانت تشك فيا لأن مضر على طول بسيرتا وهلى طول يتغزل بجمالا قدام وصال .. لما عرفت انو ولدت راحت وخطفتا من بيت أهلا بعدين قتلتا .. بعد ماقتلتا الشرطة عرفو ولما وصال عرفت انو الشرطة بدا تقبض عليها انتحرت .. وهيك الشرطة سجلو القضية ضد مجهول لان ماعندن دليل يثبت انو وصال يلي قتلت فيروزة غير الشكوى يلي قدما مضر للشرطة . هي كل القصة .. ويابنتي حاج تنبشي بالماضي هي الحقيقة كلا و اسألي مضر ازا بتحبي .. طلعت من بيتا و راسي مشوش .. حدا قلي يلي قتلا هو ختيار .. غيوم قالتلي انو يلي قتلا قريب مني .. هي الست عم تقول انو وصال هي يلي قتلتا .. مضر عيونو بتوحي انو هو يلي قتلا .. مازن حسيتو كزاب .. فيروزة حكتلي ابوكي .. ياربي مين القاتل ؟ مين ؟ رحت عالبيت يلي بالجبل .. دخلت وصرت نادي فيروزة فيروزة .. حسيت بنسمة هوا باردة بالبيت بعد شوي دخلت فيروزة .. نهى : شو بدك كمان ؟ انا عرفت انو يلي قتلتك هي وصال شو بدك كمان ؟ احكي شو اعمل .. سكتت وضلت عم تطلع فيني .. وقعت بالأرض وصرت ابكي وقلا : حلي عني .. تركيني بحالي .. صرت اضرب عالأرض و ابكي وعيوني متل الجمر من الدموع .. دخل علي من الباب وهون ماعد لقيت فيروزة .. ركد لعندي ورفعني عن الارض وهو عم يهديني ويقلي خلص امشي اومي معي ..

العضوة: 743708 , 5 years ago

ضليتني عم ابكي و اضرب بإيديي عالأرض لحتى علي شدني وطالعني من البيت و قعدني بالسيارة .. حكالي انا عرفت الحقيقة كلا نهى : ماعد يهمني .. انا تعبت علي : فيروزة يلي قتلا هي وصال مرت مضر كانت شاكة فيا .. نهى : من وين عرفت انت ؟ علي : رحت لعند مضر وهددتو بالقتل قام حكا الحقيقة وخاف كتير نهى : و انا رحت على العنوان يلي كان بالصندوق .. و البيت طلع لأما لوصال وحكتلي نفس هالحكي .. علي : معناتا انتي عرفتي الحقيقة هلئ يعني خلص وصلتي ليلي بدا ياه فيروزة .. نهى : بس فيروزة مو رضيانة هيك .. علي : لان لسا العالم ماعرفو مين القاتل الحقيقي .. بس لينعرف قدام الكل رح ترتاح روحا وتختفي .. يلا خليني امشي ونروح عالبيت .. او على قبر فيروزة ازا بتحبي .. نهى : قبر فيروزة ؟ ليش ؟ علي : بحس انو الأموات بس نتواصل معهن وهن بقبورهم بيسمعونا وبيرتاحو وبحسوا بأمان كبير ويمكن انتي ترتاحي ازا حكيتي يلي بقلبك .. شو بروح عالبيت ولا عالمقبرة ؟ نهى : لا .. خلينا نروح على قبر فيروزة .. انت بتعرف وين اندفنت هالبنت صح ؟ علي : ايوا بعرف .. وصلنا عالمقبرة ، كانت الدنيا ليل والمكان فاضي ومطر وعتم .. قربت لعند قبرا وحسيت بنسمة باردة دخلت لجسمي .. صرت احكي معا .. يمكن الحكي مع ميت مابفيد بس عالقليلة برييح القلب .. صح كنت قادرة اتواصل معا وشوفا وهي روح بس مابقدر ارتاح متل هلئ .. و انا ساردة بالحكي ، فقدت علي .. مالقيتو جنبي .. صرت ناديلو : علي .. وينك علي محدى رد عليي .. حسيت في حدا ركض بسرعة البرق جوات المقبرة .. رجعت ناديت لعلي بس كمان مارد عليي .. و انا عم لف لاطلع شوفو برا .. لاحظت في حدى قاعد على قبر فيروزة ... وصوت فيروزة قلي : نهى .. التفتت عالقبر وقربت لعندا و انا عم ارجف من خوفي ورعبتي .. علي اختفى و فيروزة ظهرتلي بهيك مكان .. فيروزة : بتعرفي ليش انا هون ؟ نهى : ل ليشش ..؟ فيروزة : لان بدي ارتاح .. وهلئ رح ارتاح .. نهى : يعني انا عملت يلي بدك ياه ؟ فيروزة : اي .. حبيبك برا عم يستناكي .. اطلعي لعنده ولاترجعي .. طلعي

العضوة: 743708 , 5 years ago

صرت اركض لبرات المقبرة بسرعة لحتى وصلت لبرا .. لقيت علي واقف جنب السيارة .. نهى : ليش طلعت من المقبرة .. ليش تركتني جوا لحالي ؟ علي : لك نهى شبك ؟ انتي بعضمة لسانك قلتيلي اطلع لبرا بدي احكي مع فيروزة لحالي لو سمحت .. نهى : مستحيل .. انا ماحكيت هيك شي علي : لا تجننيني .. انتي حكيتي شو عم بكزب انا اتذكرت حكي فيروزة وقت قالتلي انا طالعته لبرا .. وعرفت انو هي السبب يلي خلاه يطلع ويتركني .. طلعت معه بالسيارة رجعت على البيت ونمت .. هي اول مرة بنام و انا مرتاحة هيك بدون ماشوف حدا وبدون ماتظهرلي روح فيروزة .. بس رغم هيك كنت خايفة وماني متطمنة .. الساعة 11 بالليل اجاني اتصال من رقم غريب .. رديت طلع المخرج طلال كان عم يسلم عليي وطلب مني أحضر العرض تبعه تاني يوم .. قلتلو اكيد رح اجي موفق .. وسكرت .. اسلوبو بالحكي كان متعجرف وواثق كتير . نمت وحسيت الصبح على صوت موبايلي عم يرن كان علي .. رديت عليه .. قلي تعي بسرعة على المسرح عرض طلال رح يبدأ بعد ربع ساعة هيك اللجنة قررت .. وقال بدن يحكو معك قبل العرض .. قمت من تختي بسرعة المجانين لبست وطلعت من البيت أخدت سيارتي ومشيت فيا بسرعة .. وصلت لنص الطريق كان عجقة سير كتير ورح اتأخر .. لهيك صفيت السيارة ونزلت كملت ركض .. وصلت ع المسرح و انا مقطوع نفسي وعم لاهث شعري منكوش ووجهي عرقان وجسمي مهدود ... من انا وبالممر ماكنت سامعة ولا صوت .. عرفت انه العرض بلش .. فتحت الباب بقوة ونزلت ع الدرجات كان المسرح عتم .. المسرح مليان وكلو ساكت وصافن فيني وبالشاشات .. وقفت ع الدرج بنص المدرج وانصدمت بالعرض .. العرض كان على تصوير ومعروض على شاشات مو تمثيلي .. الممثلة هي انا ... انا بالمسرح عم اركد من مكان لمكان وصرخ وفي جثة واحد مرمي جنبي .. بعد شوي انا ببيت الجبل وفيروزة بوجهي عم تحكي معي .. بعدين انا بالبيت وفي قناع ع البلكون ومسكتو بإيدي .. و انا نايمة بغرفتي وعم صرخ وهلوث .. و انا ببيت غيوم اعدة معها عم نحكي .. انا عم اقرأ رسالة ... انا ببيت الجبل عم اسمع صوت معزوفة فيروزة .. انا .. انا ... كلشي كان عم يصير معي مصور .. صرخت بصوت عالي شو عم يصيررر .. طفو الشاشات ..

العضوة: 743708 , 5 years ago

فجأة اشتغلت الإضاءة وبلش التصفيق و التصفير من كل الموجودين .. بعد شوي طلع طلال ع المسرح وحكا : اول شي اهلا وسهلا بالحاضرين .. قبل العرض بشهرين لما أجت اللجنة و اختارتني انا و نهى .. نهى تمسخرت عليي وحكت مين هاد طلال يلي بدي اتبارز معه .. بدون تدريب انا قادرة اربح عليه .. استهزأت فيني وبقدراتي .. حكي نهى كلو وصلني وقررت أتحداها وفرجيها اني بدون تدريب وبدون ممثلين قادر اصنع النجاح .. قبل ساعة بس أخدت أذن من اللجنة اني قدم عرض مباشر حقيقي وما رفضو شجعوني ..