9 years ago
  • المرحلة الثالثة (الأشهر 9,8,7)
من بعد سنه زواج بدون حمل صار الكل يسألني ليش لهلا مش حامل🙄 لدرجه صارو يعيروني ويحكولي عاقر 😭 ومن كثر حكي العالم حكتلي حماتي اروح انفحص عند الدكتوره .. المهم رحت أنا ع الدكتوره وحكتلي ما فيكي شي 🙃 انا افرحت وارجعت لزوجي وحماتي وحكتلهم ما عندي شي .. بعدين راح زوجي ع الدكتور وعمل فحص وطلع عندو ضعف في عدد الحيوانات المنويه فاضطر يعمل عمليه اسمها "عمليه الداليه " .... مرت ست شهور من بعد العمليه ولسا ما صار حمل وكل شهر كان زوجي يروح ع الدكتور يحكيلو لساتك زي ما انت وفش تحسن 😩 وأعطاه الدكتور أدويه لزوجي وصار يشرب حليب جمال وياكل عسل ...ويضل يستغفر بنيه الله يرزقو الذريه الصالحه 🤗 وانا سجلت في نادي رياضي عشان كنت زايده اكم كيلو 😅 صرت اروح ع النادي وبعد ٢٠ يوم الدوره إتأخرت قلت في عقلي معقول حامل !🤔 سألت البنات بالنادي حكولي الرياضه بتأخر الدوره وبصير في تغيرات في جسمك .. قلت شكلو هيك انا اصلا مستحيل اطلع حامل ... بعد اكم يوم رحت على عرس ابن عمتي وكانو الكل يسألني ليش مش حامل احكيلهم لسا بدري.. ولما روحت من العرس اسمعت امي بتحكي لابوي ليش لهلا مخلي بنتك عند هالعالم بدك بنتك تعيش بدون اولاد ..زوجها فش منو امل وحكت كلمه كثير بشعه 😢 انا لما اسمعتها بتحكي هيك ما ضل براسي عقل وصرت اعيط حكتلي امي اه جوزك عاقر وين الولد الي حاملتي صارلك سنه ونص متزوجه ولهلا مش حامل ... اطلعت من دار اهلي في تكسي وارجعت لعند زوجي وحكيتلو انا مستحيل ابعد عنك حتى لو ربنا ما كتبلي اجيب اولاد 😞 وصار لدوره ٨ أيام مش جايه اشتريت تست الحمل واعملت الفحص بين خط واحد والتاني خفيف قلت مش حامل ..بس صار عندي شك اشتريت كمان تست واعملت الفحص كمان مره وبين خطين انا طرت من الفرح وزوجي كان جنبي وصرنا نعيط من الفرح وحمدنا ربنا وبعدين اطلعت ع حماتي وحكتلها وهي صارت تعيط كمان وتسجد لربنا ❤❤ كان أحلى يوم بحياتي مستحيل انساه ... واتصلت ع ابوي وامي وحكتلهم امبارح كنتو تعيروني اني مش حامل وزوجي عقيم واليوم اعرفت اني حامل 🤗 ما عمركم تتشمتو بحدا ورحمه ربنا كبيره ... وهيني رح ادخل الشهر السابع بستنى في بنتي تنور دنيتنا ❤

161 تعليقات

العضوة: 35964 , 9 years ago

الحمدلله رب العالمين والله يفرحك بكمال حملك ووقومتك سالمه

العضوة: 46164 , 9 years ago

ياعمري الف مبروك الحمل حبيبة قلبي انشالله بتقومي بالسلامة ياااااارب

العضوة: 30370 , 9 years ago

الف الف مبروك :')

العضوة: 38339 , 9 years ago

مرحبا حبي اسال كم سوال اذا مافي زعاج

العضوة: 33607 , 9 years ago

الله يسلمكم جميعاً

العضوة: 33607 , 9 years ago

@user-38339 اتفضلي

العضوة: 26831 , 9 years ago

الف مبرووك ياعمرى ربنا رحيم وكريم وماينسى حد اللّٰه يتمملك ويتمم النا ع خير

العضوة: 38339 , 9 years ago

انا حامل بشهر سادس بس حركت جنين مو زيادي عم يتحرك

العضوة: 38339 , 9 years ago

انتو بتعرفو شي عن حمل يعني

العضوة: 33607 , 9 years ago

@user-38339 الجنين مش دايما بتحسي بحركتو ..هو بكون يتحرك بس انتي ما بتحسي ...واذا كنتي خايفه فيكي تراجعي دكتورتك او تتصلي عليها وهيك بتطمني

العضوة: 38339 , 9 years ago

يسلمو ع هل حكي

العضوة: 32227 , 9 years ago

الف مبروك الله يتمملك ،،،،بكيتني والله

العضوة: 38339 , 9 years ago

انتو كمان الله يطعمكن ويقومكن بسلامي يارب