العضوة: 743708 , 6 years ago

ماريا : مابتعرفي بجوز الأكل هون يشجعني اكتر..... شكلا خالتي لسا ماوصلت ماهيك. بدرية : اي لسا ماوصلت مابتعرفيها روحها طويلة. ماريا : ههه اي انا اللي بعرفها.. طالعة بدل تيابي . مرقت بالأول عمكتب ابوها، دقت الباب وصبحت عليه... ماريا : صباحو ياحلو.. ابو مهدي :..... ماتحكي معي لساتني اخد عخاطري منك. ماريا : له يابابا ليش هالحكي والله انت بتعرف انو مابهون عليي زعلك بتعرف لو مختلفة بالرأي مع حدا تاني فلا كنت بهتم بس انت حبيبي غير عن كل الناس، لك حتى الماما قديه بحبا بس انت عندي غير عنا بحسك بتفهمني اكتر الماما كتير طيبة يعني بتاخد الامور ببساطة وعاطفية كتير لكن فهمك الي ووقفتك حدي بكل شي بخططلو وبفكر فيه هاد واقف بعيوني كتير والو بألبي معاني كبيرة. ابو مهدي : اي وياريت بتردي علي، لك يابابا انا من كل هالقصة شو بدي غير اني افرح فيكي والله مشتهي متل هالأهالي زفك لعريسك بأيدي وسلمك لألو ووصي فيكي وشوف ولادك........ هلأ انا مابحقلي متل بقية الناس يكون عندي احفاد اااه بدي هيك ضل دلل بولاد الناس وبنتي روح البي ماشوف ولادها وضل اترجى من هالدنيي شوفها عروس، كتير علي جاوبيني كتير. ماريا عم تضحك بصوت عالي : لأ ياروحي مافي شي بهالدنيي كتير عليك لو بتطلب روحي والبي وعيوني بس بغلاوتي عندك اجللي هالمشروع لبعدين والله مووببالي حاليا، وبعدين عم تقول بدك احفاد اتدللهن هي اختي سوار رح تتزوج عن قريب ورح بتجبلك احفاد وابنك مهدي متزوج وعندو ولاد يعني كمان مانك محروم من الاحفاد لشو معقدها ياسيد بابا. ابو مهدي : ولك اختك رح تتزوج وتروح مع زوجها لمدينة تانية واخوكي متزوج ومسافر وماشفنا ولادو الا كم مرة واصلا انا بدي شوف ولادك انتي تحديدا عم تفهمي غير هيك رح ضل زعلان منك. ماخلصت حكايتنا لسا وبألبا احداث مشوقة كتير، شو رح يصير مع ماريا وليش ابوها زعلان منها وشو رح يصير لقدام وياترى شو التغييرات اللي بتصير بحياتا. حبكن..... كتير

العضوة: 743708 , 6 years ago

❤️ الجزء الأول ❤️ ماريا بدلع :.... كرماااااال خاطري عندك حاجتك زعل مني والله مافيي شوفك زعلان مني وكون رايقة، طيب فهمني ليه هالمرة زعلك غير يعني هي مو اول مرة برفض عريس ولا لأنه ابن اخوك زعلك زايد حبتين. ابو مهدي : لأ مو لأنه ابن اخي بس لأنه حاج سايرتك كتير وقلت اتركها عراحتها يارجال البنت واعية وفهمانة وبتعرف مصلحتا منيح بس تخنتيها والله كل مااتقدملك عريس بترفضي بدون حجة مقنعة لك اكسري عيني بشي حجة قوية واقنعيني، وبعدين تعي وجاوبيني هلأ ابن عمك عمر من شو بيشكي دكتور مثقف راكز الف بنت بتتمناه شو سبب رفضك اله. ماريا : عسلامته انا مابحط فيه عيب بس سبحان الله مابشوفو لعمر الا متل اخي مهدي مو راكبة معي شوفو زوج لألي من كل عمري بشوفو اخ وصديق مو اكتر صعب عليي بعد هالاحساس هاد شوفو زوج وكمل حياتي معه هيك ببساطة. ابو مهدي : كل كلامك مااقنعني حاجتك عم تستهبلي شيبتي وتقنعيني بكلامك. ماريا بزعل : الله يسامحك والله ماعم استهبل ولا عم قلل من قيمتك يابابا، طيب خلص بوعدك بوعدك وقت لاقي حالي ميالة لشي رجال او معجبة او مقتنعة بشي رجال رح اجي وخبرك شو رأيك. ابو مهدي : ايوااااا يلا اقلبي الموازين وتعي شنقلي عريسك بأيدك وقليلي بدي هاد يابابا. ماريا : لأ يووو شو مجنونة انا واعمل هيك انا عم قلك هيك بس لتتأكد اني مو آخدة موضوع الزواج بسخافة متل ماعم تسمعني كل مرة، خلصنا ابومهدي بحياتي عندك لبقى اتضل هيك زعلان والله من مبارح وانا مو رايقة لانك زعلان مني. باستو عخدو اكتر من مرة وهي معانقتو بقوة لحتى صار يضحك عليها بصوت عالي... ابو مهدي : ههههه لك خلص دبحتيني...... قال اللي مابيجي معك تعى معه وانا رح سايرك هالمرة كمان بس بعد هيك حسابي غير لون رح يكون مفهوم. ضحكت وقالتلو : امرك ياباشا، هلأ رايق علينا الحج ابو مهدي : اي بس روقاني مؤقت متل مافهمتك ماتقولي ماحزرتك..... يلا طيري هلأ بدلي تيابك مابقى الا توصل خالتك ام بال طويل. ماريا : ههههههههه على عيني ياحبة عيني. ابو مهدي عم يتطلع فيها وهي رايحة : الله يوفقك يابنتي ويفرحني فيكي عن قريب ويهديكي وتركني بقى ببيت زوجك.

العضوة: 743708 , 6 years ago

طلعت ماريا من عند ابوها مبسوطة انو قدرت تقنعه لو لوقت بسيط انو مايضغط عليها بموضوع الزواج... * وصلت خالة ماريا وجابت معها صفيحة مشان الفطور... ام مهدي : ولك يااختي ليه هيك عزبتي حالك كنا عملنا فطور هون بالبيت. سميرة : لا دخيلك مليت من فطور البيت حبيت غير شوي وقلت بشوفكن وبفرد مرة بشوف ماريا من وقت والله ماشفتا لهالمضروبة كني مابتقعد ابدا. ام مهدي : اااااخ يااختي لا والله مابتاخد وقت راحة ابدا حتى بيوم الجمعة اللي كل الناس بترتاح فيه هي بكون عندا شغل..... بيني وبينك الحق مو عليها الحق على ابوها اللي سلمها الشركة وتركلها الادارة وكل شي فيها. سميرة : ولك يااختي ماانتي شايفة صحة جوزك شلون صايرة وكل ماله للأسوء مابدي احكي قدامه بلا مايزعل مني. ام مهدي : اي والله بس مو هيك البنت ماعم تفكر بالجواز بتاتا وكل مااجاها عريس بترفضو بلا سبب مقنع واخر المتمة رفضت ابن عمها وقت طلبها من يومين تصوري. سميرة : مين قصدك ابن عمها بس مايكون فريد. ام مهدي : لا يووو شو فريد انا مابوافق لو يجي يخطبها، انا قصدي عن عمر ابن سلفي قاسم تزكرتيه. سميرة بحلقت عيونها : ليكون هاد الاسمر المهيوب الدكتور. ام مهدي : ياعيني عليكي هو بعينه ورفضته والله ابوها جن منها وزعل عليه كتير كيف طلعو من عنا مكسور خاطرهن......هيي للامانة يعني ماقالت بوشهن مو موافقة بس لمحت قدامهن انها ماعم تفكر بالجواز...... بس خلص ليكا اجت ماتحكي قداما شي. ماريا : صباحو خالتي كيفك. سميرة : هلا ياالبي كيفك يا ولي وينك ماعم شوفك متل الخلق مقصيتلي اياها شغل شغل لك مااشتقتيلي عأساس بتحبيني. ماريا : اي بحبك والله بس شغلي آخد كل وقتي شو اعمل. ابو مهدي : اتركيها يا سميرة بنتي صايرة اعند منا مافي قديه قلتلا جيبي حد يعينك عشغل الشركة بس فالج لا تعالج. سميرة : بس...... ماريا : وبعدين بهالسيرة بقى مابدنا ناكل يعني، ريحة الصفيحة جوعتني يلا بابا. ام مهدي : اي يلا غيري السيرة ضلي اهربي من الحديث اي. مرق اليوم اغلبه وماريا مشاحنات مع اهلها وخالتها.... هيك لأجى الليل اللي ماسدقت ايمت يجي مشان تنام وتروح تاني يوم للشركة.

العضوة: 743708 , 6 years ago

تاني يوم..... وصلت ماريا عالشركة ودخلت بأسلوبها المعتاد.... رافعة راسها بقوة ماشية برزانة نظراتها حادة للكل هدوئها بيدب الرعب بقلوب الكل لأن وراه بيكون في توبيخ للمقصر وتحذير للناسي وتهديد للغلطان وتقليع لعديم الفايدة. ركبت المصعد لوصلت مكتبها.... ماريا للسكرتيرة : صباح الخير... السكرتيرة : صباح النور انسة. شلحت جاكيت الطقم وحطتو عضهرو الكرسي تبعها وزبطت قعدتها... دخلت السكرتيرة معها مجموعة اوراق :..... انسة في هالوراق بدهن توقيع منك. عم تضوي اللاب توب: حطيهن من ايدك واطلبيلي قهوتي اول شي وجيب

العضوة: 743708 , 6 years ago

يلي الملفات اللي طلبت تجهزيهن يوم الخميس وابعتيلي المسؤول المالي فورا. السكرتيرة : حاضر انسة تفضلي. رن تلفون المكتب : ماريا...... الوووو. المسؤول الأداري : صباح الخير انسة..... عندي معلومات بخصوص المناقصة الجديدة. ماريا : اهلين... تعى لعندي بعد نص ساعة وجيب شروط المناقصة معك. المدير الأداري : حاضر انسة. بعد وقت وصل المدير المالي لعند السكرتيرة... السكرتيرة :.... لحظة شوي بس لحتى دخللها القهوة وخبرها انك وصلت. المدير المالي :..... كيف شفتيها اليوم ضايجة شي والا رايقة. السكرتيرة : اممممممم مابعرف ماحسيت عشي هلأ وقت تفوت انت بتشوفها. دقت الباب ودخلت :...... انسة المدير المالي وصل..... تفضلي القهوة. ماريا : حطيها وخليه يفوت. بعد شوي دخل لعندها :..... صباح الخير. اتطلعت فيه من فوق لتحت :.... شو ياسيد ابراهيم صاير عم تتصرف من كونك وبدون ماترجعلي باللي عم تعملو. المدير المالي : ليش ياانسة خير شو عملت. ماريا : يعني مابتعرف... اوك انا بقلك مع انك فهمان عليي عن شو عم احكي بس رح جاريك انا. قامت ومشت لناحو ووقفت مقابيلو تمام.... ماريا : تفضل ارتاح. وكملت :...... وصلني خبر بس للأسف انو وصلني متأخر انو الك تلات شهور مو صارف راتب للمتقاعد ابو براء فيي اعرف ليش. جاوبها وبألبو شوية خوف :..... اي مزبوط. ماريا : وشو السبب انا طلبت منك توقف معاشه شي. المدير :... لأ بس السيد ابو مهدي صرفله معاش تقاعد لسنتين وخلصو من تلات شهور لهيك وقفت صرف المعاش لأله. ماريا : امممممم بس مو المفروض انك ترجعلي بهيك خطوة والا انا رجل كرسي بهالشركة والا ليكون مو معبية عينك.

العضوة: 743708 , 6 years ago

المدير : لا حاشاكي يااانسة بس انا قلت لانه هاد شغلي فقلت انو بعمل هيك من دون ماارجعلك. ماريا : ايوااااا وليش انت مابتعرف انو معاش ابوبراء بهالسنتين كان تعويض عن اصابته بالمعمل تبع الشركة. المدير : اي امبلى بعرف ولهيك وقفته لأن خلصت المدة المسموحة. ماريا : اي وشو دخل التعويض بالمعاش انت قطعت عنه كل شي بقى لا تخلطلي شعبان برمضان. المدير : بس انااااا.... سكت وقت صرخت بصوت عالي : لا بس ولا شي اي تصرف بدك تتصرفه بالامور المالية بترجعلي فيها بالاول عم تفهم لا تتصرف من عندك بدون ماترجعلي كلامي واضح...... واليوم بأيدك رح تاخد معاش تلات شهور وتعويض تلات شهور وتاخدهن انت بزاتك لبيت ابوبراء مع اعتزار عن التأخير، واضح كلامي ومن عندي عم قلك التعويض اللي حطو الوالد سنتين رح بضل عطول هاد غير المعاش، وصلت والا ارجع عيد. المدير :...... ماريا : شو بشوف كلامي ماعجبك. المدير بقهر :....... امرك ياانسة اليوم بيصلو كل شي. زاحت وشها عجنب ومدتلو ايدها لبرا : فيك ترجع لشغلك. يتبع #الجزء_الثاني بعد ماطلع مدير العلاقات العامه م̷ـــِْن عند ماريا استأزن المدير الاداري وفات لعندها اشرتله ب ايدها ليقعد وكان باين عليها التوتر وهي مركزه بالورق اللي بين ايديها المسؤول بلبكه، ،، انسه ازا مو فاضيه برجع بعد شوي ماريا، ،، خليك، ، شوي وبفضالك التفتتلو بعد وقت : اي هات قلي شو المعلومات الجديدة عاساس معلوماتك جبتها الاسبوع الماضي شو صار جديد. المسؤول الأداري : اي انسة ماريا بس لهلا ماعرفتي مين الشركات اللي داخلين بهالمناقصة.... قامت من مطرحها وراحت لعندو :... ليش عرفت مين داخل بالمناقصة هي.... المسؤول : اي انسة ماريا انا وعدتك الا جبلك المعلومات ووفيت بوعدي. ماريا : اي ومين داخل.... المسؤول : رح تنصدمي وقت تعرفي مين.. ماريا : قول بتعرفني مابخاف المناقصات بالنسبة الي تحدي وانا روح البي هيك شي قلي مين. المسؤول : شركة العنبر وشركة الغانم وشركة المدائن. ماريا : بس هدول. المسؤول :

العضوة: 743708 , 6 years ago

ماريا : قول بتعرفني مابخاف المناقصات بالنسبة الي تحدي وانا روح البي هيك شي قلي مين. المسؤول : شركة العنبر وشركة الغانم وشركة المدائن. ماريا : بس هدول. المسؤول : لا خبرتك مين كمان شركة البرق واخوانه وشركة الهدى. ماريا : طيب وليه هيك حاسة انك مصدوم من شي معين. المسؤول : انسة ماريا انتي ركزتي بالاسماء اللي زكرتا.... عم قلك شركة الغانم وهالشركة تقيلة والمنافسة معها مو سهلة يعني بصراحة انا حاسس انو هالمناقصة مو من نصيبنا. ماريا : اي وشو يعني شركة الغانم.... وانت ليه مستهين بشركتنا... بشو بتفرق عن شركة الغانم. المسؤول: عفوا انسة فهمتيني غلط انا ماني مستهين ابدا بس بقلك انو هالشركة كمان مو سهلة وصاحبها مو سهل ابدا واللي بدو اياه بياخدو فهمتي قصدي. ماريا : اي وانا كمان اللي بدي اياه باخدو.... ليك ومن اخر الكلام هالمناقصة الي ولازم انا اللي اخدها بتعرف ليش.... لأنه هالمناقصة رح تخلي كل مصانع الأعلاف تشتري من عندي واي تاجر كبير رح يشتري الأعلاف من عندي، انت نسيان انو هالمناقصة شحنتها هيي الشحنة الوحيدة للأعلاف بالبلد كلا يعني المربح رح يزيد الاضعاف ازا شركتنا اللي اخذتها ولهيك مارح اتنازل ابدا عنها.... لو بدي اتنافس مع اكبر شركات البلد عليها. المسؤول : متل مابدك انسة ماريا انا وعدتك جبلك اسماء المنافسين لهالمناقصة وقدرت جيبهن..... هلأ بدك شي تاني. ماريا : متى اخر موعد.

العضوة: 743708 , 6 years ago

المسؤول : بعد تلات اسابيع. قامت ورجعت لمكتبها وعطتو أوراق وقالتلو: هي اوراقي صارت جاهزة بتبعتها للشركة فورا مابدي تأخير. المسؤول : حاضر انسة. رجعت لشغلها وهيي متحمسة كتير لأن عندا امل كبير انو هالمناقصة رح تكون من نصيبها.. بشركة الغانم..... السكرتيرة : استاز جبر.... اتصل المدير تامر وبقلك راح للمصنع ولقي كم الة عطلانة فيه ويمكن يتأخر عن موعدو معك. اتطلع فيها بعدم اهتمام :..... وليه مااتصل فيي ليخبرني بهالحكي. السكرتيرة:.... قال كان عم يدقلك وتلفونك مغلق. جبر : اي مزبوط والله نسيت افتحه..... طيب ماشي الحال روحي شوفي شغلك وابعتيلي المسؤول الأداري. السكرتيرة : حاضر استاز بس قبل هيك ماتنسى عندك اجتماع بعد نص ساعة مع المسؤولين ومدراء الأقسام. جبر : ماني نسيان وخلي كل شي جاهز للاجتماع..... روحي شوفي شغلك. دقايق ودق باب مكتب جبر... فتح المسؤول الباب ودخل.. المسؤول : بعتت وراي استاز. جبر : اي..... شو بشوف مبرد البك وماجبتلي بقية المعلومات عن مناقصة الأعلاف. المسؤول : بس استاز خبرتك من يومين المعلومات كلا. جبر : اي بس ماقلتلي مين مشارك بهالمنافسة عأساس بتعرف اكتر من حدا ورح تعرف مين داخل ولهلا ماوافيتني بالأخبار. المسؤول: اي بس بعدا قلتلي مابهمك تعرف مين لهيك انا ماخبرتك باللي وصلني. جبر : يعني عرفت مين داخل. المسؤول : اي استاز شركة البرق وإخوانه وشركة الهدى والعنبر والمهدي. جبر : بس على علمي شركة المهدي صاحبها تركها لبنته ماهيك.... هههه يعني مقوية البها هالبنت لتدخل بمناقصة كبيرة متل هي. المسؤول : اي مزبوط ابومهدي ترك ادارة شركته لبنته لكن هالبنت بتطلع قد عشر رجال وكزا مناقصة ربحتها، بتتزكر مناقصة الادوات الكهربائية اللي صارت من كم شهر تنافسو عليها شركات كتيرة وربحتها شركة المهدي بسبب نجاح ادارة بنته لأبو مهدي.... والكل بيحكي انو شخصيتا قوية وفيها اتدير شركة ابوها لحالا من دون اي توجيه من حدا. جبر عم يشعل السوجار : شكلك كتير معجب فيها عم تحكي عنها وكأنها شي ممثلة او شي مطربة. المسؤول : ابدا استاز بس فعلا هالبنت التقيت فيها اكتر من مرة ولاحظت عليها اشيا كتير بتأكد صحة كلامي. جبر : قصدك تقلي انو المنافسة معها شرسة.

العضوة: 743708 , 6 years ago

المسؤول : مو شرسة بس بصراحة...... المنافسة معها قوية. جبر بنظرة ثقة : اي وانا بحب هيك منافسات وخصوصا ازا كنت وثقان انو اللي قبالي منافس مو سهل لكن سهل يخسر قدامي. المسؤول : اي استاز بس ماتستهين ببنت المهدي الكل بيحكي عن شخصيتا وادارتا للشركة حتى ابوها ماكانت ادارته للشركة بهالشكل. جبر : اهااا... وانت من وين بتعرف هالمعلومات. المسؤول : الي معارفي بشركتها واغلب العملاء اللي بيتعاملو معها انا بعرفهن شخصيا وهنن خبروني عنها. جبر :..... اي المهم هلأ شوفلي شو صار مع تامر بالالات العطلانة بالمصنع وخبرو وقت يخلص يمرق لعندي بسرعة. المسؤول : حاضر استاز. *** المسا ببيت ابو مهدي... ماريا عم تشتغل عاللاب توب بشغل بيخص الشركة، فجأة تعبت وعتمت الدنيي بعيونها وصار كل شي اسود قداما ودوخة قوية حست فيها ومن بعدا ماحست عشي... مرق وقت وماريا مغمى عليها مو حاسة بشي لوقت بلشت تصحى عحالها.... فاقت عم تتحسس راسها موجوعة كتير، ركزت حواليها منيح انتبهت انو كانت عم تشتغل وفهمت انو اللي صار معها حالة اغماء.. قامت دايخة وبصعوبة لوصلت الحمام بغرفتها غسلت وشها كزا مرة وشربت مي وتناولت قنينة عصير باردة شربتها دفعة وحدة. ارتاحت شوي ورجعت تكمل شغلها.. تاني يوم الصبح.... ام مهدي : لك مشان الله مابصير هيك يارجال يعني لازم تقعد معها وتقلا انو تاخدلا شي اجازة او تسافر تروح لعند اخوها قديه صار باعت وراها لتروح لعندو انا كل اللي بدي اياه تريح حالا شوي مو هيك مقضية كل وقتا شغل مبارح شفتا نايمة فوق اللاب توب تبعها وهي عم تشتغل..... من تعبا صارت بأي مكان تنام، والله بكرة بتتعب اكتر ومابترجع متل قبل. ابو مهدي : يعني شو بدك اياني قلا اتركي الشغل بالشركة. ام مهدي : لك انا ماعم قول تترك الشغل بس عالقليلة تفصل شوي بين الشغل بالشركة وبين البيت.... يعني هلأ معقول بالشغل في ضغط هالقد لحتى ماعم ترحم حالا.

العضوة: 743708 , 6 years ago

ابو مهدي : بنتك بتعرف كيف تتصرف وخصوصي هالفترة مشغولة كتير بالمصنع والشركة والمناقصة الكبيرة اللي جاية بعد كم اسبوع. ام مهدي : ماشي رح اجي معك هالفترة في ضغط شغل وقبل وقبل، طيب انت مااشتقت تقعد معا مااشتقت تتسايرو مااشتقت نطلع شي مشوار مع بعض والله صرت اخجل الكل بينخطب وبيتزوج وهي قاعدة ماهما غير الشغل لك اختا الاصغر منا رح تتزوج بعد وقت شو بدك اكتر من هيك. ابو مهدي : خلص خلص نخرتي مخي رح احكي معها مع اني بعرف شو رح يكون ردها. ام مهدي : الحق عليك من الاول ليه لتسلما ادارة الشركة. ابو مهدي بعصبية : لكن لمين بدك اياني سلما ااااه مين ائمن من بنتي عرزقي ورزقكن شركة كبيرة كبرتا وتعبت عليها وقدام عينك كان كل شي بدك سلما للغري

العضوة: 743708 , 6 years ago

ب يسرق نص رزقها كرمال شو سلم الادارة لبنتي. ام مهدي : والله ماهيك قصدي روق عليي شوي، انا كان قصدي انو هيي تشتغل بالشركة ووقت الضغط فيها بتساعدا انت هون بالبيت هيك بيخف الحمل عليها فهمتني هلأ. قطع حديثهن نزول ماريا.... ماريا : صباح الخير بدرية....صباح الخير بابا (وباست امها) صباحو يااحلى ماما. امها : اهلين ماما. ماريا : خير ماما شوباكي ليه هيك متدايقة. امها : بصراحة مو عاجبني حالك. اخدت فنجان القهوة وشربت منه : ليه شبو حالي. ابو مهدي بنظرة تسكيت لمرته : بابا هلأ بعد الفطور عايزك بكلمتين بالمكتب. ماريا : مافيي بابا بجوز ماافطر معكن ناطرني شغل كتير بالمكتب. ام مهدي بعصبية : شايف حتى فطور ماعم تقبل تفطر لك شوف شلون صحتا صايرة بالنازل. ماريا عم تبتسم : ماما ليه هيك منفعلة وقت جوع بفطر بالشركة ماتعتلي همي. ابو مهدي : لأ بابا رح تفطري معنا ولو تأخرتي شوي عالشركة ماحدا رح يحاسبك.. ماريا : بس يابابا.... ابو مهدي غمز ماريا : مارح عطلك كتير شغلة ربع ساعة. فهمت عليه :.... حاضر بابا امرك. قعدت حد امها : امرك ياست الكل رح بفطر معكن عمرينو الشغل بس انتي ماتزعلي. امها : لك ياماما انا شو بدي منك غير انو شوفك مرتاحة و رضيانة والله مبارح طار عقلي وقت شفتك نايمة عكمبيوترك وانتي عم تشتغلي. ادركت ماريا انو امها دخلت لعندها وهي مغمى عليها لكن ماحست عليها انها كانت غميانة وفكرتا نايمة. ماريا : اي قلت باخد شوية راحة وبعدا ماقدرت كمل شغل نمت بدري الليلة. امها : اي امي نامي بكير بترتاحي وهيك مابتشغلي بالي عليكي برضاي عليكي ياامي ديري بالك عصحتك. #يتبع

العضوة: 743708 , 6 years ago

الجزء الثالث ❤️ بعد الفطور راحت ماريا مع ابوها لغرفة المكتب ليحكو براحتهن.... ابو مهدي : اي بابا بدي قلك كلمتين احسن من عشرة.... امك بصراحة كتير قلقانة عليكي انو عم تقضي وقتك كله شغل وانا معها بهالشي، مو ازا سلمتك الشركة من بابا لمحرابا معناها تجوري عحالك وماتعودي تنتبهي لصحتك امك بعينا شافتك نايمة فوق اللاب توب وانتي عم تشتغلي هالشي برأيك بصير. ماريا : بعرف بابا بس شو ساوي انت ادرى الناس بشغل الشركة وانو مابيخلص مابتتزكر وقت كنت انت فيها قديه كتت تروح بشغل عالبيت وكنت تقضي اكتر اوقاتك بالمكتب صح والا انا غلطانة، بعدين هالفترة ضغط كتير والمناقصة اللي جاية هي فيها منافسين كتير وكبار لهيك صعب اجل شغلي او مااضغط حالي بكزب عليك ازا بقلك غير هالحكي. ابو مهدي : مزبوط كنت ارجع بشغل معي بس كنت وازن شوي بين الشغل والبيت وكنت اكتر اوقاتي جيب الشغل وقت الضغط، بس انتي يابابا كتير جاية عحالك وماعم ترتاحي بنوب من هلا عم قلك ازا رح اتضلي هيك انا مضطر جيبلك حدا يساعدك ويدير الشركة معك. ماريا بقهر : ليش قصرت انا بشي. ابو مهدي : لك ياريتك تقصري كنتي بتعمليلي حجة لاعطي الإدارة لغيرك لكن انتي مقصرة بحق حالك انتي كل وقتك وراحتك ويومك وحياتك صارت بس للشغل، يابابا العمر بيخلص والشغل مابيخلص عشو مستعجلة، اسم الله اسمك كبر كتير وصار الكل يهاب يدخل بمنافسة معك. ابتسمت بضيق : ماشي بابا متل مابدكن بس اسمحولي بس هالفترة اضغط عحالي استحملوني بس لتخلص الازمة اللي عندي شغلي هالفترة كبير ورح يزيد اكتر وقت اربح هي المناقصة. ابو مهدي : ماشي رح سايرك هالمرة كمان بس هالفترة رح اسمحلك تشتغلي بالبيت بعد هيك انا رح وقف بوشك. نزلت راسها مخنوقة بس مافيها ترد بشي. مسك وجهها بأيديه التنتين : ماتزعلي مني ياروحي والله كله لمصلحتك انتي مو شايفة حالك منيح كتير متغيرة ضعفانة عن قبل ودبلانة وين كنتي ووين صرتي. ماريا : متل مابدك بابا خلص رح حاول ريّح حالي وخفف من شغلي بالبيت. ابوها : الله يرضى عليكي ويوفقك يابنتي. *** وصلت الشركة وكانت متدايقة شوي من طريقة ابوها بالحديث معها، حست كانها طفلة ومابتعرف مصلحة حالا.. دخلت المكتب بدون ماتصبح عحدا.. السكرتيرة : اهلين آنسة ماريا. ماريا :.......

العضوة: 743708 , 6 years ago

لحقتها السكرتيرة عمكتبها واعطتها ملف المصنع : انسة ماريا هدول جابهن الاستاز تامر بقلك هاد ملف المصنع وفي اوراق ضروري تتطلعي عليهن عدا عن الاوراق اللي بدا توقيع وازن منك ووو...... ماريا بعصبية : طيب فهمت حطيهن من ايدك واتركيني. استغربت السكرتيرة من اسلوبا وعصبيتا وقالت بحالا (ياحبيبي هاد لسا ماوصلت وباين انها معصبة كتير كيف رح تكون بقية النهار.... الله يستر) ماريا بصراخ:...... لساتك واقفة روحي لشغلك. حطت ايدها عجبينها بضيق وغمضت عيونها... وحكت بصوت مسموع لألها بس.. استرخي ماريا شبكي ماصار شي ازا ابوكي خايف عليكي مافيا شي، صحي انا مو شايفة حالي غلطانة لكن هو بابا واكيد بيعرف مصلحتي وبتهمه يمكن انا فعلا بالغت كتير بشغلي وفعلا اهملت حالي وماني منتبهة...... بس انا مابحب حدا يحكيني بهالطريقة ماني بنت صغيرة، اوووووف خلص ماريا شو صرلك هاد ابوكي اللي بيعشقك ولو شو ماكبرتي بتضلي بعيونو لسا صغيرة.....رح حاول خفف شوي من حدة عصبيتي

العضوة: 743708 , 6 years ago

مابصير اشتغل وانا معصبة لازم ارتاح شوي وبعدا بكمل شغل. مسكت ملف المعمل وقلبت اوراقه وحدة وحدة حست انو في شي مو مزبوط بالملف... رفعت سماعة التلفون واتصلت بتامر... تامر : اهلين انسة ماريا. ماريا : تامر في اوراق مو مزبوطة بالملف اللي بعته اليوم تفضل لعندي واشرحلي شو عم يصير. تامر : خير شو شفتي شي ماعجبك. ماريا بعصبية : مارح احكي شي لتتفضل لعندي معك نص بتكون مزروع عندي. قفلت الخط قبل ليكمل كلامه. بعد نص ساعة عالتمام وصل تامر لعندها وطلب الازن ليدخل... تامر : كيفك انسة. ماريا :.... اهلين..... تفضل اقعد. رمت الملف قدامه بعصبية :..... فيك توضحلي شو هالتخبيص..... هدول حسابات الشهر الماضي وين حسابات الشهر اللي قبله وحسابات الشهر هاد كمان. تامر : انسة ماريا انا بعتت الملفات كلا للسكرتيرة ملف الشهر الماضي واللي قبله وهالملف اللي معك حسابات الشهر هاد فيكي تتأكدي من التاريخ. ماريا : ماشفت شي ماعندي الا هالملف. تامر : روقي انسة ماريا واضح انك مزعوجة كتير ومعصبة على غير العادة فيكي تبعتي ورا السكرتيرة وتسأليها عن بقية الملفات. بعتت ماريا للسكرتيرة واجتها فورا... ماريا : شو مدام مريم وين ملفات حسابات المعمل للشهر الماضي واللي قبله. السكرتيرة : انسة عطيتك اياهن وقلتيلي حمليهن عالكمبيوتر وحفظتيهن عندك واشتغلتي انتي والمدير المالي عليهن من اول الشهر. زكرتها وقتها وقت اجتمعت بالمدير المالي بصالة الاجتماعات بعد ماانتهت من اجتماعها مع بقية المسؤولين ورؤساء الاقسام. ماريا :....... مزبوط تزكرت. تامر : خير انسة ماريا شو صاير معك لحتى ضايجة اليوم ونسيانة شغلك وانتي مو بالعادة بتنسي شي ابدا. تنهدت واخدت نفس لبعيد : مابعرف شو صايرلي اليوم.... ماتواخزني تامر مو قصدي شكك فيك او حاسبك بس شكلي نسيت بسبب مزاجي المعكر من عند الصبح. تامر :.... بسيطة انسة ماريا ولا يهمك بس قلك عشي وماتعتبري تدخل مني.

العضوة: 743708 , 6 years ago

ماريا بتنهيدة : قول. تامر : انا شايف انك كتير بتشتغلي ومابترتاحي ابدا، حتى للبيت بتاخدي معك شغل، رغم انو فيكي توظفي حدا لياخد عنك الشغل الزايد. ماريا : حتى انت ياتامر عم تحكي متلهن. تامر : مين قصدك بمتلهن. ماريا : ماما وبابا اليوم فطروني عمحاضرة طويلة عريضة بخصوص هالموضوع وهاد سبب مزاجي العكر اليوم. تامر بابتسامة : ولهالدرجة هالموضوع زاعجك وشاغلك لينسيكي شغلك اللي اشتغلتيه من الشهر الماضي..... شفتي انو معهن حق كترة الشغل والضغط عليكي أثرت كتير عزاكرتك وخلتك عصبية ومزاجية كتير. ماريا : اي وبرأيك شو لازم اعمل. تامر : ليه مابتأخدي اجازة كم يوم او بتسافري او بتروحي لمزرعتكن اللي بالضيعة هنيك الهوا نضيف منه بترتاحي شوي ومنه بتغيري جو وبترجعي زهنك صافي ورايق وهالشي بيعطيكي طاقة اكبر لتشتغلي بنفس. ماريا : اي بالزات هالفترة مافيي ارتاح او اخد اجازة انت نسيان شو مستنيني بعد اسبوعين، وقربنا عنهاية السنة يعني رح يكون في جرد ومراجعة حسابات ومناقصات واستيراد وتصدير الشهر هاد لشركة الزين. تامر :.... على راحتك بعرف كلامي مامنو نتيجة لانه اللي براسك شي واحد الشغل وبس. ماريا : فكرك انا مو حابة ارتاح مو حابة غير شوي من حياتي بس كل ماقول رح اعمل هالشي برجع لشغلي اكتر من اول وعلمك شغل الشركة مابيخلص وبيكبر اكتر. تامر : قلتلك من قبل كلامي مافي منو فايدة.... عموما انا رايح لمعمل الألبان لشركة عدي مشان وصيه عالطلبية اللي قلتيلي عليها. ماريا : اي منيح... الله معك وابقى خبرني شو بصير معك. مرق نص اليوم بالشركة... وصل مندوب من شركة كانت عارضة منتجاتها عشركة المهدي، قعدت معه ماريا وكانت هادية كتير وقتا فجأة غاب الضو عن عيونها وحست بصداع غريب زكرها بصداع قبل بيوم وعشوي كانت رح يغمى عليها، لدرجة انو المندوب كان قاعد قدامها وهي مو شايفته بنوب. المندوب : خير انسة في شي.